កត្តាដែលនាំឲ្យគុណភាពដីធ្លាក់ចុះ

ដីគឺជាកត្តាដ៏ចាំបាច់បំផុតសម្រាប់ការដុះលូតលាស់នៃដំណាំ ហើយដំណាំអាចលូតលាស់បានល្អលុះត្រាតែដីនោះមានគុណភាពល្អសមស្របតាមតម្រូវការនៃរុក្ខជាតិ។ ប៉ុន្តែដំណាំអាចនឹងលូតលាស់មិនបានល្អនៅពេលដែលគុណភាពនៃដីធ្លាក់ចុះ ខាងក្រោមនេះជាកត្តាមួយចំនួនដែលធ្វើឲ្យដីបាត់បង់គុណភាពសម្រាប់រុក្ខជាតិ។

កត្តាបំពុលដី

នៅក្នុងសកម្មភាពកសិកម្មកសិករបានប្រើប្រាស់នូវប្រភេទថ្នាំពុលដើម្បីកំចាត់សត្វល្អ ជំងឺ និងស្មៅចង្រៃ ហើយវាបានផ្តល់នូវគុណសម្បត្តិ និងបន្សល់ទុកនូវគុណវិបត្តិនៃការសល់សារធាតុប៉ះពាល់ទៅដល់ដីមួយចំនួនផងដែរ។ ម្យ៉ាងទៀតការធ្វើឧស្សាហ៍កម្មជីកយករ៉ែ ការបោះចោលនូវកាកសំណល់ពុលមិនបានត្រឹមត្រូវ ក៏ជាកត្តារួមផ្សំដែលធ្វើឲ្យដីរងនូវសំណឹកជាដើម។

ការកាប់បំផ្លាញព្រៃឈើ

ការកាប់ព្រៃដើម្បីធ្វើកសិកម្មគឺជាសកម្មភាពមួយដែលអាចបណ្ដាលឲ្យដីធ្លាក់ចុះនូវគុណភាព ព្រោះវាបានគំរាមគំហែងទៅដល់ជីវៈចម្រុះ(ដី ទឹក សត្វ មនុស្ស រុក្ខជាតិ…) ព្រមទាំងរំខានទៅដល់តុល្យភាពនៃប្រព័ន្ធអេកូឡូសុីផងដែរ។ ដោយឡែកនៅពេលដែលដីបាត់បង់នូវគម្របវាក៏ងាយនឹងបាត់បង់តុល្យភាព និងធ្វើឲ្យឆាប់សឹករិចរិលជាដើម។

ការបាត់បង់សារធាតុចិញ្ចឹម

សារធាតុចិញ្ចឹមនៅក្នុងដីងាយស្រួលនឹងបាត់បង់ណាស់តាមរយៈកត្តាផ្សេងៗ រីឯការដាំដុះនៅដំណាំទោលឬដំណាំតែមួយប្រភេទនៅលើដីតែមួយក៏ជាហេតុដែលអាចបណ្ដាលឲ្យដីធ្លាក់ចុះនូវគុណភាព។ នៅពេលដែលយើងដាំដុះនូវដំណាំតែមួយប្រភេទនៅលើដីតែមួយចំនួនច្រើនលើកច្រើនសារឬច្រើនរដូវ វាអាចបណ្ដាលឲ្យបាត់បង់នូវសារធាតុចិញ្ចឹមដែលដំណាំនោះបានស្រូបយកអស់ ឬថយចុះ ហើយដីងាយនឹងរងសំណឹកខូចគុណភាពជាដើម។

ការប្រែប្រួលអាកាសធាតុ

ការផ្លាស់ប្ដូរនៃអាកាសធាតុមានឥទ្ធិពលទៅលើ៖

• ការកើនឡើងនៃសំណឹកតាមរយៈការផ្លាស់ប្ដូរគំរូទឹកភ្លៀងដែលបង្កឲ្យមានព្យុះ និងភ្លៀងធ្លាក់ខ្លាំងជាហេតុធ្វើឲ្យហូរច្រោះដី។
• ការផ្លាស់ប្ដូរសំណើមកើតឡើងតាមរយៈការកើនកម្ដៅដែលធ្វើឲ្យដីឆាប់ហួត ដោយបង្កឲ្យប៉ះពាល់ដល់រចនាសម្ព័ន្ធដី លទ្ធិភាពនៃសារធាតុចិញ្ចឹម និងសកម្មភាពអតិសុខុមប្រាណក្នុងដី។
• ដីកើនអំបិលនៅពេលដែលមានការផ្លាស់ប្ដូររបបទឹកភ្លៀង និងសីតុណ្ហភាពនៅត្រង់ទីតាំងដែលស្ងួត និងពាក់កណ្ដាលស្ងួត។
• ការផ្លាស់ប្ដូរpHដី និងប៉ះពាល់ដល់សារពាង្គកាយដីជាដើម។