លក្ខណ:ទូទៅ
ស្ពៃចង្កឹះជាដំណាំបន្លែមួយប្រភេទ ក្នុងចំណោមបន្លែស្លឹកជាច្រើនដែលកសិករយើង និយមចូលចិត្តដាំព្រោះវាជា បន្លែសាមញ្ញ មួយអាចយកមកប្រើប្រាស់ ក្នុងការធ្វើម្ហូបអាហារបានច្រើនមុខដូចជា ៖ ស្ល ឆា ស្ងោរ ជ្រក ។ ដំបូងឡើយគេច្រើនតែដាំវានៅក្នុងសួនបន្លែ លក្ខណៈ គ្រួសារតូចៗ តែបច្ចុប្បន្នស្ពៃចង្កឹះបានក្លាយទៅជាប្រភេទបន្លែ យ៉ាងពេញនិយមធ្វើឲ្យ នៅរដូវត្រជាក់វាលូតលាស់បានល្អជាងរដូវក្តៅ ហើយពុំសូវមានសត្វល្អិតចង្រៃស៊ីបំផ្លាញ ទៀតផង។
ប្រភេទបន្លែនេះអាចលូតលាស់បានលើដីគ្រប់ប្រភេទដូចជា ដីខ្មៅ ដីក្រហម ដីល្បាយ ខ្សាច់ និងដីល្បាប់តាមមាត់ទន្លេព្រែក បឹង និងស្ទឹង ។ ស្ពៃចង្កឹះ វាផ្ទុកទៅដោយសារធាតុចិញ្ចឹមជាច្រើនដូចជា ប្រូតេអ៊ីន វីតាមីន អា បេ សេ ព្រមទាំងជាតិរ៉ែផ្សេងៗទៀតដូចជា កាល់ស្យូម ដែក ផូស្វ័រ ប៉ូតាស្យូម ជាដើម។ លើសពីនេះស្ពៃចង្កឹះ ជួយពង្រឹងប្រព័ន្ធភាពស៊ាំរាងកាយ ជួយថែរក្សាស្បែកឲ្យមានសុខភាពល្អ ជួយថែរក្សាសុខភាពស្បែក ជួយសម្រួលដល់ការរំលាយអាហារ ជួយកាត់បន្ថយទម្ងន់ ជួយកាត់បន្ថយហានិភ៏យនៃជំងឺពុកឆ្អឹង ជួយកាត់បន្ថយហានិភ័យនៃជំងឺបេះដូងជាដើម។។ល។
ខាងក្រោមនេះ គឺជាវិធីសាស្រ្តក្នុងការដាំដុះ ស្ពៃចង្កឹះ៖
ការជ្រើសគ្រាប់ពូជ
- ត្រូវការស្គាល់ពូជ ឲ្យបានច្បាស់លាស់មុនធ្វើការដាំដុះ
- នៅប្រទេសកម្ពុជាយើង លក្ខខណ្ឌអាចទុកពូជបានគឺ នៅរដូវប្រាំងហើយចំពោះរដូវវស្សាការទុកពូជមិនអាចធ្វើទៅបានទេព្រោះទឹកភ្លៀង និងអាកាសធាតុមានឥទ្ធិពលអាក្រក់ដល់ការបន្តពូជរបស់ស្ពៃ។
គ្រាប់ពូជ ដែលត្រូវជ្រើសរើសយកមកដាំ ត្រូវមានលក្ខណៈដូចខាងក្រោម ៖
- ដុះលូតលាស់សមស្រប នឹងតំបន់ផលិត ហើយមិនប្រកាន់រដូវ
- ផ្តល់ទិន្នផលខ្ពស់ រយៈពេលលូតលាស់ខ្លី
- ពេញនិយម ក្នុងការប្រើប្រាស់លើទីផ្សារ
- ធន់ទ្រាំនឹងជម្ងឺ សត្វល្អិតបំផ្លាញ
- គ្រាប់ពូជសុទ្ធគ្មានជម្ងឺ សត្វល្អិតបំផ្លាញ ភាគរយដំណុះខ្ពស់
ការរៀបចំដី
- ប្រភេទបន្លែនេះអាចលូតលាស់បានលើដីគ្រប់ប្រភេទដូចជា ៖ ដីខ្មៅ ដីក្រហម ដីល្បាយ ខ្សាច់ និងដីល្បាប់តាមមាត់ទន្លេ ព្រែក បឹង និងស្ទឹង ។
- ជាពិសេសដីដែលសំបូរទៅដោយជាតិ អាសូត ធ្វើឲ្យដំណាំបន្លែដុះលូតលាស់លឿន ទទួលបានទិន្នផលខ្ពស់។
- ដំណាំបន្លែ ទាមទារការរៀបចំដីឲ្យបានល្អ គឺដីស្ងួតភ្ជួរអោយបានជ្រៅ រាស់បំបែកដី ឲ្យម៉ត់ ធ្វើយ៉ាងណាឲ្យដីធូរ ងាប់ស្មៅចង្រៃ និងសត្វល្អិតរស់នៅក្នុងដី ។
- កាលណារៀបចំដី មិនបានត្រឹមត្រូវ បណ្តាលឲ្យកើតជម្ងឺ និងសត្វល្អិតបំផ្លាញច្រើនជានិច្ចជាកាលដំណាំប្រភេទ នេះត្រូវការទឹកជាប្រចាំ ដូចនេះចំការស្ពៃត្រូវមានប្រភពទឹកគ្រប់គ្រាន់ សម្រាប់ស្រោចស្រព ទោះជាតំបន់ទំនាប វាលរាប និងខ្ពង់រាបក៏ដោយ។
ក.ការរៀបចំថ្នាលសាបកូន
–ការធ្វើថ្នាលសាបកូន រដូវប្រាំង ៖ យើងត្រូវជ្រើសរើសដីមានជីជាតិល្អ ឆ្ងាយពីម្លប់ឈើ ស្ថិតនៅក្បែផ្ទះ និងមានរបងការពារត្រឹមត្រូវ។ ដំបូងត្រូវភ្ជួរ និងកាប់ដីឲ្យជ្រៅហាលដីឲ្យស្ងួត រយៈពេលពី ៣ទៅ ៧ថ្ងៃ ក្រោយពីដីស្ងួតហើយត្រូវវាយ ឬរាស់បំបែកដីឲ្យម៉ត់លើកជាថ្នាល ដែលមានទទឹងពី ៦០ ទៅ៨០ស.ម កម្ពស់ពី១០ទៅ១៥ ស.មបណ្តោយផ្អែកទៅតាមស្ថានភាព ជាក់ស្តែងរបស់ដី ចន្លោះថ្នាលពី ៣០ ទៅ៤០ស.ម កៀរពង្រាបដីឲ្យស្មើល្អធានារក្សាសំណើម បានយូរ ធ្វើឲ្យកូនស្ពៃលូតលាស់ស្មើគ្នាល្អ។
–ការធ្វើថ្នាលសាបកូន នៅរដូវវស្សា ៖ មិនខុសពីរដូវប្រាំងឡើយ តែយើងត្រូវរកទីកន្លែង ទួលខ្ពស់មិនជាំទឹក ក្រោយពេលភ្លៀងត្រូវភ្ជួរ ឬ កាប់ដីហាលឲ្យបានយូរថ្ងៃ ជាងរដូវប្រាំង ហើយត្រូវមានគំរបការពារភ្លៀងគ្របដីឲ្យស្ងួតចន្លោះពី៧ថ្ងៃ ជ្រួយដីហាលឲ្យបានច្រើនសារ បន្ទាប់មកលើកជារងឲ្យបានខ្ពស់ពី១៥ ទៅ២០ស.ម ទទឹងពី៨០ទៅ១០០ស.ម ចន្លោះពីថ្នាល មួយទៅថ្នាលមួយ ពី ៣០ ទៅ ៤០ ស.ម ថ្នាលសាបកូនត្រូវកៀរដីឲ្យបានស្មើរមាន ប្រឡាយបញ្ចេញទឹក។
ខ.ការរៀបចំដីសម្រាប់ស្ទូង
នៅរដូវស្សា
– ការរៀបចំថ្នាលសម្រាប់ស្ទូង គឺត្រូវភ្ជួរដីឲ្យបានជម្រៅពី១៥ ទៅ២០ ស.ម ហើយហាលដីឲ្យស្ងួតរយៈពេលពី ៥ ទៅ ៧ថ្ងៃ ទើបរាស់បំបែកដីប្រមូលយកស្មៅចេញ បន្ទាប់មកហាលដីឲ្យបាន ២ ទៅ ៣ថ្ងៃ។ ក្រោយមកទៀតភ្ជួរប្រែដី ហាលឲ្យបានរយៈពេល ៣ ទៅ៥ ថ្ងៃ ទើបរាស់ និងកៀរឲ្យស្មើល្អ។
-របៀបលើករង ៖ គេលើករង ដោយប្រើនង្គ័ល ឬគោភ្ជួរផ្គុំគ្នា។ ម្យ៉ាងទៀតលើកដោយប្រើចបឆាយតាមបណ្តោយខ្សែបន្ទាត់ ក្រោយពីភ្ជួរផ្គុំ ឬ លើកដោយចបហើយត្រូវកៀររងនីមួយៗឲ្យស្មើគ្នា ក្បាលរងត្រូវឲ្យត្រឹមគ្នាដែលមានទទឹងពី ៨០ ទៅ ១០០ ស.ម បណ្តោយជាការេល្អត្រូវមានប្រវែង ១០-២០ ម៉ែត្រ កម្ពស់រងពី ១៥ ទៅ ២០សម។
នៅរដូវប្រាំង
-ការរៀបចំដីស្ទូងនៅរដូវប្រាំង គឺធ្វើឡើងផ្សេងៗពីគ្នាទៅតាមប្រភេទដីនិងតំបន់ដាំដុះ នៅតំបន់ដីល្បាប់តាមមាត់ទន្លេ ក្រោយពីទឹកស្រកផុតដីចាប់ផ្តើមស្ងួត៥០%គេត្រូវភ្ជួរហាលដី ដោយនង្គ័ល គោ រយៈពេល ទៅ៥ថ្ងៃក្រោយមករាស់បំបែកឲ្យម៉ត់និងធ្វើឲ្យបានច្រើនលើកបន្ទាប់មកហាលដីរយៈពេល ២ ទៅ ៣ថ្ងៃ ឲ្យដីស្ងួតងាប់ស្មៅហើយប្រមូលយកស្មៅ និងសំរាមដុតចោល។ បន្ទាប់មកទៀតទើបភ្ជួរប្រែដីនិងរាស់ជាបន្តបន្ទាប់គឺឲ្យបានចំនួន ២ ទៅ៣ លើក ឲ្យម៉ត់ល្មម និងធ្វើឲ្យទឹកជ្រាបបានរហ័ស។ ចំពោះដីមិនលិចទឹកត្រូវរាស់ ប្រមូលយកស្មៅ និងកាកសំណល់ផ្សេងៗចេញ បន្ទាប់មកចាក់ផ្តើមភ្ជួរហាលដីឲ្យបាន ៣ ទៅ ៤ថ្ងៃ ក្រោយមកកិនបំបែកដីឲ្យម៉ត់ហើយរាស់ជ្រួយដីឲ្យធូរឡើងវិញទើបភ្ជួរប្រែដីនិងហាលដី ចោលរយៈពេល ៥ ទៅ ៧ថ្ងៃ។ នៅពេលដីស្ងួតចាប់ផ្តើមភ្ជួររាស់ដីឲ្យស្មើរចំនួន ២ ទៅ៣លើក បន្ទាប់មកចាប់ផ្តើមលើករង ដែលមានទទឹងនិងបណ្តោយដូចគ្នាទៅនឹងរដូវវស្សា ប៉ុន្តែកម្ពស់ រងពី ១០ទៅ១៥ស.ម រងនីមួយៗត្រូវមានសមភាពស្មើគ្នា។
បច្ចេកទេសដាំដុះ
ដំណាំស្ពៃចង្កឹះគេអាចដាំបានពី ២ វិធីគឺ ការសាបកូនហើយដកទៅស្ទូង និងការព្រួសដោយដាំគ្រាប់ផ្ទាល់ក៏បាន។
របៀបសាបគ្រាប់ពូជ
មុនពេលសាបគ្រាប់ពូជត្រូវយកជីកំប៉ុស្តិ៍ ឬជីលាមកសត្វចំនួន ២០ ទៅ ៣០ គ.ក្រ ទៅបាច លើថ្នាលដែលមានផ្ទៃដី ១០ទៅ១៥ម២រួចហើយយកជី១៥.១៥.១៥ ចំនួន២០០ក្រាម ឬប្រាំស្លាបបាយ និងថ្នាំFuradan 3H ចំនួន ៥០ក្រាម ទៅបាចពីលើថ្នាលហើយរាស់លុបទៅក្នុងដី ក្រោយមកស្រោចទឹកឲ្យជោគគ្រាប់ពូជត្រូវយកមកត្រាំជាមួយទឹកដែលបានលាយជាមួយថ្នាំ Captan ៥ក្រាម លាយជាមួយទឹក ១លីត្រ ត្រំារយៈពេល ១០នាទីបន្តាប់មកស្រង់ហាលគ្រាប់ឲ្យស្រស់ទឹកទើបយកទៅសាប។ ត្រូវប្រើគ្រាប់ពូជចំនួនពី១៥ទៅ១៦ក្រាម ឬ១សា្លបព្រាបាយ ក្នុងផ្ទៃដី ១០ម៉ែតការេ។ក្រោយសាបរួចហើយពង្រាយកំណាត់ចំបើងស្ងួតខ្លីៗ ឲ្យពេញលើថ្នាលហើយស្រោច ទឹកឲ្យជោគ ទើបគ្របស្លឹកចេកពីលើ បន្ទាប់មកស្រោចទឹករាស់ថ្ងៃ គឺមួយថ្ងៃ ២លើក(ព្រឹក ល្ងាច)។ រយៈពេលក្រោយសាបចំនួន២យប់ត្រូវបកស្លឹកចេកនោះចេញពេលនោះកូនស្ពៃ ចាប់ផ្តើមដុះ។
របៀបស្ទូង
ក្រោយពីសាបរយៈពេល ១៤ ទៅ១៦ថ្ងៃ កូនស្ពៃមានសន្លឹក ៣កម្ពស់ពី ៨ទៅ១០សម យើងអាចដកកូនស្ពៃទៅ ស្ទូងបាន ។ នៅមុនពេលដកកូនស្ពៃត្រូវស្រោចទឹកឲ្យជោគរយៈពេល ២០ ទៅ៣០នាទី ចំពោះថ្នាលសម្រាប់ស្ទួងដំបូងត្រូវយកជីធម្មជាតិពុកផុយល្អចំនួន២បង្គី ស្មើ នឹង៣០គក្រ ជី១៥-១៥-១៥ ចំនួន ២០ក្រាមស្មើនឹង២ខាំទៅបាចលើរងប្រវែង១០ទៅ១៥ ម ហើយរាស់លុបទៅក្នុងដី បន្ទាប់មកស្រោចទឹកឲ្យជោគទើបស្ទូងតាមក្រោយ។ ជាការល្អ ត្រូវស្ទូងពេលថ្ងៃរសៀលត្រជាក់។ រីឯចន្លោះគុម្ព និងចន្លោះជួរដែលត្រូវស្ទូងគឺ២៥X២៥សម ក្រោយស្ទូង ហើយត្រូវស្រោចទឹកឲ្យជោគ។ ដើម្បីបន្ថយកំដៅដីនិងការពារការហាប់ដីព្រមទាំងអាចរក្សាសំណើមដីបានយូរ ចំាបាច់ត្រូវពង្រាយចំបើងស្ងួតឲ្យសព្វល្អពីលើផ្ទៃរងហើយ ស្រោចទឹក ៣ ដងក្នុង១ថ្ងៃ ស្រោចក្នុងរយៈពេល៣ ថ្ងៃក្រោយស្ទូង។
របៀបដាំដោយសាបគ្រាប់ផ្ទាល់
- ក្រោយពីការរៀបចំរងហើយ ត្រូវយកជីកំប៉ុស្ត និងជី ១៥-១៥-១៥ ចំនួនដូចខាងលើ មកពង្រាយលើថ្នាល ហើយរោយថ្នាំ Furadan 3H ចំនួន ៣ ស្លាបព្រាបាយហើយរាស់លុបទៅក្នុងដី បន្ទាប់មកស្រោចទឹកឲ្យជោគ
- ចំពោះគ្រាប់ពូជដែលត្រូវយកមកព្រួសត្រូវព្រួសឲ្យ រង្វើលៗ ក្នុងកំរិតកន្លះស្លាបព្រាបាយ ស្មើនឹង ៨ ក្រាម លើផ្ទៃថ្នាល ១០ម៉ែត្រការ៉េ
- ក្រោយពីព្រួសហើយត្រូវពង្រាយកំណាត់ចំបើងស្ងួតពីលើទើបស្រោចទឹកតាមក្រោយ.
- ដើម្បីឲ្យកូនស្ពៃ ដុះស្មើគ្នាល្អ រយៈពេល២ទៅ៣ ថ្ងៃដំបូង ត្រូវស្រោចទឹក ៣ ដងក្នុង១ថ្ងៃ។
- ក្រោយពេល កូនស្ពៃដុះបានរយៈពេល ៧ទៅ១០ ថ្ងៃគេត្រូវដករំលោះកូនស្ពៃចេញខ្លះនៅត្រង់កន្លែង ដែលញឹកពេក គឺត្រូវរក្សាចំនួនដើមស្ពៃត្រឹមតែ ២០ ទៅ ២២ ដើម/ម៉ែត្រការ៉េ
ការថែទាំ
ការស្រោចស្រព
ការស្រោចស្រពអាចធ្វើបានច្រើនរបៀបគឺ ស្រោចដោយប៉ោតមួយថ្ងៃស្រោច២លើក(ព្រឹក-ល្ងាច) ដំណាំស្ពៃចង្កឹះមិនត្រូវការទឹកច្រើនពេកទេតែវាត្រូវការជាប្រចំារៀងរាល់ថ្ងៃ។ បច្ចុប្បន្នកសិករអាចស្រោចស្រពដោយម៉ាស៊ីនគឺ ដាក់ជំពួយផ្កាឈូកបាញ់ឲ្យជោគ១ថ្ងៃម្តង តែវីធីនេះធ្វើឲ្យដីឆាប់ហាប់កាលណាគេស្រោចដោយម៉ាស៊ីនបាញ់ចាំបាច់ត្រូវគ្របចំបើង ឲ្យក្រាស់។
កាដាក់ជី
- ស្ពៃចង្កឹះជាបន្លែដែលត្រូវការជាចាំបាច់នូវជីជាតិ អាសូត ផូស្វាត និងប៉ូតាស្យូមប៉ុន្តែ សេចក្តីត្រូវការនេះត្រូវបែងចែកទៅតាមដំណាក់កាលលូតលាស់របស់វា។
- ប្រភេទបន្លែស្លឹក ត្រូវការជាតិអាសូតច្រើនជាងគេ ដូច្នេះការដាក់ជីត្រូវធ្វើឡើងដោយអនុលោមទៅតាមប្រភេទ ដីអាយុកាល និងប្រភេទជី។
- ក្រោយសាបបានពី ១០ទៅ១២ថ្ងៃ ត្រូវយកជីអ៊ុយរ៉េចំនួន ១ស្លាបព្រាបាយ លាយទឹក២០លីត្រស្រោចលើផ្ទៃរង១០ទៅ១៥ម២ រយៈពេលមួយសប្តាហ៍ម្តងៗ។
ការសំអាតស្មៅជ្រួយដីពូនគល់
- ស្មៅជាកត្តាចង្រៃយ៉ាងច្រើនគឺ វាជាជម្រកសត្វល្អិត ដណ្តើមទឹក ពន្លឺ និងជីជាតិពីដំណាំ។
- ត្រូវដកស្មៅចេញដោយប្រើកូនចបតូចៗ រយៈពេលពី ៧ ទៅ ១០ថ្ងៃ ក្រោយ សាប ឬស្ទូង ត្រូវដកស្មៅជ្រុំជ្រួយដី ឲ្យធូរ ដើម្បីរក្សាសំណើមបានល្អ។
- អាយុកាល របស់ស្ពៃអ្នកអាចដកស្មៅចំនួន ២ទៅ ៣ លើក ។
- ចំពោះការជ្រំជ្រួយដីធ្វើឡើងតែមួយលើកតែប៉ុណ្ណោះ។
អំពី ជម្ងឺសំខាន់ៗ សត្វល្អិតបំផ្លាញ និងវិធានការការពារ
អំពីជម្ងឺសំខាន់ៗ
- ជម្ងឺដែលតែងតែកើតលើដំណាំស្ពៃចង្កឹះភាគច្រើនជាជម្ងឺផ្សិត និងជម្ងឺបាក់តេរី។ ជម្ងឺ នេះធ្វើឲ្យស្លឹកស្ពៃមានចំណុចអុចសៗហើយស្ងួតព្រមទាំងរលួយស្លឹកផ្នែកខាងលើក្រោយមក រីករាលពាសពេញផ្ទៃរង កូនស្ពៃជម្ងឺរលួយគល់ ស្ពៃដែលបណ្តាលមកពីបាក់តេរីភាគច្រើន ធ្វើឲ្យរលួយធាងស្ពៃក្បែរដីនិងគល់។ លក្ខខណ្ឌដែលបណ្តាលឲ្យកើតជម្ងឺនេះគឺអាកាសធាតុ ក្តៅខ្លាំង ដីសើម ភ្លៀងធ្លាក់ច្រើន។
វិធានការការពារ និងកំចាត់
ត្រូវស្ទូងឲ្យរង្វើល ហាលដីឲ្យស្ងួតមុននឹងស្ទូងលាយថ្នាំនឹងគ្រាប់ពូជ មុនពេល សាប ដក ចោលហើយបាញ់ថ្នាំផ្សិតប្រភេទ Captan ឬBenomy1 កំរិតប្រើពី ២០ ទៅ ២៥ ក្រាម លាយទឹក ១៥ ទៅ ២០ លីត្រ មួយសប្តាហ៍ បាញ់ ២ដងហើយបន្ថយការ ស្រោចទឹកនិង ដាក់ជី ។
សត្វល្អិតបំផ្លាញ
- ដង្កូវយោលទោង ៖ ដង្កូវប្រភេទនេះជាសត្រូវបំផ្លាញយ៉ាងខ្លាំងចំពោះដំណាំអំបូរស្ពៃជាពិសេសនៅរដូវ ប្រាំចាប់ពីខែធ្នូ ឬខែកុម្ភៈ រហូតដល់ខែមេសា។ វាស៊ីក្លរូភីល ដោយទុកតែភ្នាសសៗពេញ លើផ្ទៃស្លឹក មេអំបៅ វាតែងចេញមកពងនៅពេលយប់ នៅផ្នែកខាងលើស្លឹករយៈពេល២០ ទៅ ២៥ម៉ោង វានឹងញាស់បន្ទាប់មកចាប់ផ្តើមស៊ីបំផ្លាញ។
- សត្វចាគូ ៖ ដំបូងជាមេចំណាស់ ពងដាក់លើដី ក្បែរគល់ដំណាំ ក្រោយពីពងរយៈពេល៣៥ទៅ ៤២ម៉ោងវានឹងញាស់ហើយចាប់ផ្តើមស៊ីឫសស្ពៃនៅក្នុងដីជាដំណាក់កាលដង្កូវរយៈពេល ១សប្តាហ៍ក្រោយមកវាចាប់ផ្តើមញាស់ទៅជាសត្វចាគូហើយហើរជាហ្វូងៗមកចោះជញ្ជក់ ស្លឹកធ្វើឲ្យស្លឹកស្ពៃធ្លុះលែងលូតលាស់។ លក្ខណៈរូបរបស់វាមានមាឌតូចស្លាបពណ៌ស ឬ លឿងអមបណ្តោយស្លាបប្រវែងមិនលើសពី២ម.ម។
- ដង្កូវកាត់ដើម ៖ មេអំបៅហើរពងដាក់គែមស្លឹក ក្បែរដី ក្រោយពីវាញាស់កូនដង្កូវទម្លាក់ខ្លួនចូលទៅក្នុង ដីនៅពេលយប់ ដង្កូវចេញពីដីហើយកាត់បំផ្លាញគល់ស្ពៃឬស្លឹកស្ពៃ។ ការបំផ្លាញរបស់ដង្កូវ ប្រភេទនេះធ្វើឲ្យបាត់បង់ចំនួនដើមជាច្រើនក្នុងមួយថ្នាលៗ។
- ចៃបៃតង ៖ ចៃប្រភេទជញ្ជក់យករុក្ខរសពីស្លឹកស្ពៃ ធ្វើឲ្យស្ពៃរួញលែងលូតលាស់។ សញ្ញាសំគាល់ នៅពេលមានចៃនៅក្នុងចំការគឺ មានស្រមោចឡើង។
វិធានការណ៍
- ត្រូវជ្រើសរើសរដូវដំាដុះរៀបចំឲ្យបានល្អកំចាត់ ស្មៅស្រោចទឹកជាប្រចំាស្ទូងតាមចន្លោះគុម្ពតាមការកំណត់ ឆ្លាស់មុខដំណាំប្រើវិធានការចំរុះ ការពារដំណាំ។
- វិធានការកំចាត់តាមបែបប្រើថ្នាំគីមីមានថ្នំាពុលជាច្រើនប្រភេទដែលត្រូវយក មកប្រើ ដើម្បីកំចាត់សត្វល្អិតដូចជាថ្នាំ បេតេ (BT), វិតាហ្គ្រូ(Vitagro),ឌីភិល(Dipel), ហ្វូបបាក់ (Florback), សេដាប់បែលយូឌី (Cwd), សង់ដីរ(Zandor)សម្រាប់តែដង្កូវយោលទោង។
- ក្រៅពីនេះគេប្រើថ្នាំ ហ្វុយរ៉ាដង់ (Furadan 3H) មកបាចដោយប្រើក្នុងកំរិត ១៥០ ក្រាមលើផ្ទៃដី ១០ទៅ ១៥ ម២ មុននឹងបាចត្រូវស្រោចទឹកឲ្យជោគជាមុន។
ការប្រមូលផល
- គេអាចប្រមូលផល ស្ពៃចង្កឹះបានក្រោយ ដាំរយៈពេល ២០-២៥ថ្ងៃ
- មុនប្រមូលផល១៤ថ្ងៃ ត្រូវបញ្ឈប់ការបាញ់ថ្នាំសម្លាប់សត្វល្អិត
- ផ្អាកស្រោចទឹក មុនដក២-៣ថ្ងៃ
- ប្រមូលផលពេលព្រឹក
- យកកាំបិត កាត់ក្បែរគល់ស្ពៃផុតពីដី
- កាត់ស្លឹកចាស់ ២-៣ធាងចោល
- រៀបចំដាក់កេះ ឡាំង ឬកញ្ឆេរធំ ដាក់ក្រោមម្លប់
- ទិន្នផលអាចទទួលបាន មធ្យមពី ១៨-២២តោន/ហិចតា
ប្រភព: ក្រសួងកសិកម្ម រុក្ខាប្រមាញ់ និងនេសាទ
