ដំណាំគួរដាំទៅតាមរដូវកាល

2024-01-12 កសិកម្ម

ការដាំដំណាំទៅតាមរដូវកាលនីមួយៗពិតជាមានសារៈសំខាន់ខ្លាំងណាស់ ព្រោះវាបានជួយឲ្យដំណាំមិនងាយរងនូវការបំផ្លាញដោយសារជំងឺ និងសត្វល្អិតផងដែរ។ ខាងក្រោមនេះគឺជាកាលវិភាគសម្រាប់ការដាំដុះទៅតាមរដូវរបស់ប្រទេសកម្ពុជាយើង៖

ដំណាំដាំបានពេញមួយឆ្នាំ

ត្រសក់៖ ជាដំណាំម្យ៉ាងដែលគេអាចដាំដុះដោយគ្រាប់ផ្ទាល់ឬបណ្ដុះជាកូន ហើយវាអាចប្រមូលផលក្រោយដាំចន្លោះអាយុ ៤០ថ្ងៃ រីឯរដូវដាំដុះអាចដាំបានពេញមួយឆ្នាំផងដែរ។ ដើម្បីអាចដាំត្រសក់បានគេអាចរៀបចំដីមុនដាំ៥-៧ថ្ងៃ ដើម្បីហាលដីចោល ដំណាំនេះមានជីណែនាំកម្រិត NPK(៥-១០-១៥)។
ត្រឡាច៖ ជាដំណាំមួយអាចដាំដោយគ្រាប់ឬបណ្ដុះកូនក្នុងរយៈពេល ១៥ថ្ងៃ ក្រោយមកដាំរហូតដល់ ៥៥ថ្ងៃទើបវាចាប់ផ្ដើមផ្តល់ផល។ គេអាចដាំវាបានពេញមួយឆ្នាំ ទាំងរដូវប្រាំង និងវស្សាហើយគេត្រូវដាំដោយលើករងដាក់ត្រើងរងបង ឬដាំរាយប៉ាយក្នុងចំការ ។ ចំពោះអាកាសធាតុវាត្រូវការសីតុណ្ហភាពចន្លោះ ២២-៣៥^oC និងដីមានកម្រិតpH ៦.៥-៧.៥។
ល្ពៅ៖ ដាំដោយគ្រាប់ ហើយវាចាប់ផ្ដើមផ្តលទិន្នផលនៅអាយុ ៧០ថ្ងៃ និងមានរដូវដាំដុះពេញមួយឆ្នាំផងដែរ។ ចំពោះជីវាត្រូវការកម្រិត NPK(៦០-៣០-៣០)kg/ហ.ត ហើយវាអាចលូតលាស់បាននៅដីដែលមានpHចន្លោះ ៦.០-៦.៨។
និងមានដំណាំដទៃទៀតដូចជា៖ ម្រះ, ត្រកួន, ននោង, សណ្ដែកគួរ, ជីនាងវង, ជីម្រះព្រៅ, ម្អម និងឃ្លោក។

ដំណាំដាំខែវិច្ឆិកា-មិថុនា

ដំណាំដែលអាចដាំបាននៅរយៈពេល ៨ខែនេះរួមមាន៖

ត្រប់ ជាដំណាំដាំដោយបណ្ដុះគ្រាប់ក្នុងរយៈពេល ២៥ថ្ងៃ និងអាចផ្តល់ទិន្នផលក្រោយដាំនៅអាយុ ៧៥ថ្ងៃ។
ម្ទេសគុយទាវ គេអាចដាំវាដោយបណ្ដុះកូនរយៈពេលដូចត្រប់ដែរ ហើយអាចផ្តល់ទិន្នផលនៅអាយុ ៨០ថ្ងៃ។

ដំណាំដាំខែវិច្ឆិកាដល់ខែធ្នូ

ដំណាំទាំងនោះរួមមាន៖ ម្ទេសហាវ៉ៃ, ម្ទេសដៃនាង, ខាត់ណាក្ដោប, ខាត់ណាដើម, ស្ពៃក្រញាញ់ក្ដោប, ស្ពៃជើងទា, ខ្ទឹមស, ខ្ទឹមក្រហម, ប៉េងប៉ោះ, ត្រសក់ផ្អែម និងសាលាដក្ដោប។