តោះ!មកដឹង៣ចំណុចនេះសិនមុននឹងដាំផ្លែស្ត្របឺរី

ផ្លែស្ត្របឺរីនេះគឺភាគច្រើនមានដាំនៅតែក្រៅប្រទេសជាពិសេសប៉ែកអុឺរ៉ុបដែលជាប្រទេសដែលមានអាកាសធាតុត្រជាក់ ពីព្រោះផ្លែស្រ្តបឺរីនេះគឺត្រូវការអាសធាតុត្រជាក់ដើម្បីដាំដុះ។ដោយឡែកបច្ចុប្បន្ននេះយើងឃើញមានបណ្តាតំបន់អាស៊ីយើងក៏មានដាំដុះនៅផ្លែស្រ្តបឺរីនេះផងដែរដូចជាប្រទេសកូរ៉េ ចិន វៀតណាមនិងរួមទាំងប្រទេសកម្ពុជាយើងផងដែរ។

នៅប្រទេសកម្ពុជាយើងគឺមានខេត្តចំនួន២ដែលកំពុងដាំដុះនូវផ្លែស្ត្របឺរីនេះគឺខេត្តមណ្ឌលគិរី និងខេត្តកំពតនៅលើភ្នំបូកគោ។យោងតាមព័ត៌មានចុះកាលពីឆ្នាំ2022បានផ្សាយថាក្រុមហ៊ុនកូរ៉េកំពុងវិនិយោគដើម្បីធ្វើការសាកល្បងដាំផ្លែស្រ្តបឺរីលើទីក្រុងបូកគោ។

ដោយឡែកផ្លែស្ត្របឺរីគឺមានតម្រូវការខ្ពស់នៅពេលធ្វើការដាំដុះនិងថែរក្សាវា ដូច្នេះមុននឹងដាំផ្លែឈើនេះយើងគួរមកដឹងពីចំណុចទាំង៣នេះពីផ្លែស្ត្របឺរីនេះសិន:

ចំណុចទី១: តម្រូវការអាកាសធាតុ

• ស្រ្តបឺរីជាដំណាំត្រូវការអាកាសធាតុត្រជាក់
• តម្រូវការសីតុណ្ហភាពរបស់ស្ត្របឺរីខុសគ្នាទៅតាមដំណាក់កាលលូតលាស់
• ក្នុងដំណាក់កាលស្លឹកលូតលាស់ ពន្លកផ្កា ចេញផ្កា ចេញផ្លែ ផ្លែលូតលាស់ និងផ្លែទុំត្រូវការសីតុណ្ហភាពទាប
• ប៉ុន្តែដំណាក់កាលទាំងអស់នឹងត្រូវផ្អាកនៅសីតុណ្ហភាពក្រោម៣អង្សាសេ និងលើស៣០អង្សាសេ
• សីតុណ្ហភាពជាមធ្យមដែលសមស្របគឺពី១៧អង្សាសេទៅ២០អង្សាសេ
• នៅសីតុណ្ហភាព២០អង្សាសេស្លឹកមួយលូតលាស់រៀងរាល់៧ថ្ងៃ បើសីតុណ្ហភាពក្រោមនេះរយៈពេលលូតលាស់នឹងវែងជាងនេះ។
• ការធ្វើរស្មីសំយោគខ្ពស់នៅសីតុណ្ហភាព ២០ទៅ២៥អង្សាសេ
• នៅសីតុណ្ហភាព២០អង្សាសេគ្រាប់លំអងបង្កកំណើតបានល្អ។

ចំណុចទី២: តម្រូវការដីនិងទឹក

• អាចដុះលូតលាស់បាននៅលើដីច្រើនប្រភេទ
• វាធន់ទ្រាំទៅនឹងដីអាស៊ីត ដូចនេះវាអាចលូតលាស់បាននៅលើដីដែលមាន Ph5 ឬអាចច្រើនជាងនេះ
• ការលូតលាស់របស់ស្រ្តបឺរីងាយប៉ះពាល់ដោយសារដីស្ងួតខ្លាំងនិងអុកសុីសែនក្នុងដីតិច
• ដូចនេះការដាំដុះស្រ្តបឺរី ចាំបាច់ត្រូវធ្វើឱ្យដីតំបន់ឬសលូតលាស់សំបូរទៅដោយអុកសុីសែននិងជក់ទឹកបានល្អ
• ស្រ្តបឺរីក៏ងាយទទួលរងខ្លោចស្លឹក ដោយសារកង្វះកាល់ស្យូម អតុល្យភាពសារធាតុចិញ្ចឹម សំណើមដី
• ដូចនេះការគ្រប់គ្រងដីគឺមានសារៈសំខាន់ណាស់ក្នុងការដាំផ្លែស្រ្តបឺរីឱ្យបានល្អ។

ចំណុចទី៣: ពេលប្រមូលផល

• យើងអាចប្រមូលផលស្រ្តបឺរីបានក្នុងរយៈពេលពី៥០ទៅ៦០ថ្ងៃបន្ទាប់ពីចេញផ្កា
• ការប្រមូលផលត្រូវធ្វើនៅពេលព្រឹក
• ភាពរឹងនៃសាច់ថយចុះបន្ទាប់ពីប្រមូលផល។

ឯកសារយោង: បណ្ណាល័យអេឡិចត្រូនិចក្រសួងកសិកម្ម។