ការដាំដំណាំនៅក្នុងផើង ឬតាមសួននានាអាចទទួលបានលទ្ធ ផលជោគជ័យក៏អាស្រ័យទៅលើប្រភេទដីដែរ។ រីឯការលាយដីសម្រាប់ដាំដុះគឺជារឿងដ៏សំខាន់មួយដែលគួរយកចិត្តទុកដាក់។ ដីដាំគឺជាដីដែលមានការលាយបញ្ចូលជាមួយសារធាតុចិញ្ចឹមផ្សេងៗគ្នាដើម្បីឲ្យរុក្ខជាតិអាចលូតលាស់បានល្អ។ ចំណែកឯដីបណ្ដុះគឺជាល្បាយដែលគ្មានដី និងមិនមានលាយជាមួយនឹងសារធាតុចិញ្ចឹមឬមានតិចតួចបំផុត ហើយវាភាគច្រើនផ្សំឡើងដោយ ស្លែ ស្រកីដូងម៉ត់ Vermiculite, Perlite។

ដីដាំដំណាំ

ដីដាំជាដីដែលមានលក្ខណៈខុសពីដីបណ្ដុះ ហើយគេប្រើដីនេះភាគច្រើនសម្រាប់ដាំដំណាំនៅក្នុងផើង សួន និងអាចដាំជាលក្ខណៈរងធំៗទៅតាមអ្វីដែលយើងចង់បាន។

សមាសធាតុផ្សំ

• ស្រកីដូងម៉ត់ ឬ ផេះអង្កាម(ដែលបានដុតរួច)
• ជីមីក្រូសីរាង្គ ឬ លាមកសត្វ( លាមកមាន់ គោរ ចៀម…)
• កាកសំណល់សរីរាង្គ ឬជីកំប៉ុស្ដិ៍
• ដីល្បាប់, ដីខ្សាច់, ដីចាស់ដែលដាំដំណាំរួច
• ប្លាស្ទិក ឬតង់សម្រាប់ក្រាលលាយដី
• ប៉ែល ឬចប
• និងទឹក

បច្ចេកទេសលាយដី

• ស្រកីដូងម៉ត់ត្រូវយកស្រកីដែលកិនចេញពីដូងទុំបរិមាណ ១/៣ ឬប្រើផេះអង្កាមក្នុងបរិមាណ ១/៣ ដូចគ្នា សម្រាប់ការប្រើស្រកីដូងវាបានជួយក្នុងការរក្សាសំណើមដីបានច្រើនជាងមុន។ ហើយផេះអង្កាមវិញជួយឲ្យដីមានជីវជាតិ និងធ្វើឲ្យដីធូរ។
• បន្ទាប់មកគេអាចយកប្រភេទដីល្បាប់ ឬដីខ្សាច់ ឬដីចាស់ដែលដាំដំណាំរួចយកមកលាយជាមួយស្រកីដូងចំនួន ១/២ ប៉ុន្តែដីដែលយកមកប្រើត្រូវសម្អាតដោយបាចនូវកំបោរសជាមុនសិនជៀសវាងឆ្លងមេរោគ ឬ ផ្សិតដែលគ្មានប្រយោជន៍ផ្សេងៗ។
• រួចយកកាក់សំណល់សរីរាង្គ ឬជីកំប៉ុស្តិ៍ដែលមានស្រាប់ តែត្រូវយកកំប៉ុស្តិ៍ស្ងួត ទើបអាចលាយធ្វើជាដីដាំបានដោយក្នុងកម្រិត ១/៣ ឬ ១/៣ ប៉ុន្តែត្រូវបន្ថយបរិមាណដី ១០%វិញ។
• ប្រើលាមកសត្វចំនួន ១/៦ ដើម្បីបន្ថែមនូវសារធាតុចិញ្ចឹមដល់ដី ហើយគេមិនអាចប្រើនូវប្រភេទលាមកស្រស់បានទេគេត្រូវដុត ឬ ផ្អាប់ឲ្យវាកាច់ជាមុនសិន។(ប៉ុន្តែបើដាក់កំប៉ុស្ដិ៍លាមកសត្វជាមួយកាកសំណល់សរីរាង្គរួចពុំចាំបាច់ដាក់លាកសត្វបន្ថែមក៏បានដែរ។
• ក្រោយមកគេអាចយកធាតុផ្សំទាំងនោះទៅលាយគ្នានៅលើតង់ស្អាតមួយដោយយកប៉ែលមកច្របល់គ្នាឲ្យសព្វល្អ។
• នៅពេលលាយបញ្ចូលគ្នារួចគេអាចយកទៅដាក់ក្នុងផើងសម្រាប់ដាំ ហើយស្រោចទឹកដើម្បីងាយស្រួលក្នុងការដាំ ម្យ៉ាងទៀតដី និងជីអាចរលាយចូលគ្នាបានសព្វល្បាយល្អ។

ដីបណ្ដុះកូន

ជាប្រភេទល្បាយម្យ៉ាងដែលគេមិនប្រើប្រាស់សារធាតុចិញ្ចឹម និងដីទេ ព្រោះវាជាដំណាក់កាលដំបូងដែលគ្រាប់ទើបតែចេញពន្លក និងអភិវឌ្ឍន៍ឫសរបស់វា ប៉ុន្តែគេអាចស្រោចប្រភេទកំប៉ុស្ដិ៍ទឹកបន្តិចបន្តួចជាមួយទឹកក្រោយពេលដែលកូនរុក្ខជាតិអាចដុះបានស្លឹក ២ឬ ៤។

សមាសធាតុផ្សំ

• ស្រីដូងម៉ត់(ស្រកីដូងដែលផលិតចេញពីដូងទុំ)
• ស្លែដែលដុះនៅក្នុងទឹកសាបហើយហាលឲ្យស្ងួត
• សមាសធាតុ Vermiculite និង Perlite
• ធុង ឬ តង់សម្រាប់ដាក់លាយល្បាយ
• ប៉ែល ឬចប
• និងទឹក

វិធីសាស្ត្រធ្វើ

ជាទូទៅគេត្រូវយកស្រកីដូងម៉ត់ចំនួន ១/២ លាយបញ្ជូលជាមួយ ស្លែបរិមាណ ១/៦ បន្ទាប់មកដាក់ធាតុVermiculite និង Perlite ចូលដោយយកសមាសធាតុទាំងអស់នេះទៅដាក់នៅក្នុងធុង ឬ តង់ក្រាលមួយ។ ក្រោយមកគេត្រូវច្របល់ឲ្យសព្វល្បាយបើវាខ្វះសំណើមអាចបន្ថែមទឹកបាននៅពេលដាក់កូនបណ្ដុះនៅក្នុងត្រេ។ ម្យ៉ាងទៀតយើងអាចបន្ថែមទឹកដើម្បីឲ្យវាមានសំណើមនៅពេលច្របល់ឲ្យសព្វនោះបានដូចគ្នាផងដែរ។( សមាសធាតុ Vermiculite និង Perlite យើងអាចរកទិញនៅទីតាំងលក់ដីកសិកម្ម ឬតាមរយៈប្រព័ន្ធបណ្ដាញសង្គមផងដែរ)។

នៅពេលណាគួរប្រើដីបណ្ដុះ និងដីដាំដុះ

• ដីបណ្ដុះ៖ គេអាចប្រើនៅពេលដែលគេចង់បណ្ដុះបន្លែ ឬគ្រាប់ពូជតាមរយៈត្រេ និងថង់បណ្ដុះព្រោះវាជាដំណាក់កាលដំបូងរបស់គ្រាប់ពូជក្នុងការបញ្ចេញឫស និងពន្លេកស្លឹកដោយវាមិនត្រូវការសារធាតុចិញ្ចឹមច្រើនទេគ្រាន់តែត្រូវការទឹក ពន្លឺ ល្បាយដែលមានការបង្ហូរទឹកបានល្អ និងលក្ខខណ្ឌអាកាសធាតុសមស្របមួយដែលអាចអភិវឌ្ឍន៍ខ្លួនរបស់វាបាន។

• ដីដាំ៖ គេអាចប្រើប្រាស់វានៅពេលដែលគេត្រូវការដាំកូនឈើដែលបានបណ្ដុះរួចពីថង់ ឬត្រេ ព្រោះដំណាក់កាលនេះជាដំណាក់កាលបន្ទាប់ដែលរុក្ខជាតិត្រូវការផ្លាស់ប្ដូរទីលំនៅថ្មីដើម្បីអាចលូតលាស់បានជាផ្លែផ្កាផងដែរ។

ឯកសារយោង

• https://minnetonkaorchards
• https://bachnong.vn