ការប្រែប្រួលអាកាសធាតុបានធ្វើអោយប៉ះពាល់ដល់ផលិតកម្មដាំដុះដំណាំក្រូចថ្លុង ដូចជាធ្វើអោយទិន្នផលថយចុះ ផ្លែតូច ក្រូចមិនសូវមានទឹកដម។ ដូច្នេះបញ្ហាទាំងនេះធ្វើអោយខូចខាតដល់ប្រាក់ចំណូលរបស់កសិករដាំក្រូចថ្លុង ជាការពិតណាស់ការយល់ដឹងពីបច្ចេកទេសបានជួយកាត់បន្ថយនូវការខាតបង់ផងដែរ។ អ្នកដឹងទេថា ក្រូចថ្លុងសម្បូរសារធាតុចិញ្ចឹមជាច្រើនដែលជួយដល់សុខភាព។
ការជ្រើសរើសពូជ
- យកពូជក្រូចថ្លុងណាដែលធន់ទ្រាំនឹងអាកាសធាតុ សត្វល្អិត និងជំងឺ
- ជាពូជដែលផ្ដល់ផលលឿន និង មានតម្រូវទីផ្សារបច្ចុប្បន្ន
ការរៀបចំដី និង ការដាំដុះ
- ភ្ជួររាស់ដីឲ្យបានពី ២-៣ សារ រាស់ដីឲ្យស្មើរ និងសម្អាតស្មៅឲ្យស្អាត
- ទុកដីហាល៥ថ្ងៃមុនដាំ
- ចន្លោះគុម្ពពីគុម្ពមួយទៅគុម្ពមួយ ៥X៥ម៉ែត្រ
- ជម្រៅរណ្ដៅនិងទំហំរណ្ដៅ០.៥តឹកx០.៥តឹក
- ជីកំប៉ុស្ដិ ច្របល់ដីនៅក្នុងបាតរណ្ដៅឲ្យសព្វល្អ វាជួយឲ្យដីធូរ បង្កើនសត្វល្អិតក្នុងដី ជម្រុញការលូតលាស់របស់ដំណាំ
- យកចំបើងឬស្លឹកឈើងាប់ៗ គ្រប់ពីលើគល់ក្រូចថ្លុងដើម្បីជួយរក្សាសំណើមដី បន្សាំទៅនឹងភាពរាំងស្ងួតដែលជាឥទ្ធិពលនៃការប្រែប្រួលអាកាសធាតុ។
ការដាក់ជី
- ក្រោយពីដាំក្រូចថ្លុងបាន ២-៣ខែ ត្រូវសម្អាតស្មៅ
- ដាក់ជីបំប៉នរៀនរាល់៣ខែម្ដង ប្រើជី ១៥.១៥.១៥និងជី ១៦.១៦.១៦
- ប្រើជីគីមីក្នុងមួយគុម្ព ៥០ក្រាមដាក់ជុំវិញគល់
- លុបដីពីលើ យកស្លឹកឈើងាប់ៗឬរុក្ខជាតិស្រស់ៗមកគ្របពីលើគល់ដើម្បីរក្សាសំណើម
ការគ្រប់គ្រងជីជាតិដី
ដើម្បីជួយបង្កើនជីជាតិអោយបានល្អ ក៏ដូចជាបន្សាំទៅនឹងការប្រែប្រួលអាកាសធាតុទៀតសោតនោះគប្បីគួរតែ៖
- ដាំដំណាំគម្របដី៖ ដូចជាពពួកសណ្ដែកដែលមិនប៉ះពាល់ឬសរបស់ក្រូចថ្លុង
- បន្ថែមជីសរីរាង្គ៖ ស្លឹកឈើ កាកសំណល់ផ្ទះបាយ ចំបើង កាកសំណល់សត្វជួយឲ្យដីសម្បូរជាតិមមោក ជក់ទឹកបានល្អ
- ដាំដំណាំចម្រុះ៖ ប្រព័ន្ធឬសជួយការពារទម្រង់ដីនិងរក្សាសម្ថតភាពជក់ទឹកក្នុងដីបានល្អ ជួយគ្របដី កាត់បន្ថយរំហួតទឹកក្នុងបរិយាកាសនិង ការពារដីមិនឲ្យហាប់។
ការប្រមូលផល
- ១៨-២០ខែក្រោយការដាំដុះគឺអាចប្រមូលផលបាន(ដាំដោយមែក)
- ចំការក្រូចថ្លុងដែលដាំដោយកូន អាចចាប់ផ្ដើមប្រមូលផលពេលដើមប្រមាណ ៣-៤ឆ្នាំបន្ទាប់ពីដាំ
- ក្រូចថ្លុងអាចរក្សាទុកបានក្នុងចន្លោះ២០ថ្ងៃប្រសិនសីតុណ្ហភាពសមស្រប២៧អង្សាសេ
- ផ្លែទុំនៅពេលសម្បកផ្លែប្រែពណ៍បៃតង មកបៃតងភ្លឺរលាង លឿងទុំឬលឿង
- ក្រូចថ្លុងមធ្យមផ្ដល់ទិន្នផល២០ទៅ៣០តោនក្នុងមួយហិចតា
- ធ្វើចំណែកថ្នាក់ក្រូចទៅតាមទំហំ សម្បុរ ដើម្បីតម្រូវតាមទីផ្សារនិងតម្លៃ
ប្រតិទិនដាំដុះ
ល.រ | សកម្មភាព | មករា | កុម្ភៈ | មិនា | មេសា | ឧសភា | មិថុនា | កក្កដា | សីហា | កញ្ញា | តុលា | វិច្ឆកា | ធ្នូ |
I | ផលិតកម្ម | | | | | | | | | | | | |
1 | ដាំដុះ | | | | | + | + | + | + | + | | | |
2 | ស្រោចស្រព | | + | + | + | | | | | | + | + | + |
3 | សម្អាតស្មៅ | + | + | | | + | + | + | + | + | | | |
4 | ដាក់ជី | | | + | + | + | | | | | + | + | + |
5 | ប្រមូលផល | | | + | + | | | + | + | + | + | | |
សញ្ញា+ តំណាងអោយការធ្វើសកម្មភាពតាមខែនិមួយៗ
ឯកសារយោង
ប្រភព:ដកស្រង់ចេញពីក្រសួងកសិកម្មរុក្ខាប្រមាញ់និងនេសាទ