ដូងគឺជាដំណាំមួយប្រភេទដែលមានទីផ្សារខ្ពស់នៅក្នុងស្រុកព្រោះគេអាចទទួលទានបានទាំងខ្ចី និងចាស់។ ម្យ៉ាងទៀតគេអាចកែច្នៃបានជាច្រើនប្រភេទដូចជាសាប៊ូ ប្រេងដូង និងភេជ្ជៈផងដែរ។ ដើម្បីអាចទទួលបានទិន្នផល លឿន និងទិន្នផលខ្ពស់គេអាចជ្រើសរើសប្រភេទពូជដូងថៃដែលប្រើរយៈពេលខ្លីចន្លោះ ២-៣ឆ្នាំដោយក្នុងមួយដើមអាចផ្តល់ផ្លែពី ៨០-១០០ផ្លែ ហើយអាចប្រមូលផលបានពេញមួយឆ្នាំ។ ដូងនេះមានកម្ពស់ដើម ១-១.៥m ធាងស្លឹកប្រវែង ១.៥m និងមានអាយុកាល ២០-២៥ឆ្នាំ។
លក្ខខណ្ឌក្សេត្របរិស្ថាន
- ដី៖ អំណោយផលសម្រាប់ប្រភេទដីខ្សាច់ ដីមិនលិចទឹកយូរ មានប្រព័ន្ធបង្ហូរទឹកបានល្អ និងមានpH 5-6 ។
- សីតុណ្ហភាព៖ ២៧-២៩អង្សាសេ។
- សំណើម៖ មានសំណើមចន្លោះ ៦០-៨០% ប៉ុន្តែបើសំណើមក្រោម ៦០% ដូងនឹងមិនទទួលបានទិន្នផលខ្ពស់ទេ និងកាន់តែកាត់បន្ថយអាយុរបស់វាផងដែរ។
- ពន្លឺ៖ វាជារុក្ខជាតិដែលត្រូវការពន្លឺខ្ពស់(២០០០ម៉ោង/ឆ្នាំ)។
រដូវដាំដុះ
រដូវដែលអំណោយផលល្អសម្រាប់ដូងចន្លោះខែ ឧសភា-កក្កដា ដើម្បីឲ្យវាអាចទទួលបានទឹកភ្លៀងគ្រប់គ្រាន់។ គេអាចយកដូងណាដែលមានអាយុ ៦-៩ខែ ក្រោយបណ្ដុះ។
បច្ចេកទេសដាំ
ការរៀបចំដី៖ ត្រូវជីករណ្ដៅដាំមុន ៣ខែ ក្នុងទំហំ ៦០x៦០x៦០cm និងមានចន្លោះជួរ ៦x៦m ឬ ៧x៧m។ ដោយក្នុងរណ្ដៅត្រូវដាក់ជី កំប៉ុស្តិ៍:២០-២៥kg + P:១០០g + កាឡី(K):២០០g និងបំពេញដោយដី ១០-២០cmក្នុងរណ្ដៅ។
- របៀបដាំ៖ ៣ខែក្រោយរៀបចំរណ្ដៅគេត្រូវយកកូនដូងទៅដាំក្នុងរណ្ដៅដោយដាក់ជីទ្រាប់បាត P:០.៥kg រួចចាក់ដីពីលើជីស្ដើងៗ ហើយចាំដាក់កូនដូងចូល។
- ស្រោចទឹក៖ ប្រសិនបើភ្លៀងមិនត្រូវស្រោចទឹកទេ តែបើរដូវប្រាំងត្រូវស្រោចទឹកដើម្បីឲ្យឫសអាចលូតលាស់បាន ហើយមិនត្រូវស្រោចឲ្យចំផ្លែដូងទេជៀសវាងងាប់ដើម។ (ប៉ុន្តែដាំដោយជីកប្រឡាយត្រូវបង្ហូរទឹកចូលប្រឡាយនៅរដូវប្រាំង)។
| អាយុ | បរិមាណ/ដើមg | របៀបដាក់ |
| ១-២ឆ្នាំ | អាម៉ូញ៉ូមស៊ុលផាតឬSA:៤០០
P2O5:200
KCl:300 | ជីករណ្ដៅជម្រៅ ១៥-២០cm ទទឹង ៣០cm និង ចម្ងាយ ០.៥cm ពីឫស |
| ២-៤ឆ្នាំ | SA:៥០០
K:៦០០ | ជីករណ្ដៅជម្រៅ ១៥-២០cm ទទឹង ៣០cm និងចម្ងាយ ០.៧៥cmពីឫស |
| ៥ឆ្នាំឡើង | SA:៥០០
P:៥០០
KCL:១៤០០ | ជីករណ្ដៅជម្រៅ ១៥-២០cm ទទឹង ៣០cm និងមានចម្ងាយ ២mពីដើម |
តារាងបែងចែកនៃការដាក់ជី
- ក្នុងមួយឆ្នាំ ត្រូវបែងចែកបរិមាណជីខាងលើជា២ដង៖ លើកទី១៖ ដាក់នៅដើមរដូវវស្សាចាប់ពីខែមេសា-ឧសភា លើកទី២៖ ដាក់នៅចុងរដូវវស្សាចាប់ពីខែតុលា-វិច្ឆិកា។
- រៀងរាល់ឆ្នាំត្រូវបន្ថែមជីកំប៉ុស្តិ៍ ២០-២៦kg + ផេះផ្ទះបាយ ៧kg ឬ ផេះដូង ២-៣kg ដើម្បីជួយឱ្យដើមដុះលូតលាស់បានល្អ និងបង្កើនជីវជាតិដី។ (ប្រភេទដីដែលលើសអាសុីតត្រូវបន្ថែមកំបោរដើម្បីកាត់បន្ថយអាសុីត)។
អត្ថប្រយោជន៍
- ផ្លែខ្ចីអាចបរិភោគទឹក និងសាច់ ឬលាយជាមួយភេជ្ជៈ។
- ផ្លែចាស់អាចកោសយកសាច់សម្រាប់ធ្វើជាបង្អែម។
- ផ្លែទុំអាចកោសសាច់ច្របាច់យកខ្ទិះដើម្បីធ្វើជាបង្អែម ម្ហូប និងធ្វើជាប្រេងដូងសុខភាព។
- សំបកដូងទុំអាចយកទៅកិនជាស្រកីដូងម៉ត់សម្រាប់លាយជាមួយដីដាំដុំណាំ។
#ចំណាំ៖កសិករអាចរើសនូវប្រភេទដូងផ្សេងៗទៀតដើម្បីដាំ!
ឯកសារយោង
