ផ្កាចម្ប៉ាឬ Champacaជាផ្កាមួយប្រភេទដែលមានក្លិនក្រអូបខុសប្លែកពីផ្កាធម្មតា ហើយមានកម្ពស់ពី៣-៦m។ ប្រជាជនកម្ពុជាភាគច្រើនដាំផ្កានេះដើម្បីលម្អផ្ទះ និងបេះយកផ្កាដើម្បីថ្វាយព្រះជាដើម។ ទទឹមនឹងនេះការដាំដុះផ្កានេះក៏មានភាពងាយស្រួលផងដែរ ដោយគេអាចដាំបានតាមរយៈ«៣»វិធី ដូចខាងក្រោម៖

ប្រភេទពណ៌នៃផ្កាចម្ប៉ា

• ផ្កាចម្ប៉ាពណ៌ស
• ផ្កាចម្ប៉ាពណ៌លឿង
• ផ្កាចម្ប៉ាពណ៌ក្រហម
• និងពណ៌ផ្កាឈូក

ដាំដោយគ្រាប់

គេអាចដាំផ្កាចម្ប៉ាតាមរយៈគ្រាប់ដូចរុក្ខជាតិដទៃដែរដោយដំបូងត្រូវត្រាំគ្រាប់នោះជាមុនសិនដើម្បីដាស់ដំណេកគ្រាប់ឲ្យឆាប់ដុះពន្លក។ បន្ទាប់មកយកគ្រាប់ដែលត្រាំរយៈពេលមួយយប់នោះទៅបណ្ដុះនៅក្នុងដីបណ្ដុះដែលយើងបានរៀបចំរួច ហើយស្រោចទឹកឲ្យវាមានសំណើមល្មមប៉ុន្តែមិនត្រូវឲ្យជាំទឹកពេកទេជៀសវាងរលួយគ្រាប់។ ក្រោយពីបណ្ដុះបានកម្ពស់៣០cm(បូកថង់)គេអាចយកទៅដាំបាន។

ការតមែកដោយសៀតចំមែកឈើ

គេអាចតមែកដើមចម្ប៉ាបានលុះត្រាតែជើងទម្រជាប្រភេទគ្រួសារតែមួយ ដែលចម្ប៉ាមកពីគ្រួសារMagnoliaceae។ ចំពោះការតមែកចម្ប៉ាមានវិធីសាស្ត្រដូចជា៖

• ជ្រើសរើសជើងទម្រដែលមានសុខភាពល្អ និងមាំ
• ពុះជើងទម្រឲ្យចំកណ្ដាលឲ្យជ្រៅល្មម
• យកមែកចម្ប៉ាដែលមានសំបកពណ៌បៃតងដោយបេះស្លឹកចេញហើយមកជិតសង្ខាងរៀងសំប៉ែត រួចដាក់ចូលក្នុងជើងទម្រដែលសំបកមែក និងជើងទម្រដាក់ឲ្យស្មើគ្នា
• បន្ទាប់មកយកស្គត់ប្លាស្ទិចមករុំជុំវិញទីតាំងតដើម្បីបង្ការមិនឲ្យចូលទឹក

ផ្សាំមែក

• ជ្រើសរើសថង់ប្លាស្ទិចឬកែវជ័រដើម្បីដាក់ដីរុំជុំវិញដើម
• យកដី ឬ ស្រកីដូងទៅត្រាំទឹករហូតដល់ជួកទឹកល្អ បន្ទាប់មកលើកវាចេញពីទឹករហូតដល់ស្រក់ទឹក
• រើសយកមែកណាដែលចាស់ល្មមឬអាយុ១ឆ្នាំ ត្រូវប្រាកដថាមែកនោះមិនមានការបំផ្លាញដោយសត្វល្អិតឬជំងឺឡើយ
• ចៀរសំបកមែកចោលរហូតដល់សាច់ឈើក្នុងទំហំសមល្មមនឹងដីដែលរៀបចំរួច
• ជូតត្រង់ចំណុចជានោះឲ្យស្ងួតល្អ រួចលៀបថ្នាំបណ្ដុះឫសដើម្បីឲ្យវាឆាប់ដុះឫស
• បន្ទាប់មកយកដីដែលរៀបចំរួចទៅចងឲ្យជិតនៅត្រង់ចំណុចចៀរនោះ
• ទុករយៈពេល២ខែ ឬ រហូតដល់វាដុះឫស
• ក្រោយមកកាត់មែកនោះនៅផ្នែកខាងក្រោមឫសប្រហែល២-៣cm ហើយដាក់បណ្ដុះក្នុងថង់ដើម្បីផ្សាំវាមានសុខភាពរឹងមាំជាងមុន ហើយចាំយកទៅដាំនៅពេលក្រោយ។

ឯកសារយោង

• https://en.m.wikipedia.org/wiki
• https://nurserylive.com