តោះមកដឹងពីអត្ថន័យក្រូចខ្វិចរបស់ជនជាតិចិនដែលគេនិយមសែននៅថ្ងៃចូលឆ្នាំចិន

ដើមក្រូចខ្វិច (Calamondin orange) គឺជាដើមឈើដាំក្នុងផ្ទះដ៏ល្អបំផុតមួយ ងាយស្រួលដាំដុះ ហើយស្រស់ស្អាតផងដែរ! ដើមក្រូចនេះមានប្រភពពីប្រទេសចិនហើយយើងឃើញថាក្នុងអំឡុងពេលចូលឆ្នាំចិនយើងប្រទះឃើញវាច្រើននៅតាមផ្ទះ។ ថ្ងៃនេះ admin សូមមកពន្យល់បន្ថែមអំពីអត្ថន័យរុក្ខជាតិនេះសម្រាប់ជនជាតិចិននិងរបៀបថែរក្សាវា។ 

ក្នុងថ្ងៃចូលឆ្នាំចិនជនជាតិចិនចូលចិត្តទិញដើមនេះមកលំអនៅផ្ទះនិងជូនជាអំណោយដល់ គ្រួសារ បងប្អូន មិត្តភក្តិពីព្រោះចំពោះពួកគេដើមក្រូចនាំសំណាងនិងជោគជ័យសម្រាប់ឆ្នាំថ្មីដោយសារពាក្យ “ក្រូចខ្វិច” នេះក្នុងភាសាចិននិយាយទៅស្រដៀងគ្នាទៅនឹងពាក្យ “ទ្រព្យសម្បត្តិ” ក្នុងភាសាចិនចំណែកពណ៌ទឹកក្រូចមាសរបស់ក្រូចខ្វិចនេះតំណាងឱ្យលុយ-កាក់។ ហើយបន្ថែមទៀតភាគច្រើនគេដាក់ហុងប៉ាវ ឬអាំងប៉ាវលើមែកឈើ។

របៀបថែរក្សាវាក្នុងផ្ទះ

1. ពន្លឺព្រះអាទិត្យ – ផ្តល់ពន្លឺព្រះអាទិត្យយ៉ាងហោចណាស់ 4 ម៉ោងជារៀងរាល់ថ្ងៃ។
2. ស្រោចទឹក – ទុកឲ្យដីខាងលើស្ងួតមុនពេលស្រោចទឹក រួចស្រោចទឹកដើមឈើតាមតម្រូវការដើម្បីឱ្យដីមានសំណើមប៉ុន្តែកុំឱ្យវាសើមពេកព្រោះនៅពេលដីសើមជោគពេកនឹងធ្វើឱ្យឫសរលួយនាំឱ្យដើមក្រូចងាប់។
3. ជីវជាតិ- ប្រើជីដើមឈើសរីរាង្គព្រោះវាមានសារធាតុចិញ្ចឹមដែលដើមក្រូចត្រូវការសម្រាប់ការលូតលាស់ឱ្យផ្លែឈើ មានសុខភាពល្អ។
4. ពិនិត្យប្រចាំ- ដោយសារតែរុក្ខជាតិនេះបង្កើតផលដែលអាចបរិភោគបានដូច្នេះវាអាចមានសត្វល្អិតតូចៗដែលមានពណ៌ត្នោត រាងមូល យើងគួរត្រួតពិនិត្យមើលឱ្យញឹកញាប់។
5. កាត់- កាត់មែកឬឬសដែលរលួយបោះចោល។