ការផ្សាំមែករុក្ខជាតិ

ការផ្សាំមែកគឺជាការបន្តពូជរុក្ខជាតិដោយគ្មានគ្រាប់ ដែលគេយកមែករុក្ខជាតិមួយដើម្បីបង្កើតបានកូនរុក្ខជាតិមួយទៀតហើយប្រើរយៈពេលខ្លី។ គេអាចផ្សាំមែកដំណាំបាននូវគ្រប់រដូវកាលហើយអាចផ្សាំទៅលើប្រភេទដំណាំបានជាច្រើនប្រភេទ។ ខាងក្រោមនេះគឺជាបច្ចេកទេសលម្អិតអំពីការផ្សាំមែកដែលស្របតាមបទពិសោធន៍ជាក់ស្ដែងផងដែរ។

ប្រភេទដំណាំផ្សាំមែក

• ក្រូចឆ្មារ
• ក្រូចថ្លុង
• ក្រូចពោធិ៍សាត
• ខ្នុរ
• ទៀប
• សាវម៉ាវ
• មៀន
• ស្វាយ
• ត្របែក។ល។

ការរៀបចំល្បាយដី(Substrate)

• គេអាចប្រើប្រាស់ស្រកីដូងជំនួសការប្រើដីសុទ្ធ ព្រោះស្រកីដូងអាចរក្សាសំណើមបានល្អ ម្យ៉ាងទៀតស្រកីដូងដែលល្អបំផុតជាស្រកីដូងដែលយកចេញពីដូងចាស់(ដោយសារវាមានមេដ្យូមនៃសារធាតុចិញ្ចឹមស្រាប់នៅក្នុងស្រកី)។
• ត្រូវត្រាំទឹកក្នុងសំណើម 60% និងខ្យល់60%ព្រោះសើមឬស្ងួតពេកវាអាចបណ្ដាលឲ្យឫសមិនអាចដុះបាន។
• បន្ទាប់មកយកថង់ដាក់ស្រកីដូងនោះទៅចងលើមែកដែលចង់បំបៅ។

ការជ្រើសរើសមែក និងវិធីផ្សាំ

• ជ្រើសរើសមែកណាដែលមិនចាស់ពេក និងមិនមែនសំបកបៃតងពណ៌បៃតងខ្ចី។
• យកកាំបិតស្ដើងទៅកោសសំបកខាងក្រៅជុំវិញប្រវែង 7-8cm ដែលជាប់សាច់ឈើចេញបន្ទាប់មកជូតឲ្យស្ងួតរួចលាបអ័រម៉ូន អុកសុីន(ថ្នាំបណ្ដុះឫស)នៅត្រង់ទីតាំងកោសសំបកនោះ និងយកខ្សែចងដើម្បីផ្ដាច់សរសៃសុីឡែម និងប្លូអែមនៃរុក្ខជាតិ។ ក្រោយមកយកល្បាយដីដែលលាយរួចទៅចងពីលើទីតាំងកោសនោះ ដោយចងផ្នែកខាងលើឲ្យជិត និងចងផ្នែងខាងក្រោមរាងធូរបន្ទិចដើម្បីឲ្យទឹកឬទឹកភ្លៀងហូរចេញ។
• ម្យ៉ាងទៀតគេអាចធ្វើការកោសសំបកឈើដោយទុករយះពេល15ថ្ងៃ(សម្រាប់រុក្ខជាតិណាដែលមានជ័រច្រើន)ដើម្បីឲ្យស្បែកឈើសង្ខាងឡើងដំពក រួចលាបអ័រម៉ូនអុកសុីននៅទីតាំងដែលបានដុះដំពកនោះ។ បន្ទាប់មកយកល្បាយដីដែលបានលាយរួចទៅរុំឲ្យជិតទីតាំងកោស ហើយចងផ្នែកខាងលើឲ្យជិតដើម្បីកុំឲ្យទឹកហូរចូលល្បាយដីច្រើនពេកនាំឲ្យមែកមិនអាចដុះឫស។

ការផ្សាំក្នុងកន្ទោងឬថង់បណ្ដុះ

ក្រោយពីបានផ្សាំលើដើមរយៈពេល2ខែឬរហូតដល់មែកដុះឫសដែលមានពណ៌ត្នោតចាស់ឬឫសពណ៌ចាស់ទើបគេអាចកាត់មែកផ្សាំផ្ដាច់ចេញពីដើម។ ចំពោះការកាត់ត្រូវយកកន្ត្រៃឬរណាដោយកាត់ចម្ងាយពីថង់ផ្សាំប្រវែង3cm រួចស្រាយថង់ចេញហើយត្រាំមែកផ្សាំដែលដុះឫសនោះក្នុងទឹករហូតដល់បាត់ពពុះ។ នៅក្នុងទឹកត្រាំមែកគេត្រូវលាយទឹកជាមួយថ្នាំដែលមានធាតុសកម្ម Humic acid ឬ Fumic acidតាមកម្រិតណែនាំលើកញ្ចប់ថ្នាំ។ មួយវិញទៀតប្រសិនបើគ្មានថ្នាំនេះទេគេអាចត្រាំលាមកគោក្រៀមរយៈពេល 7ថ្ងៃ ហើយយកទឹកនោះទៅត្រាំមែកផ្សាំឬលាយជាមួយHumic acid ឬ Fumic acid កាន់តែមានប្រសិទ្ធិភាពខ្ពស់ផងដែរ។ ក្រោយត្រាំទឹករួចគេអាចយកមែកទៅដាក់ក្នុងកន្ទោង(ថង់បណ្ដុះ)ដែលបានរៀបចំល្បាយដីដូចជា អង្កាម ដី(ដីដំបូក, ដីទន្លេរ, ដីក្រោមដើមឈើ, លាមកគោក្រៀម)។ នៅពេលដាក់ក្នុងកន្ទោងគេត្រូវកាត់ស្លឹកចោលមួយចំនួន និងនៅពេលដែលវាដុះមែកថ្មីត្រូវកាត់មែកចោលខ្លះ។

ឯកសារយោង

• https://images.app.goo.gl/GWASmtwuMnCtLRFy6
• https://infolific.com/leisure/bonsai/layering-and-grafting-bonsai/