បច្ចេកទេសបន្សុទ្ធពូជស្រូវ

ជាទូទៅការបន្សុទ្ធពូជគឺជាការជម្រើសនូវប្រភេទពូជណាមួយដែលគេចង់បាន ហើយមានដំណើរការផ្សេងៗគ្នាទៅតាមលក្ខខណ្ឌនៃការបន្សុទ្ធសម្រាប់ពូជស្រូវនីមួយៗ។ ខាងក្រោមនេះគឺជាការបន្សុទ្ធពូជស្រូវស្របតាមបច្ចេកទេសនៃក្រសួងកសិកម្ម រុក្ខាប្រមាញ់ និងនេសាទផងដែរ។

ការរៀបចំដី

ជាទូទៅទីតាំងឬស្រែដែលធ្វើការបន្សុទ្ធពូជត្រូវតែជាស្រែដែលស្ថិតនៅឆ្ងាយពីស្រែដែលមានពូជខុសគ្នាជៀសវាងមានការលាយពូជក្នុងស្រែបន្សុទ្ធពូជ។ ម្យ៉ាងទៀតដីស្រែត្រូវធ្វើការសម្អាតស្មៅ និងស្រូវឬកូនស្រូវចាស់ឲ្យអស់ពីស្រែ ដោយធ្វើការភ្ជួរវាជាច្រើនលើកច្រើនសារ យ៉ាងហោច ៧-១៥ថ្ងៃ និងធ្វើឲ្យដីរាបស្មើផងដែរ។

ការជ្រើសរើសពូជ

• ជាពូជដែលបានមកពីBreeder seedឬគ្រាប់ពូជជម្រើសវិទូដែលបំបែកមកពីពូជមេ
• គ្រាប់ពូជមិនមានលាយឡំជាមួយពូជដទៃ
• គ្រាប់មានទំហំប៉ុនៗគ្នាឬប្រហាក់ប្រហែលគ្នា
• មានដំណុះចាប់ពី ៩០%ឡើងទៅ
• រើសពូជណាដែលយើងចង់ដាំ

បច្ចេកទេសដាំដុះ

ជាដំបូងរាល់សម្ភារៈឬឧបករណ៍ដែលត្រូវយកមកប្រើប្រាស់នៅក្នុងការបន្សុទ្ធពូជ គេត្រូវលាងសម្អាតវាជាមុនសិនជៀសវាងការជាប់នូវពូជដទៃដែលនៅសល់លើសម្ភារៈប្រើប្រាស់។ ចំពោះដំណើរការដាំគេត្រូវយកគ្រាប់ពូជទៅសាបជាថ្នាលលាតឬជាជួរក្នុងទំហំ ០.៥-១ហ.ត ដែលប្រើបរិមាណគ្រាប់ពូជចំនួន ២៥- ៣០ kg ។ បន្ទាប់មកត្រូវស្ទូងស្រូវដោយដៃមិនត្រូវប្រើឧបករណ៍ឬម៉ាសុីនស្ទូងឡើយ ហើយស្ទូង ១ដើម/គុម្ព។

ការបន្សុទ្ធ

នៅពេលដែលស្រូវចាប់ផ្ដើមលូតលាស់គេត្រូវសង្កេតមើលដើមណាដែលខុសគេហើយដកដើមនោះចោល។ ម្យ៉ាងទៀតនៅដំណាក់កាលចេញកួរ ក៏ជាពេលវេលាបន្សុទ្ធដ៏ល្អមួយ ព្រោះរយៈពេលស្រូវចេញកួរគេអាចកំណត់បានថាស្រូវណាមានអាយុកាលខ្លី និងវែង។ ចំពោះការបន្សុទ្ធជាទូទៅគេត្រូវសង្កេតស្រូវរ៉ាប់ចាប់តាំងពីដាំរហូតដល់ប្រមូលផលមិនមែន ជម្រើសពូជស្រូវដើម្បីទុកពូជនៅពេលដែលស្រូវទុំហើយជ្រើសរើសជ្រុងណាមួយនៃស្រែដែលមានការលូតលាស់ស្រូវល្អជាងគេឡើយ។ ការសង្កេតនៃការបន្សុទ្ធរួមមាន៖ លក្ខណៈនៃកម្ពស់, ពណ៌(ដើម ស្លឹក ផ្កា), កំណកំណើតកួរឬថ្ងៃចេញផ្កា, ទំហំស្លឹក និងគ្រាប់, លក្ខណៈកន្ទុយស្រូវ…។

ការប្រមូលផល និងស្តុកទុក

ចំពោះវិធីសាស្ត្រនៃការប្រមូលផលគេត្រូវប្រមូលផលស្រូវដោយដៃ រួមទាំងដំណើរការនៃការច្រូត បោកបែនជាដើម។ រីឯការស្តុកទុកត្រូវទុកដោយឡែកពីទីតាំងដែលស្តុកស្រូវសម្រាប់បរិភោគ និងស្រូវពូជ ជៀសវាងការលាយឡំគ្នា។ ហើយទុកនៅទីតាំងណាដែលមានសុវត្ថិភាពដោយគ្មានសត្វល្អិតឬសត្វដទៃពាំនាំនូវគ្រាប់ពូជទៅទីតាំងដទៃឡើយ។

ឯកសារយោង

• https://server2.maff.gov.kh/parse/files/myAppId5hD7ypUYw61sTqML/c2f74265636536fe6ae032a266789605_1503147189.pdf