អត្ថប្រយោជន៍នៃការប្រើប្រាស់ប្រព័ន្ធទឹកAWDចំពោះដំណាំស្រូវ

ជាទូទៅដំណាំស្រូវគឺជាដំណាំគោលមួយប្រភេទដែលប្រជាជនកម្ពុជាពេញនិយមក្នុងការដាំដុះ។ ទន្ទឹមនឹងនេះស្រូវជារុក្ខជាតិម្យ៉ាងត្រូវការទឹកដើម្បីអាចលូតលាស់ និងបង្កបង្កើនផល។ ប៉ុន្តែនាពេលបច្ចុប្បន្ននេះការដាំដុះស្រូវត្រូវបានគំរាមកំហែងដោយសារគ្រោះរាំងស្ងួត និងមិនសូវមានទឹកគ្រប់គ្រាន់សម្រាប់ការដាំដុះតាមបែបបច្ចេកទេសកសិករ។ ដោយឡែកនៅក្នុងអត្ថបទនេះបានសរសេរឡើងដើម្បីនិយាយអំពីប្រព័ន្ធធារាសាស្ត្រដែលអាចជួយកាត់បន្ថយនៃការប្រើប្រាស់ទឹកតិចជាងមុន និងវិធីសាស្ត្រក្នុងការអនុវត្តន៍ផងដែរ។

អ្វីទៅជាប្រព័ន្ធទឹកAWD?

AWDមានពាក្យពេញ Alternate Wetting and Drying គេសំដៅទៅលើមធ្យោបាយសន្សំសំច័យទឹកសម្រាប់ការដាំដុះដំណាំស្រូវ។ ម្យ៉ាងទៀតវាជាការផ្គត់ផ្គង់ទឹកតាមបែបពន្លិច និងផ្ដាច់ទឹកទៅតាមដំណាក់កាលនៃអាយុកាលរបស់ស្រូវផងដែរ។ ហើយវាមានភាពខុសគ្នាពីការដាក់ទឹកក្នុងស្រែតាមបែបប្រពៃណី(ឬទម្លាប់កសិករ)ព្រោះវាមានការកំណត់ និងតាមដានបរិមាណទឹកច្បាស់លាស់ជាងការបង្ហូរចូលស្រែតាមវិធីធម្មតា។ តួយ៉ាងមានប្រទេសជាច្រើនបានអនុវត្តន៍តាមវិធីAWD ដែលប្រទេសទាំងនោះរួមមាន៖ ចិន ថៃ ហ្វីលីភីន អាមេរិក និងប្រទេសដទៃទៀត។

អត្ថប្រយោជន៍នៃប្រព័ន្ធទឹកAWD

• ប្រើប្រាស់ទឹកតិចជាងការធ្វើស្រែធម្មតាឬCF
• កាត់បន្ថយចំណាយ
• កាត់បន្ថយការបំពុលបរិស្ថាននៃឧស្ម័នផ្ទះកញ្ចក់
• AWD អាចជួយការពារការប្រមូលផ្តុំនៃសារធាតុពុល និងជំរុញសកម្មភាពអតិសុខុមប្រាណដែលមានប្រយោជន៍នៅក្នុងដី
• បង្កើនទិន្នផលស្រូវខ្ពស់ជាងមុន

បច្ចេកទេសនៃការអនុវត្តន៍ប្រព័ន្ធទឹកAWD

• ដាក់បំពង់ដែលមានប្រវែង៤០cmហើយចោះប្រលោះតូចៗជុំវិញប្រវែង ១៥cmឬវែងជាងនេះដើម្បីងាយស្រួលមើលកម្ពស់នៃទឹកក្នុងស្រែ។ ចំពោះការចោះប្រលោះតូចៗគេត្រូវចោះទំហំ ០.៥cm និងគម្លាត ២cm ពីគ្នា ហើយត្រូវយកដើមឫស្សី ឬទុយោរមេធំៗ។(ដាក់វានៅជិតភ្លឺស្រែដើម្បីងាយមើលទឹក)។
• ពន្លិចទឹកឲ្យពេញស្រែនៅអាយុស្រូវចន្លោះ ០-២០ថ្ងៃ(សម្រាប់ស្រូវស្ទូង) ដោយឲ្យទឹកកម្ពស់ពីដី ៥cm។
• នៅពេលស្រូវអាយុ២០ថ្ងៃគេចាប់ផ្ដើមបាចជីអ៊ុយរ៉េលើកទី១ក្នុងកំឡុងពេលដែលដីស្ងួតដែលទឹកនៅក្រោមដីកម្ពស់១៥cm។
• នៅ២០ថ្ងៃ បន្ទាប់រហូតដល់ថ្ងៃទី២៨គេត្រូវធ្វើឲ្យទឹកមានការឡើងត្រឹម ៥cmពីលើដីហើយចុះដល់ ១៥cmក្រោមដី ធ្វើបែបនេះរហូតដល់ស្រូវចាប់ផ្ដើមផើមឬអាយុ ៦០ថ្ងៃ។
• គេត្រូវបាចជីម្ដងទៀតនៅពេលដែលស្រូវមានអាយុ ៦០ថ្ងៃ ហើយត្រូវពន្លិចស្រែក្នុងកម្ពស់ទឹក ៥cmពីដីរហូតដល់ថ្ងៃទី ៩៥ និងឈប់ពន្លិចស្រែរហូតដល់ពេលប្រមូលផលឬមួយវដ្តនៃស្រូវអាយុ ១២០ថ្ងៃ។

ចំណាំ៖ វិធីសាស្ត្រនេះអាចធ្វើបានតែចំពោះរដូវប្រាំង និងរដូវវស្សាប៉ុន្តែនៅរដូវប្រាំងងាយស្រួលក្នុងការគ្រប់គ្រងទឹកជាង ហើយប្រើជាឧទារហរណ៍សម្រាប់ស្រូវមិនប្រកាន់រដូវ។

រូបភាពបំពង់កប់ក្នុងស្រែ

ឯកសារយោង

• https://www.semanticscholar.org
• https://youtu.be/