អាហ្សូឡា (Azolla) គឺជាប្រភេទរុក្ខជាតិដែលដុះលើផ្ទៃទឹកមួយប្រភេទប្រហាក់ប្រហែលនឹងចកដែរ។ ពូជអាហ្សូឡា មានចំនួន៧ប្រភេទ ដោយឡែកនៅក្នុងប្រទេសកម្ពុជានិងថៃ គេសង្កេតឃើញមានពូជអាហ្សួឡាតែ២ប្រភេទប៉ុណ្ណោះ ពោលគឺពូជអាហ្សូឡា ភីណាតា (Azolla Pinnata) គឺជាពូជដែលមានដើមកំណើតក្នុងស្រុកស្ថិតនៅតាមប្រភពទឹកស្ទឹង បឹងបួរ ទន្លេ… វាមានដើមល្អិតតូចនិងលូតលាស់យឺត។មួយទៀត គឺពូជអាហ្សូឡា មីក្រូហ្វីឡា (Azolla Mycropjylla) គឺជាពូជដែលអ្នកវិទ្យាសាស្ត្របរទេសផ្សំបង្កាត់ពូជដើម្បីបម្រើដល់វិស័យកសិកម្ម។ វាមានដើមធំ លូតលាស់ឆាប់រហ័ស មានប្រូតេអ៊ីន និងមានសារធាតុចិញ្ចឹមចាំបាច់ច្រើនមុខទៀត ពោលគឺជាពូជដែលមានជំនាញការកសិកម្មណែនាំដល់កសិករដាំ ដើម្បីជីសម្រាប់ដំណាំ និងធ្វើជាចំណីសត្វ។
របៀបដាំដុះ
ដំបូងឡើយគឺត្រូវការមានស្រះ ឬក៏អាងដែលមានជម្រៅទឹកប្រមាណ ១០-២០ សង់ទីម៉ែ្រត ហើយកាន់តែងាយស្រួលគឺអាចប្រើតង់ដើម្បីធ្វើជាអាងតែម្ដង អាចប្រើទំហំអាងដាំអាសូឡា ៣×១០ ម៉ែ្រត ទៅតាមតម្រូវការ។ ក្រៅពីនេះគេត្រូវការធ្វើដំបូលស្បៃសម្រាប់គ្របកុំឱ្យត្រូវកម្ដៅថ្ងៃខ្លាំងពេក និងធ្វើឲ្យអាសូឡាខ្ចីល្អ រួមជាមួយនឹងការដាក់ជីដែលបានមកពីលាមកគោ ឬមាន់ ដាក់ចូលទៅក្នុងទឹក ហើយយកពូជអាសូឡាមកដាក់ជាការស្រេច។ សម្រាប់ស្រះ ឬអាងទឹកដែលមានទំហំ ៣×១០ ម៉ែ្រត អាចដាក់ជីលាមកគោប្រមាណ ៣ធុងប៉េត្រូ និងដាក់កូនអាសូឡាចូលប្រមាណ ៥-១០គីឡូក្រាម ហើយរង់ចាំប្រមូលផលតែម្ដង។
ការថែទាំ
ដោយឡែកទាក់ទងទៅនឹងការថែទាំគឺកាន់តែងាយស្រួលបំផុត ដោយក្រោយពេលដាក់ជីចូលក្នុងស្រះ ឬអាងទឹកទុកចោលរយៈពេល២ថ្ងៃ គឺអាចដាក់កូនអាសូឡាចូលបាន ហើយត្រូវថែមជីរៀងរាល់ខែ និងមើលទឹកក្នុងអាង ឬស្រះកុំឱ្យរីងជាការស្រេច។
ការប្រមូលផល
ក្រោយពីការដាំដុះ យើងត្រូវការយៈពេលត្រឹមមួយសប្ដាហ៍ ឬយ៉ាងយូរ១០ថ្ងៃ គឺអាចដងយកអាសូឡាឱ្យសត្វស៊ីបាន ហើយវានឹងដុះជាបន្តបន្ទាប់មិនងាយអស់នោះឡើយ។ យ៉ាងណាមិញ ចំពោះផលលំបាកនៃការដាំ ហាក់មិនសូវមានជួបប្រទះនោះទេ។
អត្ថប្រយោជន៍
អាហ្សូឡា វាមានទំហំតូចអណ្ដែតលើផ្ទៃទឹក ហើយស្លឹករបស់វាជាជម្រករបស់បាក់តេរីឈ្មោះថា Anabenea ដែលមានតួនាទីចាប់យកអាសូតពីបរិយាកាសរួចផ្ដល់ឱ្យទៅដំណាំ និងចំណីសត្វដោយសារតែវាសម្បូរទៅដោយប្រូតេអ៊ីនអាស៊ីតអាមីណូសំខាន់វីតាមីន (វីតាមីន A, វីតាមីន B12, Beta Carotene), អន្តរការីនៃការលូតលាស់និងសារធាតុរ៉ែ។ អ្វីដែលពិសេសជាងនេះទៅទៀតគឺការពង្រីកពូជរបស់វាលឿនហួសពីការរំពឹងទុក គឺត្រឹមតែរយះពេល ៣ ទៅ ៥ ថ្ងៃតែប៉ុននោះ វាអាចមានសមត្ថភាពបង្កើតកូនចៅគុណទ្វេដង។ម្យ៉ាងទៀតអាសូឡាជាចំណីសម្រាប់(បក្សី ត្រី និងល្មូន)៖ ដូចជា ត្រី ទា មាន់ និងសត្វជាច្រើនទៀតដែលលោក អ្នកចិញ្ចឹមហើយអាសូឡាវាជួយបង្កើនអាស៊ីនអាមីណូ ដែលជាអាស៊ីនមានប្រយោជន៍សម្រាប់សត្វ ជួយដល់ក្រពេះ ពោះវៀន របស់សត្វនិងជួយបំលែងសារធាតុល្អុយរលួយដែលមាននៅក្នុងស្រះ ឬកន្លែងចិញ្ចឹមជួយប្រព័ន្ធរាង្គកាយសត្វអោយមានសុខភាពល្អ។
ឯកសារយោង
