ដំណាំដែលអាចផ្តល់ចំណូលបានប្រចាំថ្ងៃ

ដំណាំដែលអាចប្រមូលផលបានពេញមួយឆ្នាំឬប្រមូលផលបានប្រចាំថ្ងៃគឺជាដំណាំទាំងឡាយណាដែលអាចមានលទ្ធិភាពផ្លែផ្កា ១២ខែជាដើម។ ដំណាំទាំងអស់នេះបានបង្កើនចំណូលជាច្រើនសម្រាប់កសិករ និងអាចបំពេញនូវតម្រូវការប្រចាំថ្ងៃផងដែរ។ នៅក្នុងអត្ថបទនេះនឹងនិយាយអំពីដំណាំដែលអាចផ្តល់ផលពេញមួយឆ្នាំ និងលក្ខខណ្ឌដាំដុះ។

ក្រូចឆ្មារ

ជាដំណាំផ្លែមួយប្រភេទដែលគេនិយមបរិភោគស្ទើរតែមានគ្រប់មុខម្ហូបខ្មែរយើង។ ម្យ៉ាងទៀតវាមានតម្លៃខ្ពស់ និងមានតម្រូវការប្រចាំថ្ងៃនៅក្នុងទីផ្សារ។ ក្រូចឆ្មារត្រូវការលក្ខខណ្ឌអាកាសធាតុដូចជា៖

• ដី៖ ក្រូចឆ្មារអាចលូតលាស់ល្អនៅលើដីដែលមានលំហូរទឹកល្អ មិនជាំទឹក និងលិចទឹកនៅរដូវវស្សា។
• សីតុណ្ហភាព៖ 13-38 oC
• ខ្យល់៖ វាត្រូវការខ្យល់តិចព្រោះខ្យល់ខ្លាំងអាចប៉ះពាល់ទៅដល់ផ្កា ធ្វើឲ្យមានស្លាកស្នាមផ្លែ និងទិន្នផល។
• សំណើម៖ 80-90%
• pH៖ 2-3
• ទឹក៖ វាជាដំណាំដែលត្រូវការទឹកច្រើន ហើយទឹកដែលល្អបំផុតជាប្រភេទទឹកហូរ

ខ្នុរ

ជាដំណាំឈើហូបផ្លែមួយប្រភេទដែលអាចកែច្នៃទៅបង្អែម បរិភោគជាផ្លែឈើ និងខ្នុរខ្ចីសម្រាប់ធ្វើជាសម្លរជាច្រើនមុខផងដែរ។ លក្ខខណ្ឌអាកាសធាតុដែលវាត្រូវការសម្រាប់ផ្តល់ទិន្នផលពេញមួយឆ្នាំរួមមាន៖

• ដី៖ វាជាដំណាំដែលមិនរើសដីឡើយ ប៉ុន្តែវាត្រូវការដីដែលមានប្រព័ន្ធបង្ហូរទឹកល្អ មិនជាំឬលិចទឹករយៈពេលយូរ។
• សីតុណ្ហភាព៖ 24-35 oC
• សំណើម៖ 60-80%
• pH៖ 5.5
• ទឹក៖ វាជាដំណាំដែលធន់នឹងអាកាសធាតុក្ដៅ និងមិនសូវមានទឹកគ្រប់គ្រាន់

ដូង

ដូងជាដំណាំមួយដែលមានតម្រូវការប្រចាំថ្ងៃ ហើយវាមានតម្លៃយ៉ាងល្អនៅក្នុងទីផ្សារមិនថាដូងខ្ចីឬដូងទុំឡើយ។ ដូងអាចផ្តល់ផ្លែបានពេញមួយឆ្នាំប្រសិនបើវាដាំដុះនៅក្នុងលក្ខខណ្ឌអាកាសធាតុ៖

• ដី៖ អំណោយផលសម្រាប់ប្រភេទដីខ្សាច់ ដីមិនលិចទឹកយូរ មានប្រព័ន្ធបង្ហូរទឹកបានល្អ និងមានpH 5-6 ។
• សីតុណ្ហភាព៖ 28-38 oC
• សំណើម៖ មានសំណើមចន្លោះ 60-80% ប៉ុន្តែបើសំណើមក្រោម 60% ដូងនឹងមិនទទួលបានទិន្នផលខ្ពស់ទេ និងកាន់តែកាត់បន្ថយអាយុរបស់វាផងដែរ។
• ពន្លឺ៖ វាជារុក្ខជាតិដែលត្រូវការពន្លឺខ្ពស់(2000ម៉ោង/ឆ្នាំ)។

ឫស្សី

ឫស្សីជាដំណាំមួយដែលគេអាចយកមកប្រើប្រាស់ទៅលើដើម និងទំពាំង។ ហើយឫស្សីដែលប្រជាជនខ្មែរចូលចិត្តបរិភោគរួមមានឫស្សីស្រុកចិន ទំពាំងផ្អែម។ល។ ឫស្សីអាចផ្តល់ទំពាំងបានពេញមួយឆ្នាំលុះត្រាតែវាមានលក្ខខណ្ឌទាំងអស់នេះ៖

• ដី៖ ជាប្រភេទដីដែលផុសល្អ មិនជាំទឹកពេក(គេអាចពូនដីកំប៉ុស្តិ៍នៅតាមគុម្ពឫស្សីដើម្បីបង្កើនការដុះទំពាំង)
• សីតុណ្ហភាព៖ 28-38 oC
• សំណើម៖ 75-85%
• pH៖ 5-6.5
• ទឹក៖ ឫស្សីត្រូវការទឹកឲ្យបានគ្រប់គ្រាន់ដើម្បីអាចមានលទ្ធិភាពបង្កបង្កើនទំពាំង

ឯកសារយោង

• https://www.acsgarden.com/articles/plants/citrus-growing
• https://kaksekam-time.com
• https://pubmed.ncbi.nlm.nih.gov
• https://greg.app/common-bamboo