ដំណាំក្រូចឌឿង(ក្រូចតែជ្រក់)

Calamansi (ក្រូចតែជ្រក់)មានដើមកំណើតនៅប្រទេសហ្វីលីពីន ផ្នែកខ្លះនៃប្រទេសឥណ្ឌូនេស៊ី ម៉ាឡេស៊ី និងប្រុយណេក៏ដូចជាផ្នែកខ្លះនៃភាគខាងត្បូងប្រទេសចិននិងតៃវ៉ាន់។អ្នកដឹងទេថាទឹករបស់ក្រូចតែជ្រក់ឬក្រូចឌឿងមានអត្ថប្រយោជន៍ជាច្រើនដូចជា បញ្ចុះកូឡេសេរ៉ុល ពង្រឹងភាពសុំា ជំនួយក្នុងការសម្រក់គីឡូ កាត់បន្ថយក្លិនខ្លួន ការពារជំងឺទឹកនោគផ្អែម បង្កើនថាមពល និងសារធាតុប្រឆាំងអុកស៊ីតកម្ម។

ក្រូចនេះងាយស្រួលដាំនិងអាចផ្ដល់ទិន្នផលជាប្រចាំថ្ងៃទៀតផង ប៉ុន្ដែដូចជាមិនសូវមានអ្នកចាប់អារម្មណ៍ដាំវាទាល់តែសោះ ។

តម្រូវការដី និង អាកាសធាតុ

ក្រូចតែជ្រក់(ក្រូចឌឿង) លូតលាស់នៅកម្ពស់ទឹកភ្លៀង1500-2000ម.ម ក្នុងមួយឆ្នាំ ហើយកម្រិត pH 5.5-6.5 ។ ដីខ្សាច់ល្អ ឬដីឥដ្ឋដែលសម្បូរទៅដោយសារធាតុសរីរាង្គគឺល្អសម្រាប់ដំណាំប្រភេទនេះ។ជាទូទៅវាត្រូវបានគេដាំដុះនៅតំបន់ទំនាប។

សម្រាប់ពន្លឺវាត្រូវការ 6-8h ក្នុងមួយថ្ងៃ រីឯសីតុណ្ហភាពល្អបំផុតគឺ 20-30អង្សាសេបើទាបដល់12អង្សាសេក្រូចមិនលូតលាស់ល្អឬក្រិនផងដែរ។

ពូជ

សម្រាប់ពូជយើងអាចជ្រើសរើសជាកូន តមែក បំបៅ ឬ ក៏កូនបណ្ដុះក៏បាន។ សម្រាប់កូនតមែកឬបំបៅទទួលបានទិន្នផលលឿនជាង ប៉ុន្ដែប្រព័ន្ធឬសមិនសូវល្អទេ ។ រីឯកូនបណ្ដុះមានរយៈពេលយូរក្នុងការទទួលទិន្នផលគឺ 4-5 ឆ្នាំ ឬ 5-6 ឆ្នាំអាស្រ័យលើដីនិងការថែទាំ។

ការរៀបចំដីនិងដាំ

ដូចបានដឹងហើយថាប្រភេទដំណាំនេះមិនរើសដីដាំ ទេយើងអាចដាំបានទាំងដីទំនាបនិងភ្នំ។

• មុននិងដាំត្រូវភ្ជួរដីអោយធូរក៏ដូចជាសម្អាតស្មៅ
• ត្រូវជីករណ្ដៅដែលមានអង្កត់ផ្ចិត30cm និងមានជម្រៅ 40cm
• រួចដាក់ជីកំប៉ុស្ដិ៍ចូលក្នុងរណ្ដៅដើម្បីទ្រាប់បាត
• ដាក់ដាំកូនក្នុងរណ្ដៅដោយទុកដីជម្រៅ 10cmនៅខាងលើសម្រាប់ទប់ទឹក
• ចន្លោះគុម្ពនិងចន្លោះជួរគឺ 4m ជាមធ្យម ដោយមួយហិចតាបានចំនួន 625ដើម។

ការប្រមូលផល

ចំពោះកូនដែលផ្សាំឬបំបៅចាប់ផ្ដើមបង្កើនផលបណ្ដើរៗនៅអាយុ 2-3ឆ្នាំ នៅអាយុ5ឆ្នាំដើមនិមួយៗអោយផលជាមធ្យម 15kgដល់7ឆ្នាំកើនឡើងដល់25kg។ អ្វីកាន់តែពិសេសក្រូចនេះមានផ្លែជាប្រចាំ។ចំពោះការប្រមូលផលយើងប្រមូលផលពេលដែលផ្លែពណ៍បៃតងព្រោះវាលក់បានថ្លៃ ឯផ្លែទុំមិនអាចលក់បានឬមានតម្លៃថោក។

ឯកសារយោង

• https://www.weekand.com/home-garden/article/grow-calamansi
• https://www.naturescolours.com.au/how-to-care-for-a-calamondin-calamansi-tree/
• https://agraryo.com/agriculture/farming-calamansi-for-profit/