ចិនបានរកឃើញសារធាតុគីមីក្នុងធុរេនពីប្រទេសថៃនិងវៀតណាម រដ្ឋាភិបាលកម្ពុជាណែនាំអោក្រសួងជំនាញយកចិត្តទុកដាក់និងពន្លឿនកសិករដាំធុរេនស្រុកយើងចៀសវាងមានការប៉ះពាល់

ក្រោយចិនរកឃើញសារធាតុគីមីប៉ះពាល់សុខភាព លើផ្លែទុរេននាំចូលពីថៃ និងវៀតណាម, រាជរដ្ឋាភិបាលកម្ពុជា ណែនាំឱ្យក្រសួងជំនាញយកចិត្តទុកដាក់ លើការនាំ​​ចូលទុរេនពីប្រទេសជិតខាង

រាជរដ្ឋាភិបាលបានណែ​នាំឱ្យក្រសួងពាណិជ្ជកម្ម ចិត្តទុកដាក់​លើការនាំចូលទុរេន និងការដាំដុះក្នុងប្រទេស និងត្រូវពន្លឿនកិច្ចការរៀបចំកសាងសមត្ថភាពមន្ទីរពិសោធន៍ លើការវិភាគរកសារធាតុ Basic Yellow 2 ឬ Auramine O Cadmium លើផ្លែទុរេនដែលនាំចូល​ឱ្យបាន​ឆាប់ក្នុងពេលដ៏ខ្លីខាងមុខនេះ ដើម្បីការពារអ្នកប្រើប្រាស់នៅកម្ពុជា។

ការណែនាំនេះធ្វើឡើងបន្ទាប់ពីចិនបានហាមឃាត់ការនាំចូលផ្លែទុរេនស្រស់ពី​វៀតណាម និងថៃ ក្រោយរកឃើញមានផ្ទុកសារធាតុ Basic Yellow 2 ឬ Auramine O Cadmium ដែលធ្វើឲ្យប៉ះពាល់ដល់សុខភាពប្រជាជន។

​យោងតាមលិខិតចុះនៅថ្ងៃទី១៨ ខែកុម្ភៈ ឆ្នាំ២០២៥ របស់ទីស្ដីការគណៈរដ្ឋមន្ត្រីបានបញ្ជាក់ថា «រដ្ឋាភិបាលបានឃើញ និងសម្រេចឱ្យក្រសួងពាណិជ្ជកម្ម ត្រូវយកចិត្តទុកដាក់ទាំងការនាំចូលទុរេន និងការដាំដុះក្នុងប្រទេស និងត្រូវពន្លឿនកិច្ចការរៀបចំកសាងសមត្ថភាពមន្ទីរពិសោធន៍ លើការវិភាគរកសារធាតុ Basic Yellow 2 ឬ Auramine O Cadmium ដោយចាត់ទុកជាការប្រញាប់ ក្នុងរយៈពេលដ៏ខ្លីខាងមុខ ដើម្បីជួយគាំទ្រដល់អគ្គនាយកដ្ឋានគយ និងរដ្ឋាករកម្ពុជា ក្នុងការវិភាគនៅតាមមាត់ច្រក នៅពេលដែលមានការនាំចូល​ ផ្លែទុរេនស្រស់ ដែលមិនមានវិញ្ញាបនបត្របញ្ជាក់ និងធានាមិនឱ្យមានការប្រើប្រាស់សារធាតុទាំងពីរនេះលើផលិតផលក្នុងស្រុក ដើម្បីការពារអ្នកប្រើប្រាស់»។

គួររម្លឹកថា កាលពីខែតុលា ឆ្នាំ២០២៤ គយចិនលើកឡើងពីសារធាតុគីមី Cadmium ដែលមានក្នុងទុរេននាំចូលពីថៃ។ សារធាតុនេះ ជាប្រភេទលោហធាតុដែលមានជាតិពុល និងបង្កជាជំងឺធ្ងន់ធ្ងរ ប្រសិនបើប្រើប្រាស់ក្នុងបរិមាណច្រើន ដែលជាសមាសធាតុអាច​បង្កជំងឺមហារីក។ ដូច្នេះបញ្ហានេះនាំឲ្យមានការផ្អាកការនាំចេញពីកន្លែងវេចខ្ចប់ និងចម្ការជាច្រើននៅថៃ រហូតដល់បញ្ហាត្រូវបានដោះស្រាយ។ ហើយថ្មីៗនេះ ចិនបានរឹតបន្តឹងលើ​ការ​នាំចូលទុរេន​ពី​វៀតណាមផងដែរ ដោយ​តម្រូវ​ឱ្យ​ប្រទេស​ទាំង ​២​ត្រួតពិនិត្យ​ឱ្យ​ហ្មត់ចត់ ក្នុងការនាំចូលទៅប្រទេសចិន។

យោងតាមកាសែត VN Express របស់វៀតណាមបានឱ្យដឹងផងដែរថា ក្នុងខែកុម្ភៈឆ្នាំ២០២៥នេះ ប្រទេសថៃបានកប់ចោលទុរេនចំនួន ៦៥.៧តោន បន្ទាប់ពីទុរេនទាំងនោះត្រូវបានច្រានចោល ដោយប្រទេសចិន ដោយសារមានប្រឡាក់សារធាតុពុលពណ៌លឿង។ ដោយសារតែបញ្ហានេះ ប្រទេសថៃបានផ្អាកចេញអាជ្ញាប័ណ្ណនាំចេញទៅឱ្យក្រុមហ៊ុនលក់ដុំទុរេនចំនួន ២៦ក្រុមហ៊ុនដែលជាប់ពាក់ព័ន្ធនឹងការនាំចេញទុរេនដែលមានជ្រលក់សារធាតុគីមីប្រភេទនេះ៕

តើអ្វីទៅជាសារធាតុ Basic Yellow 2 ឬ Auramine O និងសារធាតុ Cadmium? ហើយវាបង្កការប៉ះពាល់អ្វីខ្លះដល់មនុស្ស?

1. សារធាតុ Basic Yellow 2 ឬ Auramine O: គឺជាសារធាតុពណ៌សម្រាប់ជ្រលក់ក្រណាត់ ជ្រលក់សសៃសូត្រ និងសម្ភារៈផ្សេងៗ សារធាតុនេះជាសារធាតុពុលម្យ៉ាងដែលអាចបង្ករឱ្យរលាកស្បែក ឬក្រហមភ្នែក។

ផលប៉ះពាល់ចំពោះសុខភាព: 

-បំផ្លាញថ្លើម និងតម្រងនោម

-ប៉ះពាល់ដល់កោសិកាអាចបង្ករមហារីក

-រលាកក្រពះ រលាកពោះវៀន

-អាលែកស៊ី និងអាចបំផ្លាញសរីរាង្គណាមួយធ្ងន់ធ្ងរបើករណីញ៊ាំសារធាតុនេះញឹកញាប់ជាប្រចាំ។

សារធាតុនេះត្រូវបានប្រើប្រាស់នៅលើផ្លែទូរេនដើម្បីឱ្យមើលទៅមានពណ៌លឿង ទុំល្អ។ 

2. សារធាតុ Cadmium: គឺជាសារធាតុលោហៈរាវដែលប្រើប្រាស់ជាជីក្នុងការដាំដុះទុរេន ហើយសារធាតុនេះត្រូវបានស្រូបដោយដើមទុរេន និងផ្លែទុរេន ផលប៉ះពាល់នៃសារធាតុនេះគឺ:

-រលាកពោះវៀន

-រមួលក្រពើ

-បំផ្លាញតម្រងនោម

-ពុកឆ្អឹង

-បំផ្លាញថ្លើម

-ជាសារធាតុទី១ដែលមជ្ឈមណ្ឌលស្រាវជ្រាវពីជំងឺមហារីកបានរកឃើញថាវាបង្ករហានិភ័យនៃជំងៃមហារីកខ្ពស់ជាងគេ

-ប្លុកការស្រូបកាល់ស្យូម និងវីតាមីន D បំផ្លាញដល់មេតាប៉ូលីស

-ធ្វើឱ្យប្រព័ន្ធការពាររាងកាយចុះខ្សោយ និងបង្កើនសារធាតុពុលក្នុងឈាម។

ឯកសារយោង 

១. FB Page : Veng Serei Vatthana

២. https://www.youtube.com/watch?v=oUhAfSOEmvw