បច្ចេកទេសទុកដាក់ និងការប្រមូលផលដំណាំ

ជាទូទៅការដាំដាំដុះគឺជារឿងដ៏ចាំបាច់មួយដែលយើងត្រូវសិក្សាស្វែងយល់ដើម្បីជាមូលគ្រឹះសម្រាប់ការធ្វើកសិកម្ម ប៉ុន្តែក្រោយពីដាំដុះបានជោគជ័យ ការស្តុកទុកឬបច្ចេកទេសប្រមូលផលក៏ជាកត្តាមួយដ៏សំខាន់ផងដែរ។ ការទុកដាក់កសិផលបានត្រឹមត្រូវ រមែងតែងតែទទួលបានផលចំណេញទៅតាមនោះដែរ ដោយឡែកបើយើងមិនបានយល់ដឹងពីរបៀបនៃការស្តុកទុកវាក៏ជាហេតុធ្វើឲ្យផលិតផលខូចគុណភាព និងបាត់បង់ប្រាក់ចំណេញជាដើម។ ខាងក្រោមនេះគឺជាចំណេះដឹងមួយចំនួនទាក់ទងទៅនឹងការប្រមូលផលបន្លែ និងវិធីស្តុកទុក៖

ពេលវេលាសម្រាប់ប្រមូលផលបន្លែ

• ប្រមូលផលនៅពេលមេឃត្រជាក់ដូចជាពេលព្រឹកប្រលឹម និងពេលល្ងាច ដើម្បីកុំឲ្យបន្លែឆាប់ស្រពោន និងខូចគុណភាព
• ចំពោះការប្រមូលផលនៅពេលថ្ងៃត្រង់ត្រូវយកវាទៅទុកនៅក្រោមម្លប់ឬទីតាំងដែលមានសីតុណ្ហភាពទាប ដើម្បីឲ្យបន្លែអាចសាយភាយកម្ដៅចេញមកក្រៅ
• ការប្រមូលផលនៅពេលព្រឹកគឺជាពេលដែលបន្លែមានលក្ខណៈស្រួយខ្លាំងដូច្នេះហើយត្រូវមានការប្រុងប្រយ័ត្នជានិច្ច
• មិនត្រូវប្រមូលផលក្រោយមេឃភ្លៀងឡើយព្រោះទឹកខ្លាំងពេកអាចធ្វើឲ្យបន្លែឆាប់រលួយ ប៉ុន្តែគេអាចយកបន្លែទៅលាងទឹកភ្លៀងចេញដោយទឹកធម្មតាបាន។

វិធីសាស្ត្រប្រមូលផល

• ប្រើប្រាស់កាំបិត, កន្ត្រៃ, ដង្កៀបឬដៃ
• មិនត្រូវទាញផ្លែដើម្បីបេះឡើយវាអាចធ្វើឲ្យដាច់ទង និងបង្កផលប៉ះពាល់ទៅដល់ការប្រមូលផលនៅពេលបន្ទាប់
• មិនត្រូវចាប់ទាញដើមឬមូលដើមទេ វាអាចធ្វើឲ្យប៉ះពាល់ដល់ដើម មើម និងឫស
• នៅពេលចុះទៅប្រមូលផលគេត្រូវពាក់អាវការពារដើម្បីបង្ការពីការរោលឬរលាកដោយសាររោមឬព្រុយរបស់រុក្ខជាតិ(ម្ទេស ប៉េងប៉ោះ ត្រសក់…)

វិធីសាស្ត្រលាងសម្អាត

• លាងសម្អាតនៅក្នុងទឹកក្លរីន ១០០-២០០ppm(លាយទឹកអូសាវែលដែលមានផ្ទុកសមាសធាតុ សូដ្យូមអុីប៉ូក្លរីត ឬNaOCl ៥.២៥% ក្នុងបរិមាណ ៤-៨ស្លាបព្រាបាយ សម្រាប់ទឹក ៣.៧៥L) ក្នុងរយៈពេល ១-៣នាទី។
• វិធីកាត់បន្ថយការរលួយ៖ ដោយប្រើកំបោរ, សាច់ជូរ, ស្លឹកត្របែកចំរាញ់ជាដើម។

វិធីសាស្ត្រស្តុកទុក

ជាទូទៅបន្លែនីមួយៗតែងតែមានសីតុណ្ហភាពស្ដង់ដារបស់វាទៅតាមប្រភេទ និងទំហំ ហើយខាងក្រោមនេះជាសីតុណ្ហភាព និងសំណើមសម្រាប់ការទុកដាក់បន្លែក្នុងរយៈពេលយូរ និងដឹកជញ្ជូនផ្លូវឆ្ងាយ៖

• ត្រសក់&ប៉េងប៉ោះ៖ សីតុណ្ហភាព ១០-១៣^oC និងមានសំណើម ៩០-៩៥%
• ម្រះ៖ សីតុណ្ហភាព ១២-១៣^oC និងសំណើម ៨៥-៩៥%
• ត្រប់&សណ្ដែកកួរ៖ សីតុណ្ហភាព ១២-១៥^oC និងសំណើម ៩០-៩៥%
• ស្ពៃក្ដោប៖ សីតុណ្ហភាព ៣-៥^oC និងសំណើម ៩៥-៩៨%
• ខាត់ណា៖ សីតុណ្ហភាព ៨-១០^oC និងសំណើម ៩៥-៩៨%

ឯកសារយោង

• https://avrdc.org/aarnet/download/manuals/Brocher_PHT_Final_2nd_Edition_July%25202010%2520-%2520kh.pdf