ដីគឺជាធនធានដ៏ចាំបាច់សម្រាប់ការដុះលូតលាស់របស់រុក្ខជាតិ ហើយដើម្បីឲ្យរុក្ខជាតិឬដំណាំអាចលូតលាស់បានល្អ និងផ្តល់ទិន្នផលខ្ពស់គេត្រូវយកចិត្តទុកដាក់ទៅលើសារធាតុចិញ្ចឹមនៅក្នុងដីផងដែរ។ ខាងក្រោមនេះជាវិធីមួយចំនួនដែលកសិករគំរូបានអនុវត្តន៍ដើម្បីរក្សាជីវជាតិដី៖

ការដាំដំណាំបង្វិល

ដំណាំបង្វិលជាដំណាំដែលដាំឆ្លាស់គ្នាទៅតាមរដូវ មានន័យថាក្រោយដំណាំមួយប្រមូលផលគេអាចដាំដំណាំមួយប្រភេទទៀតឬដាំតាមកាលវិភាគដែលគេបានកំណត់។ ប៉ុន្តែការដាំដំណាំបង្វិលមិនអាចដាំនូវប្រភេទដំណាំណាដែលមានគ្រួសារឬអំបូរដូចគ្នាឡើយ ព្រោះវាអាចផ្តល់ផលប៉ះពាល់ទៅដល់ដំណាំដែលដាំនៅរដូវក្រោយ។ ហើយផលវិបាករបស់វារួមមាន ធ្វើឲ្យដំណាំថ្មីឆ្លងជំងឺ និងសត្វល្អិតពីរុក្ខជាតិចាស់ ហើយធ្វើឲ្យបាត់បង់ជីជីវជាតិដែលវាត្រូវការ។

ដំណាំគម្របដី

ជាដំណាំដែលអាចជួយឲ្យដីបង្កើនអាសូតតាមរយៈពពួកបាក់តេរីនៅក្នុងកំពកឫសរបស់រុក្ខជាតិគម្របដី ហើយកំពកឫសរបស់វាបានស្រូបយកអាសូតពីបរិកាសចូលទៅក្នុងដីផងដែរ។ ការដាំដំណាំគម្របដីធ្វើឲ្យកាត់បន្ថយស្មៅ ការហូរច្រោះដី និងរក្សាសំណើមដី។ ប្រភេទដំណាំគម្របដីរួមមាន ពពួកសណ្ដែក ចង្ក្រងស្វារ ស្នោរគោក និងរុក្ខជាតិដទៃទៀត។

ប្រើប្រាស់សារធាតុសរីរាង្គ

សារធាតុសរីរាង្គសំដៅទៅលើប្រភេទកាកសំណល់រុក្ខជាតិ លាមកសត្វ(មាន់ គោរ ជ្រូក….) និងជីកំប៉ុស្តិ៍ជាដើម។ សារធាតុសរីរាង្គធ្វើអោយប្រសើរឡើងនូវរចនាសម្ព័ន្ធដី លើកកម្ពស់សកម្មភាពអតិសុខុមប្រាណរបស់ដី និងបង្កើនសមត្ថភាពផ្ទុកសារធាតុចិញ្ចឹម។ ម្យ៉ាងទៀតសារធាតុសរីរាង្គក៏ជាកាតាលីករជំរុញឲ្យដីធូរ មានខ្យល់ចេញចូលល្អ និងរុក្ខជាតិងាយដុះលូតលាស់ឫសជាដើម។

ការប្រើប្រាស់ជី

មានន័យថាដីតែងត្រូវការនូវប្រភេទជាណាមួយដែលបានបាត់បង់ទៅក្រោយពេលដាំដំណាំ ព្រោះជីនៅក្នុងដីងាយនឹងបាត់បង់តាមរយៈទឹកហូរចូលទៅក្នុងដី និងរុក្ខជាតិស្រូបយក។ ដើម្បីអាចដឹងថាដីខ្វះនូវតុល្យភាពជីវជាតិណាមួយគេអាចធ្វើតេស្តដីជាប្រចាំ ដើម្បីជៀសវាងអតុល្យភាពសារធាតុចិញ្ចឹម ឬការបំពុលបរិស្ថាន។ រីឯការគ្រប់គ្រងpHដីជាការធ្វើតេស្ត pH ដី និងកែតម្រូវវាប្រសិនបើចាំបាច់ ព្រោះpHដីបានជួយឲ្យរុក្ខជាតិអាចស្រូប យកសារធាតុចិញ្ចឹមបានយ៉ាងមានប្រសិទ្ធភាព។ ចំណាំ៖ មិនត្រូវប្រើប្រាស់ជីសំយោគ ឬជាជីគីមីដែលអាចធ្វើឲ្យដីខូចគុណភាពឡើយ។

ប្រព័ន្ធធារាសាស្ត្រ&ការគ្រប់គ្រងទឹក

គឺជាការប្រើប្រាស់ប្រព័ន្ធទឹកដែលអាចជួយកាត់បន្ថយសំណឹកដីដោយសារទឹក ការហូរជ្រោះដី និងអាចរក្សារសំណើមបានល្អ។ គេអាចប្រើប្រាស់នូវប្រភេទប្រព័ន្ធទឹកដូចជា ប្រព័ន្ធតំណក់ទឹក(ប៉ុន្តែវាក៏អាស្រ័យទៅលើប្រភេទដំណាំ និងក្បាលចេញទឹកផងដែរ)។

ឯកសារយោង

• https://www.khsearch.com
• https://globalcheck.com.vn