វិធីសាស្ត្រដុតធ្យូងអង្កាម

និយមន័យធ្យូងអង្គាម

ធ្យូងអង្កាម គឺជាធ្យូងដែលបានមកពីការដុត អង្កាម កំទេចកំទី ចំបើង ស្លឹកឈើជាដើម ហើយវា ត្រូវបានប្រើប្រាស់ក្នុងការងារកសិកម្ម។ ធ្យូងអង្កាម ត្រូវបានគេយកទៅប្រើលើដីសំរាប់ធ្វើកសិកម្ម និងការដាំដុះផ្សេងៗទៀត។ការដុតធ្យូងអង្កាមនេះយើងអាចធ្វើដោយមានវិធីសាស្រ្តច្រើនប្រភេទ តែវិធីសាមញ្ញៗដែលកសិករនិយមប្រើមានដូចខាងក្រោម៖

ការដុតក្នុងធុង ឬឡដុត

• ការរៀបចំកន្លែងដុត ៖ គេអាចប្រើធុងដែក ឬក៏ជីករណ្តៅដែលមានគម្រប ឬបំពង់ផ្សែង។
• ការដាក់អង្កាម ៖ គេដាក់អង្កាមក្នុងធុង ឬរណ្តៅដុតនោះ រួចដុតវាពីខាងក្រោម ឬពីគែមណាមួយ។
• ការគ្រប់គ្រងភ្លើង ៖ គេត្រូវគ្រប់គ្រងភ្លើងកុំឲ្យខ្លាំងពេកដើម្បីឲ្យអង្កាមឆេះយឺតៗ ដោយមិនឲ្យក្លាយជាផេះឡើយ។ នៅពេលអង្កាមភាគច្រើនប្រែជាពណ៌ខ្មៅ គេត្រូវបិទជិតកន្លែងដុតដើម្បីពន្លត់ភ្លើង ហើយរក្សាកម្តៅ។

ការប្រើឡដុតធ្យូងអង្កាមពីបន្ទះដែក

•  ការរៀបចំឡ ៖ គេអាចធ្វើឡដុតពីបន្ទះដែកដែលមានរាងដូចសាជីជ្រុង។
•  ការដាក់អង្កាម ៖ គេដាក់អង្កាមនៅខាងក្នុង ហើយដុតពីគែម។
•  ការពន្លត់ភ្លើង៖ នៅពេលអង្កាមប្រែពណ៌ខ្មៅគេបិទគម្រប និងបំពង់ផ្សែងដើម្បីពន្លត់ភ្លើងដោយមិនឲ្យមានខ្យល់ចេញចូលឡើយ។

       វិធីទាំងពីរនេះ មានគោលការណ៍ដូចគ្នា គឺត្រូវដុតអង្កាមក្នុងបរិយាកាសដែលខ្វះអុកស៊ីសែន (ឬកំហិតអុកស៊ីសែន) ដើម្បីឲ្យអង្កាមឆេះយឺតៗទៅជាធ្យូងខ្មៅ មិនមែនជាផេះឡើយ។

សារៈប្រយោជន៍របស់ធ្យូងអង្កាម

ធ្យូងអង្កាមផ្តល់នូវសារៈប្រយោជន៍យ៉ាងខ្លាំងចំពោះ ការងារកសិកម្មដូចជា៖

• ជំរុញការលូតលាស់រុក្ខជាតិធ្វើឲ្យទិន្នផលកើនឡើង
• ជួយរក្សាជីជាតិដីមិនឲ្យហូរច្រោះចេញ
• កាត់បន្ថយការប្រើប្រាស់ជីគីមីដែលនាំឲ្យខូចបរិស្ថាន
• ជួយរក្សាសំណើមដីធ្វើឲ្យរុក្ខជាតិមានភាពធន់ និង ភាពរាំងស្ងួត
• កែលំអគុណភាពដី
• បង្កើនពពួកសត្វល្អិតមានប្រយោជន៍ក្នុងដី

ប្រភព ៖ ក្រសួងកសិកម្ម រុក្ខាប្រមាញ់ និងនេសាទ