នៅឆ្នាំ 2023 អ្នកវិទ្យាសាស្ត្របានព្រមានអំពីការប្រែប្រួលអាកាសធាតុ។ អាកាសធាតុឆ្នាំនេះត្រូវបានគេរំពឹងថានឹងក្តៅជាងឆ្នាំមុន ដោយសារតែការមកដល់នៃ ‘El Niño’។ El Niño គឺជាគំរូអាកាសធាតុ (climate pattern) ដែលពណ៌នាអំពីការឡើងកម្តៅមិនធម្មតានៃផ្ទៃទឹកនៅមហាសមុទ្រប៉ាស៊ីហ្វិកខាងកើត។ គំរូអាកាសធាតុនេះ បានធ្វើឱ្យអាកាសធាតុពិភពលោកកាន់តែក្តៅ។ កត្តាមួយទៀតដែលជាមូលហេតុក្នុងការផ្លាស់ប្តូរអាកាសធាតុនេះគឺឧស្ម័នផ្ទះកញ្ចក់ដែលបញ្ចេញដោយសកម្មភាពរបស់មនុស្សលោក។
ថ្មីៗនេះឧស្ម័នផ្ទះកញ្ចក់បានជំរុញឱ្យសីតុណ្ហភាពមធ្យមរបស់សកលលោកកើនឡើងប្រហែល 1.2 អង្សាសេ។ អាស៊ីអាគ្នេយ៍យើងនឹងប្រឈមមុខនឹងបញ្ហាប្រឈមពីរគឺយើងត្រូវសម្របខ្លួនទៅនឹងការប្រែប្រួលអាកាសធាតុដែលបង្កឡើងដោយឧស្ម័នផ្ទះកញ្ចក់ដែលបញ្ចេញអស់ជាច្រើនទសវត្សដោយប្រទេសដែលមានសេដ្ឋកិច្ចជឿនលឿន និងថ្មីៗនេះដោយប្រទេសកំពុងអភិវឌ្ឍដូចជាប្រទេសចិន និងឥណ្ឌា។ ទីពីរគឺយើងក៏ត្រូវតែផ្លាស់ប្តូរយុទ្ធសាស្រ្តអភិវឌ្ឍន៍ថ្មីក្នុងការរួមចំណែកទប់ស្កាត់និងកាត់បន្ថយ ឧស្ម័នផ្ទះកញ្ចក់ ។ ថ្ងៃនេះ admin ចង់ណែនាំពីរបៀបមើល និងការពារខ្លួនអ្នកក្នុងអាកាសធាតុដ៏ក្តៅនេះ។
មនុស្សដែលអាចមានហានិភ័យពីកម្តៅខ្លាំងជាងអ្នកដទៃ
អាកាសធាតុក្តៅអាចប៉ះពាល់ដល់មនុស្សគ្រប់គ្នា រួមទាំងក្មេង និងអ្នកមានសុខភាពល្អផងដែរ។ ប៉ុន្តែមានមនុស្សមួយក្រុមអាចនឹងងាយរងហានិភ័យខ្ពស់ជាងអ្នកដទៃ រួមមាន៖
- អ្នកមានអាយុលើសពី 65 ឆ្នាំឡើង
- អ្នកមានជម្ងឺដូចជា ជំងឺបេះដូង ទឹកនោមផ្អែម តម្រងនោម ស្ត្រីមានផ្ទៃពោះ និងម្តាយបំបៅដោះកូន
- ទារកនិងកុមារតូចៗ
- មនុស្សធាត់ ឬលើសទម្ងន់
- អ្នកដែលធ្វើការ ឬហាត់ប្រាណនៅខាងក្រៅច្រើន
- អ្នកដែលថ្មីៗនេះទើបតែមកពីប្រទេសដែលមានអាកាសធាតុត្រជាក់
របៀបទប់ទល់នឹងកម្តៅ
ក្នុងអំឡុងពេលដែលអាកាសធាតុក្តៅខ្លាំង អ្នកគួរចងចាំជានិច្ចថា:
- ត្រូវ ទទួលទានទឹក ដើម្បីរក្សាជាតិទឹកឱ្យបានគ្រប់គ្រាន់
- រក្សាខ្លួនអ្នកឱ្យត្រជាក់ដោយប្រើកន្សែងសើមនិងងូតទឹកត្រជាក់ ។
- ត្រូវបិទបាំងពន្លឺព្រះអាទិត្យនៅផ្ទះនៅពេលថ្ងៃដោយបិទវាំងនន បើកបង្អួចពេលមានខ្យល់ត្រជាក់ សីតុណ្ហភាពខាងក្រៅត្រជាក់ជាងខាងក្នុង ហើយបើវាមានសុវត្ថិភាពក្នុងការធ្វើដូច្នេះ។
- ត្រូវនៅឲ្យឆ្ងាយពីព្រះអាទិត្យក្នុងពេលដែលអាកាសធាតុក្តៅខ្លាំង ប្រសិនបើអ្នកត្រូវចេញទៅខាងក្រៅគួរពាក់មួក និងលាបឡេការពារកម្តៅថ្ងៃ ស្នាក់នៅក្នុងម្លប់តាមដែលអាចធ្វើទៅបាន។
- ស្លៀកសម្លៀកបំពាក់ស្តើងមិនក្រាស់ពេក និងកាន់តែប្រសើរបើទាំងអស់គ្នាអាចស្លៀកសម្លៀកបំពាក់ធ្វើពីកប្បាស
- ញ៊ាំអាហារឬបន្លែផ្លែឈើដែលសម្បូរជាតិទឹកឱ្យបានច្រើន ដូចជាសាឡាត់ជាដើម
- ត្រូវប្រាកដថាអាហារគឺត្រូវបានរក្សាទុកក្នុងទូទឹកកកឱ្យបានត្រឹមត្រូវ។
- សម្រាកឱ្យបានច្រើន និងចៀសវាងសកម្មភាពធ្ងន់ៗក្រោមកម្តៅថ្ងៃ ដូចជាការហាត់កីឡា ជួសជុល និងថែសួន
- មើល អាន ឬស្តាប់របាយការណ៍ព័ត៌មាន ដើម្បីស្វែងយល់បន្ថែមក្នុងកំឡុងពេលក្តៅខ្លាំង និងនៅពេលដែលរលកកំដៅត្រូវបានព្យាករណ៍។
References:
https://www.imf.org/en/Publications/fandd/issues/2018/09/southeast-asia-climate-change-and-greenhouse-gas-emissions-prakash
https://www.betterhealth.vic.gov.au
