ហេតុអ្វីបានជាគេធ្វើដំណើរលំអងទុរេននៅពេលយប់?

ដំណាំទុរេនជាដំណាំម្យ៉ាងដែលមានការពេញនិយមខ្លាំងពីសំណាកអ្នកបរិភោគ រួមទាំងនៅប្រទេសកម្ពុជាយើង។ ទុរេនមានឱជារសផ្អែម ឈ្ងុយ និងជាស្ដេចនៃផ្លែឈើ ហើយវាក៏មានតម្លៃថ្លៃ និងមានទីផ្សារខ្ពស់ផងដែរ។ ទន្ទឹមនឹងនេះការដាំដុះទុរេនក៏មិនមានភាពងាយស្រួលប៉ុន្មាននោះទេ ជាពិសេសការថែទាំនៅរដូវបង្កបង្កើនផល។ នៅក្នុងអត្ថបទនេះអ្នកនឹងបានស្វែងយល់ហេតុអ្វីបានជាគេចូលចិត្តធ្វើដំណើរលំអងទុរេននៅពេលយប់។

មូលហេតុ

ទុរេនជារុក្ខជាតិដែលមានផ្កាទ្វេរភេទ ហើយអាចរោយលំអងដោយខ្លួនឯងបាន។ ប៉ុន្តែផ្កាទុរេនភេទញី និងភេទឈ្មោលបានរីកនៅដំណាក់កាលខុសគ្នា។ ជាឧទាហរណ៍ដូចទុរេនពូជថៃមួយចំនួនវាចាប់ផ្ដើមរីកពេញនៅម៉ោង ៣:០០ទៅ ៦:០០ល្ងាច ប៉ុន្តែគ្រាប់លំអងចាប់ផ្តើមចេញនៅម៉ោង ៨:០០ដល់ពាក់កណ្ដាលអធ្យាត្រជាហេតុធ្វើឲ្យផ្កាទុរេនទទួលលំអងមិនបានពេញលេញ។ ម្យ៉ាងទៀតផ្ការីកនៅពេលយប់ ដោយគ្រាប់លំអងមានរាងស្វ៊ែរ ស្អិត និងបញ្ចេញជាដុំៗ ដូច្នេះហើយវាពិបាកក្នុងការផ្លាស់ទី ទើបវាត្រូវការ ខ្យល់ សត្វដែលរកសុីពេលយប់ និងមនុស្សដើម្បីធ្វើដំណើរលំអង។

អត្ថប្រយោជន៍នៃការរោយលំអង

• ធ្វើឲ្យផ្កាទទួលបានលំអងគ្រប់គ្រាន់
• នៅពេលដែលផ្កាទទួលបានលំអងពេញវានឹងជួយធ្វើឲ្យផ្លែស្អាត និងមានក្លែបល្អ
• ធ្វើឲ្យផ្លែមានគុណភាពខ្ពស់
• ផ្លែមានសាច់ច្រើន
• ផ្លែទទួលបានតម្លៃខ្ពស់

បច្ចេកទេសបោសលំអង

• សម្ភារៈឬឧបករណ៍៖ ជួករោមឬជួកទន់។
• រោយឬបោសលំអងនៅពេលយប់ចន្លោះម៉ោង ៧-៩យប់។
• បោសផ្កាថ្នមៗ ដោយបោសជាកញ្ជំជៀសវាងជ្រុះផ្កា ឬបង្ខំឲ្យលំអងចេញខុសប្រក្រតី។

#ចំណាំ៖ការបោសលំអងឬរោយលំអងទុរេននៅពេលយប់ពុំមែនជាការបង្កាត់ទុរេនឡើយ លុះត្រាតែការរោយឬបោសនោះជាពូជពីរផ្សេងគ្នា។

ឯកសារយោង

• https://tincay.com/tam-quan-trong-cua-thu-phan-bo-sung-cho-hoa-sau-rieng/#
• https://server2.maff.gov.kh/parse/files/myAppId5hD7ypUYw61sTqML/a1fbb09d338aa2c660bebf8da0f6f450_1539768767.pdf