វិធីដាំស្វាយកែវល្មៀត(1) 

ទាំងអស់គ្នាប្រាកដជាបានស្គាល់ស្វាយកែវល្មៀតដែលជាស្វាយដែលប្រជាជនយើងនិយមបរិភោគ និងដាំស្វាយប្រភេទនេះច្រើននៅក្នុងប្រទេសយើង។ តោះសម្រាប់ភាគ1នេះ admin សុំបង្ហាញពីរបៀបដាំស្វាយកែវល្មៀត ទឹកដីដែលសមប្រកបដាំ ការរៀបចំដីនិងការថែទាំ។

1. ទីកន្លែងសម្រាប់ដាំដុះ

ស្វាយកែវរមៀតជាដំណាំដែលងាយដាំស៊ាំនឹងតំបន់ដីស្ងួត ដីខ្សោះជីវជាតិជាដើម គេអាចដាំលើដីជាច្រើនប្រភេទប៉ុន្តែសមស្របបំផុតលើដីជិតប្រភពទឹក ដីមិនដក់ទឹក និងដីជម្រាល។

2. ការរៀបចំដីនិងរណ្តៅ

• ត្រូវពង្រាបដីឱ្យស្មើ(ជីកប្រព័ន្ធរំដោះទឹក) បើតំបន់ទំនាបត្រូវលើករង ឬពូនគល់ឱ្យខ្ពស់។
• ចាប់ផ្តើមកាប់រណ្តៅដាំនៅដើមរដូវភ្លៀងក្នុងកំឡុងខែឧសភា-មិថុនា។
• រណ្តៅមានទំហំ១ម៉ែត្របួនជ្រុងនិងជម្រៅកន្លះម៉ែត្រ។នៅបាតរណ្តៅនីមួយៗត្រូវដាក់ស្លឹកឈើស្រស់ដូចជាទន្រ្ទាន្នខេត្រជាន់ឱ្យណែនកម្រាស់៣តឹក លាមកគោស្ងួត២តឹក ដី១តឹកខាងលើបង្អស់។ក្រោយពីដាក់ជីហើយទុកចោលរយៈពេលមួយអាទិត្យដើម្បីឱ្យស្លឹកទន្រ្ទាន្នខេត្ររលួយ បន្ទាប់មកជ្រុំជ្រោយដីក្នុងរណ្តៅឱ្យសព្វទើបដាក់កូនស្វាយដាំ

3. ការដាំ 

• កូនស្វាយដែលបណ្តុះទុកមានអាយុពី៦ទៅ៧ខែ
• យកកូនស្វាយទៅកប់ដាំក្នុងរណ្តៅដែលបានត្រៀមទុក
• ដាំចន្លោះឃ្លាតពីគ្នាពីគុម្ពនីមួយៗ 5m*5m ឬ 8m*8m
• ក្រោយពីដាំហើយស្រោចទឹកឱ្យជោគ បន្ទាប់មកយកកម្ទេចកម្ទីស្លឹកឈើស្ងួតគ្របគល់ស្វាយដើម្បីកុំឱ្យហួតសំណើម។
• សម្អាតស្មៅជុំវិញគល់ឱ្យទៀងទាត់
• ដោតឈើជន្លង់ចងផ្អោបនឹងកូនដើម និងការពារកំដៅថ្ងៃខ្លាំង
• រៀបចំប្រព័ន្ធទឹកស្រោចស្រពដំណាំឱ្យបានគ្រប់គ្រាន់

4. ការថែទាំ

• ក្រោយពីដាំហើយត្រូវចាប់ផ្តើមស្រោចទឹកមួយថ្ងៃម្តង រហូតដល់ស្វាយលាស់ត្រួយថ្មី ទើបបន្ថយការស្រោចទឹកមកនៅត្រឹមមួយអាទិត្យម្តង។
• នៅពេលស្វាយមានអាយុពី 1-2ឆ្នាំ ត្រូវជីកចង្អូរជារង្វង់នៅជុំវិញដើមចម្ងាយពីដើមប្រហែលមួយមែត្រទៅមួយមែត្រកន្លះ។ជម្រៅចង្អូរ២តឹករួចដាក់ស្លឹកឈើស្រស់និងលាមកគោក្នុងចង្អូររួចលុបដីនិងស្រោចទឹក។
• ក្រៅពីដាក់ជីស្រោចទឹកត្រូវជម្រះស្មៅនៅក្បែរគល់និងចន្លោះរោង។
• ការបន្ថែមជីត្រូវធ្វើឡើងរៀងរាល់ឆ្នាំ ហើយជីកចង្អូរនៅជុំវិញដើម និងដាក់ជីចូលក្នុងចង្អូរនោះ។