ការប្រើប្រាស់កំបោរសឲ្យមានប្រសិទ្ធភាពខ្ពស់

ជាទូទៅកំបោរសគឺជាសមាសធាតុដ៏សំខាន់នៅក្នុងដំណាក់កាលនៃការរៀបចំដីសម្រាប់ដាំដុះ ព្រោះគេប្រើវាជាធាតុសកម្មមួយក្នុងការបន្សាប និងបន្ថយភាពអាសុីត, សម្លាប់មេរោគក្នុងដី ការពារនិងកាត់បន្ថយផ្សិតដែលបង្កគ្រោះថ្នាក់ដល់ដំណាំ។ ចំណែកឯការប្រើកំបោរឲ្យមានប្រសិទ្ធភាពខ្ពស់ក៏អាស្រ័យទៅលើភាពមដ្ឋនៃកំបោរដែរ។ នៅក្នុងវិស័យកសិកម្មកំបោរសមាន ៥ ប្រភេទរួមមាន៖ កំបោរ CaCO3, កំបោររស់CaO, កំបោរទឹកCa(OH)2, Dolomitic limestone(CaMg(CO3)2) និង CaSO4 ។ ខាងក្រោមនេះគឺជាបច្ចេកទេសមួយចំនួនក្នុងការប្រើប្រាស់កំបោរ៖

យល់ដឹងពីប្រភេទកំបោរសនីមួយៗ

• កំបោរ CaCO3 ជាម្សៅថ្មកំបោរសាកសមសម្រាប់ដីមានអាសុីតជាមួយនឹងសមាសធាតុមេកានិចស្រាល។
• កំបោររស់CaO អាចប្រើប្រាស់បានសម្រាប់ដីដែលមានអាសុីតខ្ពស់, មេកានិចច្រើន និងសាកសមសម្រាប់ការកែលម្អដីបានយ៉ាងឆាប់រហ័ស។
• កំបោរ CaSO4 ប្រើសម្រាប់ដីប្រៃ មិនមែនដីអាសុីត ។
• កំបោរ Dolomitic វាជាកំបោរមួយដែលមានមុខងារល្អសម្រាប់កែទៅលើដីដែលខូចគុណភាព និងមាន Mg ខ្លាំង។

វិធីសាស្ត្រប្រើប្រាស់កំបោរស

• វិធីទី ១ ៖ ថ្លឹងកំបោរក្នុងបរិមាណដែលបានកំណត់សម្រាប់ទំហំដីដែលត្រូវដាក់ បន្ទាប់មកយកចបកាប់ដីជម្រៅ ៥-១០ ស.ម ដើម្បីលាយកំបោរជាមួយដីឲ្យសព្វល្អ រួចគេត្រូវស្រោចទឹកឲ្យបានច្រើនដងក្នុងគោលបំណងឲ្យវាឆាប់រលាយចូលដី ប៉ុន្តែប្រសិនបើយើងគ្រាន់តែបាចនៅលើដីដោយមិនបានស្រោចទឹកវាមិនមានប្រសិទ្ធភាពទេ។ ម្យ៉ាងទៀតបើតាមបែបវិទ្យាសាស្ត្ររុក្ខជាតិមិនអាចស្រូបយកកំបោរបានក្នុងទម្រង់ជាកំបោរធម្មតាបានទេវាត្រូវប្រើថាមពលពីការធ្វើរស្មីសំយោគដើម្បីផលិតអាសុីតកាបូន ក្រោយមកអាសុីតកាបូនទៅរំលាយកំបោរបង្កើតបានជាCa2+ ឬជាទម្រង់អុីយ៉ុងទើបរុក្ខជាតិអាចស្រូបបានតាមរយៈប្រព័ន្ធឫស ហើយធ្វើដំណើរឡើងទៅលើតាមស៊ីឡែមរបស់រុក្ខជាតិជាមួយនឹងទឹកដើម្បីទៅដល់ស្លឹក។

• វិធីទី ២ ៖ ត្រាំកំបោរជាមួយទឹកស្អាត រួចយកទៅស្រោចនៅលើដី ប៉ុន្តែមុនពេលស្រោចទឹកកំបោរកសិករគួរដាក់ជីឲ្យដីដោយដាក់លាមកសត្វ ឬ ជីកំប៉ុសដើម្បីឲ្យដីមានភាពធូរល្អ និងដីមានអុកសុីសែន ឬ ខ្យល់ចេញចូលគ្រប់គ្រាន់។

• វិធីទី ៣ ៖ បាចដោយដៃ ឬ ប្រើប្រាស់ម៉ាសុីនសម្រាប់បាចកំបោរចំពោះចំការដែលមានទំហំធំ បន្ទាប់ភ្ជួរ ឬ រាស់ដីនៅពេលរៀបចំដី។

ពេលវេលាប្រើកំបោរស

• ប្រើនៅពេលចំបាច់៖ គឺនៅពេលដែលpHធ្លាក់ក្រោម ៥.៥ ឬ ទាបជាងនេះ(pHក្រោម ៥.៥ សមត្ថភាពដីថយចុះខ្លាំង) ។
• បើបរិមាណកំបោរប្រើប្រាស់លើសពី ៦T/ ha ត្រូវដាក់២ដង/ឆ្នាំ។
• ត្រូវបាចមុនពេលដាំដំណាំ
• សម្រាប់ការសម្លាប់មេរោគដីត្រូវបាចនៅដើម និងចុងរដូវវស្សា
• ត្រូវបាចកំបោរឲ្យបាន ១-២ ដង/ឆ្នាំ
• សម្រាប់ដីដែលមានល្បាយខ្សាច់ច្រើនត្រូវបាច ១-២ដង/ខែ

កម្រិតប្រើប្រាស់កំបោរស

ការប្រើប្រាស់កំបោរគឺអាស្រ័យទៅលើប្រភេទដីដែលមានភាពអាសុីតខ្ពស់ឬទាប ប៉ុន្តែមុននឹងប្រើប្រាស់កំបោរត្រូវពិនិត្យមើល pH ដីជាមុនសិនជៀសវាងប្រើកំបោរខុស។ ខាងក្រោមនេះជាបច្ចេកទេសនៃការប្រើកំបោរទៅតាមកម្រិតនៃទំហំដី និងកម្រិតនៃ pH ៖

• pH ចន្លោះ ៣.៥-៤.៥ : ត្រូវប្រើម្សៅកំបោរ ២០០ គីឡូក្រាម សម្រាប់ដី ១០០០ ម៉ែត្រការេ និង ២តោន/ ហ.ត។
• pH ចាប់ពី ៤.៦-៥.៥: តម្រូវឲ្យប្រើកំបោរចំនួន ១០០ គីឡូក្រាម សម្រាប់ដី ១០០០ ម៉ែត្រការេ និង ១តោន/ ហ.ត។
• pH ចន្លោះពី ៥.៦ – ៦ ប្រើម្សៅកំបោរ ៥០ គីឡូក្រាម សម្រាប់ដី ១០០០ ម៉ែត្រការេ និង ០.៥តោន/ ហ.ត។
• សម្រាប់ដីមាន pH = ៦.៥ ឡើង មិនចាំបាច់ប្រើប្រាស់កំបោរទេ ប៉ុន្តែវាក៏អាស្រ័យលើដំណាំដែលត្រូវដាំដុះដែរតើវាត្រូវការអាស៊ីតនៅកម្រិតណា។
• សម្រាប់ដីឥដ្ឋ ១.៥-២.០ តោន/ ហ.ត។
• ដីខ្សាច់គេអាចប្រើប្រាស់កំបោរ ១ តោន/ ហ.ត
• ប្រសិនជាបាចកំបោរសម្រាប់ដំណាំធំត្រូវបាចនៅជុំវិញគល់ ២០០-៣០០ ក្រាម/ដើម។

ប្រភេទដីគួរប្រើកំបោរ

• ដីមានភាពអាសុីតខ្ពស់
• ដីមានស្លែលឿង ឬ ស្លែបៃតង
• ដីដែលមានការដាំដំណាំជាច្រើនរដូវកាល
• ដីខ្សាច់ និង ដីឥដ្ឋ
• ដីប្រៃ និង ដីខូចគុណភាព ។

ឯកសារយោង

• https://nongnghiepthuanthien
• https://khoangsanvina.com
• https://agreenhand.com/adding-lime-to-soil/