បច្ចេកទេសដាំដុះផ្សិតចំបើងនៅក្នុងរោង

ផ្សិតគឺជារុក្ខជាតិមួយប្រភេទដែលមានការពេញនិយមខ្លាំងសម្រាប់ប្រជាជននៅទូទាំងសាកលលោក ដោយគេអាចកែច្នៃទៅជាបន្លែ និងគ្រឿងទេសផ្សេងៗ។ ផ្សិតអាចដុះលូតលាស់បានដោយធម្មជាតិ និងមានការដាំដុះពីមនុស្ស ដោយផ្សិតដែលមានការចរាចរណ៍ខ្លាំងនៅលើទីផ្សាររួមមានផ្សិតចំបើង ផ្សិតអំបោះ ផ្សិតភ្លៅមាន់ ផ្សិតម្ជុល។ល។ ខាងក្រោមនេះគឺជាបច្ចេកនៅក្នុងដំណើរការងៃការដាំដុះផ្សិតចំបើងនៅក្នុងរោង៖

ការរៀបចំរោង

ជាដំបូងគេត្រូវសាងសង់រោងមួយដែលមានការបិទជិត ប្រក់រោង និងបិតជុំវិញរោងដោយអុីសូឡង់ ហើយមានទំហំ ៣x៦ម. និងកម្ពស់ ៣ម. ។ បន្ទាប់គេត្រូវធ្វើធ្នើរសម្រាប់ដាំដុះផ្សិតក្នុងរោងដោយមានទំហំ ១.២x៥ម. និងមានគម្លាតពីជាន់មួយទៅជាន់មួយកម្ពស់ ០.៥ម. ។ រួចគេត្រូវធ្វើទីតាំងសម្រាប់ត្រាំចំបើងទំហំ ៤x៤ម. កម្ពស់ ០.៥ម. ។ ជាចុងក្រោយគេត្រូវធ្វើចង្រ្កាន្តដើម្បីបញ្ចេញផ្សែងចូលទៅក្នុងរោងនៅពេលដែលដាក់ចំបើងចូលឬចង្ក្រាន្តចំហុយរោង។

វត្ថុធាតុដើម

• ចំបើងស្ងួត
• ដើមចេក
• កន្ទក់
• កំបោរ
• មេផ្សិត
• ទឹក
• អុស
• ធុងបាញ់បាញ់ទឹក ឬហៅធុងបាញ់ថ្នាំ

បច្ចេកទេសដាំដុះ

• ដាក់ចំបើងត្រាំទឹក រួចជាន់ឲ្យហាប់ដោយទុករយៈពេល ២៤ម៉ោង
• ផ្អាប់ចំបើងដោយគ្របឲ្យជិតរយៈពេល ៥ថ្ងៃ
• ៥ថ្ងៃក្រោយមកបើកតង់ចំបើងផ្អាប់ រួចមូលជាដុំទ្រវែងសមល្មមនឹងទំហំទទឹងនៃធ្នើរ ដោយមូលឲ្យហាប់ណែនល្អ(ទំហំប៉ុនកំភួនជើង)
• ក្រោយមូលរួចគេត្រូវបាចកំបោរឲ្យសព្វនៅក្នុងរោង និងនៅលើធ្នើរហើយទុករយៈពេល ៥ថ្ងៃ
• ៥ថ្ងៃក្រោយចំហុយគេត្រូវដាក់សារធាតុចិញ្ចឹមនៅលើធ្នើរដោយរោយកន្ទក់ ហើយកាប់ដើមចេកឲ្យតូចៗដាក់ពីលើចំបើង និងកន្ទក់ ដើម្បីឲ្យវារក្សាសំណើម
• ២៤ម៉ោងក្រោយគេត្រូវដុតបង្ហុយផ្សែងចូលក្នុងរោងរយៈពេល ៤ទៅ ៥ម៉ោង(ចំហុយរោង)
• បន្ទាប់មកបាចមេផ្សិតលើចំបើងក្នុងរិមាណស្មើសាច់ល្អឬជាទូទៅ៥កញ្ចប់ ដោយបាចនៅពេលព្រឹកនាថ្ងៃបន្ទាប់ក្រោយចំហុយ
• ពិនិត្យមើលថាមានដុះសរសៃផ្សិតឬនៅបើមានឬរយៈពេលបីថ្ងៃក្រោយគេត្រូវបាញ់ទឹកដោយធុងបាញ់ ដើម្បីផ្ដាច់សរសៃផ្សិត
• ថ្ងៃបន្ទាប់គេត្រូវបើករោងយ៉ាងហោច ២ម៉ោង នៅពេលព្រឹកដើម្បីឲ្យពន្លឺចូលក្នុងរោង
• បន្ទាប់មកផ្សិតចាប់ផ្ដើមផ្តល់ទិន្នផលរយៈពេល ១៤ថ្ងៃ

ការប្រមូលផល

គេអាចប្រមូលផលផ្សិតនៅពេលដែលវានៅក្រពុំល្អ មិនត្រូវទុករហូតដល់ផ្សិតចាយឬហើរឡើយ ព្រោះវានឹងចាស់ហើយបានតម្លៃទាប។

#ចំណាំ៖ ដំណើរការអាចប្រែប្រួលទៅលើបរិមាណ ព្រោះវាអាស្រ័យទៅតាមទំហំនៃការធ្វើ។

ឯកសារយោង

• https://m.baodantoc.vn
• https://camau.gov.vn