នៅពេលដែលយើងសល់ដីនៅផ្នែកចំហៀងផ្ទះ យើងមិនគួរទុកវាចោលឡើយ ដោយអាចកែច្នៃទៅជាសួនបន្លែតូចមួយ ដើម្បីជួយកាត់បន្ថយការចំណាយ និងបានជាសោភណ្ឌភាពផ្ទះជាដើម។ ត្បិតតែវាតូចចង្អៀតប៉ុន្តែយើងអាចរៀបចំវាឲ្យមើលទៅស្អាត និងមានផាសុខភាពផងដែរ។ ការដាំបន្លែតិចតួចនៅផ្ទះ វាមិនត្រឹមតែជួយយើងអាចបរិភោគបានបន្លែស្រស់តែមួយមុខនោះទេថែមទាំងផ្តល់នូវបរិយាកាសដ៏ល្អមួយឬជាការហាត់ប្រាណនៅពេលទំនេរសម្រាប់អ្នកមិនសូវមានពេលវេលាច្រើន។ ខាងក្រោមនេះជាបច្ចេកទេស និងប្រភេទបន្លែដែលគួរដាំ៖
ស្ពៃក្ដោប
ជាស្ពៃដែលអាចដាំបាននៅទីតាំងតូចចង្អៀត ១-២m ហើយវាក៏មានរូបសម្រស់ស្រស់ស្អាត និងទាក់ទាញផងដែរ។
- បច្ចេកទេសរៀបចំដី៖ ដោយដាំនៅក្នុងថូ ឬបាវ ហើយជ្រកដីឲ្យពេញក្នុងកម្ពស់២០-៣០cmព្រោះឫសរបស់វាអាចលូតបានចន្លោះ ១៥-២០cm។
- ការបណ្ដុះកូន៖ គេអាចបណ្ដុះកូនស្ពៃនៅក្នុងត្រេឬកូនថង់តូចៗនៅពេលដែលវាដុះបានស្លឹក៤-៥ទើបអាចយកមកដាំនៅផើងឬថូបាន។
- របៀបដាំ៖ នៅពេលដាំគួរដាក់ជីទ្រាប់បាតសម្រាប់កូនស្ពៃ ប៉ុន្តែប្រសិនបើដីនោះជាដីកំប៉ុស្តិ៍មិនបាច់ដាក់ទៀតក៏បានដែរ។
- ការដាក់ជី៖ ស្ពៃនេះត្រូវការសារធាតុចិញ្ចឹមអាសូត(ជីអ៊ុយរ៉េ)ច្រើនជាងគេដោយអាចដាក់នៅសប្ដាហ៍ទី៣ក្រោយដាំ និងសប្ដាហ៍ទី៦មានន័យថាដាក់តែ២ដងរហូតដល់ប្រមូលផល។ ម្យ៉ាងទៀតគេអាចអនុវត្តន៍តាមរូបមន្តនេះNPK(១០-៥-៥)។ ហើយគេត្រូវផ្តាច់ទឹកនៅរយៈពេល២ខែក្រោយដាំដើម្បីឲ្យវាឆាប់ក្ដោប។
- រយៈពេលប្រមូលផល៖ ដំណាំមួយនេះមានរយៈពេលចន្លោះ ៧០-១២០ថ្ងៃ។ ប៉ុន្តែបន្ទាប់ពីដាំនៅចន្លោះរយៈពេល ៧០-១២០ថ្ងៃនៅមិនទាន់ឃើញវាក្ដោបទៀតមានន័យថាការដាំដុះរបស់យើងពុំទទួលបានជោគជ័យឡើយ។
ខ្ទឹមស្លឹក
គេអាចដាំខ្ទឹមស្លឹកនៅចន្លោះរបងផ្ទះដោយដាំនៅលើផើងដាក់ដី និងដាំដោយព្យួរដាក់ដបទឹកទៅតាមជញ្ជាំងរបងឬធ្វើថ្នើរជាដើម។
- ការរៀបចំដី៖ ដោយដាក់ដីលាយជាមួយស្រកីដូងឬអង្កាមដើម្បីឲ្យវាធូរឬទិញដីកំប៉ុស្តិ៍ដែលលក់នៅលើទីផ្សារស្រាប់។ បន្ទាប់មកដាក់ដីចូលក្នុងផើងជ័រឬបាវ ឬដបទឹកដែលប្រើប្រាស់រួចដោយចោះប្រលោះល្មមនឹងមើមខ្ទឹមក្នុងមួយកំពឹសផងដែរ។
- ការប្រើប្រាស់ជី៖ ប្រសិនជាដីដែលមានកំប៉ុស្តិ៍ស្រាប់គេគ្រាន់តែបន្ថែមអ៊ុយរ៉េ និងផូស្វ័របន្ទិចបន្ទួចដើម្បីឲ្យវាកាន់តែលូតលាស់បានល្អ។
ម្ទេស
ម្ទេសជាដំណាំដែលដុះលូតលាស់មិនរើសទីតាំង និងសមស្របសម្រាប់ដាំនៅក្រោមម្លប់ផងដែរ។ ការរៀបចំដីសម្រាប់ម្ទេសក៏មិនខុសអ្វីពីការរៀបចំដីដាំខ្ទឹមស្លឹកឡើយ។ រីឯការជ្រើសរើសផងត្រូវជ្រើសផើងណាដែលមានជម្រៅជ្រៅល្មមដើម្បីឲ្យឫសរបស់ម្ទេសអាចលូតលាស់បានល្អ និងមិនឆាប់ស្លាប់។ ប៉ុន្តែ បើដីនោះជាដីកំប៉ុស្តិ៍ស្រាប់គេអាចដាក់ប្រភេទជីកែងទូទៅដែលមានលក់នៅលើទីផ្សារ។ ការស្រោចស្រពវិញគេអាចស្រោចវាដោយមើលសំណើមដីប្រសិនជាមានសំណើមហើយមិនបាច់ស្រោចវាញឹកញ៉ាប់ពេកទេ។
ខ្ទឹមបារាំង
ដំណាំនេះជាប្រភេទមើមដែលគេអាចដាំបានតាមរយៈមើមលក់នៅតាមទីផ្សារ ឬដាំតាមរយៈគ្រាប់ដោយយើងត្រូវបណ្ដុះគ្រាប់នោះជាមុនសិន។
- ការបណ្ដុះគ្រាប់ឬជ្រើសរើសមើម៖ យកគ្រាប់ទៅត្រាំទឹកដើម្បីដាស់ដំណេកគ្រាប់ឲ្យវាឆាប់ដុះបានលឿនគេអាចត្រាំរយៈពេល៣-៤ម៉ោងឬរហូតដល់១២ម៉ោង បន្ទាប់មកយកគ្រាប់ដាក់លើក្រដាស់ជូតមាត់ រួចបណ្ដុះក្នុងត្រេឬផើង។ រីឯការដាំដោយមើមត្រូវរើសមើមណាដែលមានសុខភាពល្អនៅជាប់សំបកចាស់ហើយមិនធំពេក។
- ការរៀបចំដី៖ គេអាចយកដីដែលលក់នៅតាមទីផ្សារឬលាយដីដោយខ្លួនឯង គ្រាន់តែយកស្រកីដូងឬអង្កាម២០% ដីខ្សាច់ ៣០% ដីធម្មតាឬដីកំប៉ុស្តិ៍ ៥០%។
- សារធាតុចិញ្ចឹម៖ ខ្ទឹមបារាំងជាដំណាំមើមវាត្រូវការផូស្វ័រច្រើន និងអាសូត&ប៉ូតាស្យូមតិចជាង។
ប៉េងប៉ោះ
ដំណាំនេះងាយស្រួលដាំ និងត្រូវការប្រើប្រាស់ញឹកញាប់ព្រោះវាអាចកែច្នៃធ្វើជាម្ហូបច្រើនមុខមិនចាញ់ដំណាំដទៃឡើយ។
- ការបណ្ដុះគ្រាប់៖ ត្រាំគ្រាប់រយៈពេល៣-៤ម៉ោងឬ១២ម៉ោង បន្ទាប់មកសំដិលឲ្យស្ងួតល្មមស្រួលចាប់ដាក់ក្នុងត្រេឬផើង។ បើបណ្ដុះវាក្រៅផើងត្រូវទុករហូតវាមានស្លឹក៤-៥ទើបអាចយកមកដាំក្នុងផើងបាន។
- ដី៖ គេអាចរៀបចំដីដូចទៅនឹងដំណាំខាងលើដែរ ហើយការស្រោចទឹករបស់វាមួយថ្ងៃប៉ុន្មានដងឬក្នុងមួយសប្ដាហ៍ប៉ុន្មានដងក៏ផ្អែកលើសំណើមដីដែរប្រសិនបើវានៅមានសំណើមមិនចាំបាច់ស្រោចទេជៀសវាងកើតជំងឺផ្សិតឬបាក់តេរីក្រោមដី។
ដំណាំដទៃទៀត
ក្រៅពីដំណាំខាងលើនេះគេក៏អាចដាំជាប្រភេទដំណាំគ្រឿងទេសមួយចំនួនធំដូចជា៖ ជីរណា ជីនាងវង ស្លឹកក្រី រំដេង រមៀត ខ្ជាយ ជីម្រះព្រៅ ជីឆ្អាប និងជីដទៃទៀត។ ម្យ៉ាងទៀតគេអាចដាំដំណាំបន្លែដទៃទៀតដូចជាសាឡាត់ ពោតបារាំង ស្ពៃក្រញាញ់ ស្ពៃឆួលឬស្ពៃខ្មៅ និងស្ពៃដទៃជាច្រើនទៀត។
#ចំណាំ៖ វិធីសាស្ត្រដាំដុះនេះជាវិធីសាស្ត្រសាមញ្ញងាយៗដែលយើងអាចដាំបាននៅតាមផ្ទះជាលក្ខណៈផើង និងសួនតូចៗតែប៉ុណ្ណោះ។
ឯកសារយោង
