ជាទូទៅទឹកបានដើរតួនាទីយ៉ាងសំខាន់ក្នុងការផលិតអាហាររបស់រុក្ខជាតិ ដើម្បីចិញ្ចឹមសរីរាង្គទាំងមូលរបស់វា។ ប៉ុន្តែរុក្ខជាតិត្រូវការទឹកទៅតាមបរិមាណកំណត់របស់មួយ ព្រមទាំងមានពេលវេលាត្រឹមត្រូវសម្រាប់ស្រូបយកទឹកតាមរយៈឫសផងដែរ។ ខាងក្រោមនេះគឺជាចំណេះដឹងមួយចំនួនដែលទាក់ទងទៅនឹងការស្រោចស្រពទឹកចំពោះរុក្ខជាតិ។
ស្រោចនៅពេលព្រឹក
ជាពេលវេលាល្អបំផុត ព្រោះសីតុណ្ហភាពនៅព្រឹកប្រលឹម មានលក្ខណៈត្រជាក់ដែលធ្វើឲ្យទឹកអាចចូលទៅក្នុងដីបានមុនពេលថ្ងៃក្ដៅខ្លាំង ដោយសារតែកម្ដៅថ្ងៃក្ដៅពេកអាចបណ្ដាលឲ្យទឹកឆាប់ហួតលឿន។ ម្យ៉ាងទៀតការស្រោចស្រព នៅពេលព្រឹកវាជួយបង្កើតសំណើមសម្រាប់ដំណាំពេញមួយថ្ងៃ ហើយធ្វើឲ្យវាងាយស្រួលក្នុងការស្រូបយកសារធាតុចិញ្ចឹមពីដីកាន់តែមានប្រសិទ្ធភាព និងបង្កើនល្បឿននៃការលូតលាស់កាន់តែល្អជាងមុន។ រុក្ខជាតិត្រូវការទឹកនៅពេលព្រឹកសម្រាប់ ធ្វើរស្មីសំយោគនៅពេលមានពន្លឺថ្ងៃ ដើម្បីផលិតជាអាហារ និងថាមពលចិញ្ចឹមសរីរាង្គរបស់វា។ មួយវិញទៀតការផ្តល់ទឹកឲ្យបានមុនថ្ងៃត្រង់អាចការពាររុក្ខជាតិពីការកើតនូវជំងឺផ្សិតជាដើម ដោយសារតែអាចទុកឱកាសឲ្យស្លឹកអាចស្ងួតបានទាន់ពេលវេលា។
ស្រោចស្រពនៅពេលល្ងាច
ការស្រោចទឹកនៅពេលល្ងាចវាមិនសូវអំណោយផលសម្រាប់រុក្ខជាតិប៉ុន្មានទេ ប៉ុន្តែវាក៏ល្អជាងស្រោចពេលថ្ងៃត្រង់ដែរ។ ស្រោចនៅពេលល្ងាចធ្វើឲ្យទឹកមិនឆាប់ហួត ហើយផ្ដល់សំណើមបានយូរសម្រាប់រុក្ខជាតិចេញផ្កា ម្យ៉ាងទៀតវាក៏ជួយឲ្យដីត្រជាក់បានល្អសម្រាប់រដូវក្ដៅ។ ដោយឡែកប្រសិនបើសំណើមសើមយូរពេកវាអាចជាឱកាសល្អសម្រាប់ពពួកជំងឺផ្សិតវិវត្តិខ្លួន។ តួយ៉ាងនៅពេលដែលស្លឹកសើមវាជាការទាក់ទាញនូវពពួកសត្វល្អិតមកឲ្យសុីស្លឹក រីឯដីសើមពេកក៏អាចធ្វើឲ្យឫសដំណាំឆាប់រលួយផងដែរ។
ក្រោយភ្លៀង(សម្រាប់បន្លែ និងឈើហូបផ្លែ)
- បន្លែ៖ ដោយប្រភេទយកស្លឹកដូចជាពពួកស្ពៃ ដែលក្រោយភ្លៀងរួចកសិកម្មខ្មែរមួយចំនួនធំតែងតែធ្វើការស្រោចទឹកដើម្បីលាងដីដែលខ្ទៀតដោយសារតំណក់ទឹកភ្លៀង។ ការស្រោចបែបនេះអាចការពាការរលួយនៃស្លឹកដំណាំ ប៉ុន្តែមុននឹងស្រោចយើងគួរមើលតើភ្លៀងនោះជាប្រភេទបែបណាភ្លៀងគ្រាប់ធំឬគ្រាប់តូចបើភ្លៀងគ្រាប់តូចមិនគួរណាស្រោចទឹកលាងស្លឹកម្ដងទៀតទេវាអាចបណ្ដាលឲ្យយើងខាតថវិកា និងពេលវេលា។(ត្រូវចាំថាទឹកភ្លៀងមិនមែនជាអ្នកបង្កឲ្យស្លឹកបន្លែស្អុយឬរលួយទេ)។ ឧទាហរណ៍៖ ស្ពៃក្ដោបត្រូវការទឹក ៣៥០-៥០០mm/រដូវ……..
- ឈើហូបផ្លែ៖ នៅពេលក្រោយភ្លៀងមិនមែនគ្រប់ដំណាំទាំងអស់សុទ្ធតែបានទទួលទឹកគ្រប់គ្រាន់តាមតម្រូវការរបស់វាឡើយ។ ការស្រោចទឹក ឬមិនស្រោចទឹកក្រោយភ្លៀងរួច វាអាស្រ័យទៅលើប្រភេទដំណាំ និងចំនួនម៉ោងឬកម្ពស់នៃទឹកភ្លៀងដែលធ្លាក់នៅពេលនោះដែរ។ ដូច្នេះហើយនៅពេលដាំដំណាំអ្វីមួយកសិកម្មគួរតែសិក្សាពីបរិមាណទឹកដែលរុក្ខជាតិត្រូវការក្នុងមួយថ្ងៃប៉ុន្មានឲ្យបានច្បាស់លាស់ជាមុនសិន ទើបមិនធ្វើឲ្យយើងខាតទឹក ថវិកា ពេលវេលា និងបាត់បង់បរិមាណឬគុណភាពនៃទិន្នផលដំណាំ។ ឧទាហរណ៍៖ ក្រូចត្រូវការទឹក ៩០០-១២០០mm/រដូវ……..
មួយថ្ងៃគួរស្រោចទឹកចំនួនប៉ុន្មានដង
សំណើមដែលល្អបំផុតសម្រាប់រុក្ខជាតិចន្លោះ ៧០-៩០% ដែលអាចឲ្យឫសស្រូបយកទឹកបានត្រឹមត្រូវ និងមិនបង្កឲ្យមានហានិភ័យរលួយឫស។ ដើម្បីដឹងពីកម្រិតសំណើមដីកសិករគួរតែមានឧបករណ៍វាស់សំណើមមួយសម្រាប់ជាជំនួយជៀសជាងការមើលដោយប្រហែលឬស្មាន។ រីឯការស្រោចទឹកមួយថ្ងៃប៉ុន្មានដងវាអាស្រ័យទៅលើលក្ខណៈភូមិសាស្ត្ររបស់ដីជាប្រភេទដីឥដ្ឋ ដីល្បាប់ ដីខ្សាច់ ឬល្បាយខ្សាច់លាយឥដ្ឋ។ ព្រោះដីប្រភេទនីមួយៗលទ្ធភាពនៃជម្រាបទឹក និងសំណើមមានលក្ខណៈខុសគ្នាៗ ហើយវាក៏ផ្អែកលើស្ថានភាពអាកាសធាតុដែរ។ មួយវិញទៀតចំនួនដងនៃការស្រោចទឹកវាក៏ឋិតនៅលើប្រភេទអាយុនៃដំណាំបើឈើហូបផ្លែនៅអាយុតិចអាចស្រោចញឹកជាងអាយុច្រើនឬពេញវ័យ។ ឧទាហរណ៍៖ ដីឥដ្ឋត្រូវស្រោចទឹកពី ៧-១០ថ្ងៃព្រោះវារក្សាសំណើមបានយូរស្រោចញឹកពេកអាចរលួយឫស។ ដីល្បាយខ្សាច់ ភាពជម្រាបទឹករបស់វាលឿន និងរក្សាសំណើមបានខ្លីគេអាចស្រោច ២-៣/ថ្ងៃ ឬច្រើនជាងនេះ។
គុណវិបត្តិនៃការស្រោចទឹកលើសតម្រូវការរបស់រុក្ខជាតិ
- សំណើមខ្លាំងពេកធ្វើឲ្យងាយកើតជំងឺផ្សិត បាក់តេរី និងសត្វល្អិត
- ជាំទឹកបណ្ដាលឲ្យឫសឆាប់រលួយ
- ប៉ះពាល់ដល់បរិមាណទិន្នផលដែលរុក្ខជាតិអាចផ្តល់ឲ្យក្នុងមួយរដូវ
- ធ្វើឲ្យខូចគុណភាពនៃរសជាតិដំណាំ(ដូចជាដំណាំធុរេនមិនត្រូវស្រោចទឹកមុនពេលប្រមូលផល ៣សប្ដាហ៍ឡើយ ព្រោះស្រោចទឹកច្រើនពេកធ្វើឲ្យផ្លែមិនរមួត ទឹកៗ និងមិនផ្អែមឆ្ងាញ់ដូចធុរេនផ្ដាច់ទឹកផងដែរ)
- ទឹកច្រើនពេកធ្វើឲ្យកង្វះសារធាតុចិញ្ចឹមដែលហូរចេញពីតំបន់នៃឫសទៅដីស្រទាប់ក្រោម
#ចំណាំ៖ មុននឹងដាំដំណាំណាមួយកសិករគួរតែសិក្សាស្រាវជ្រាវឬពិភាក្សាជាមួយអ្នកជំនាញនូវតម្រូវការនៃ បរិមាណទឹកដែលដំណាំនោះត្រូវការជាមុនសិន។
ឯកសារយោង
