ចេកអំបូងលឿងគឺជាចេកដែលស្ថិតនៅក្នុងគ្រួសារ Musaceae ហើយវាជាដំណាំម្យ៉ាងដែលងាយស្រួលក្នុងការដាំដុះផងដែរ។ បច្ចុប្បន្ននេះសន្ទុះនៃទីផ្សារចេកអំបូងហាក់មានលក្ខណៈល្អប្រសើរទាំងក្នុងស្រុក និងក្រៅស្រុកព្រោះចេកនេះមានការគាំទ្រខ្លាំងដោយសារតែវាមានរសជាតិឆ្ងាញ់ ក្លិនឈ្ងុយ និងមានតម្លៃសមរម្យ។ គេអាចយកចេកអំបូងទៅធ្វើជាបង្អែមលាងមាត់ ដូចជាការេម និងបរិភោគនៅពេលទុំសម្រាប់ជាអាហារសុខភាពជាដើម។ ខាងក្រោមនេះជាវិធីសាស្ត្រដាំដុះ , អត្ថប្រយោជន៍ និងរបៀបបន្ទំចេកឲ្យទុំល្អ៖
គុណសម្បត្តិចេកអំបូងលឿង
- រក្សាតុល្យភាពជាតិស្ករនៅក្នុងឈាម
- ការពារការទល់លាមក
- ធ្វើឲ្យប្រសើរឡើងនូវ ពោះវៀន តម្រង់នោម និងបេះដូង
- ជំនួយក្នុងការសម្រកទម្ងន់ និងមានអត្ថប្រយោជន៍ជាច្រើនទៀត។
អំពីចេកជាលិកាវប្បកម្ម
ចេកអំបូងជាលិកាវប្បកម្មគឺជាចេកមួយប្រភេទដែលមានការដាំដុះដោយមិនផ្ទាល់ ដោយតម្រូវឲ្យមានការបណ្ដុះកូននៅក្នុងលក្ខខណ្ឌអាកាសធាតុបន្ទប់ពិសោធន៍។ នៅក្នុងបន្ទប់ពិសោធន៍គេប្រើប្រាស់អំពូលម៉ែត្រសម្រាប់ជាពន្លឺដើម្បីជំនួយដល់ការធ្វើរស្មីសំយោគ និងមានសីតុណ្ហភាពសមស្របមួយចន្លោះ ២៥-២៨ អង្សាសេចេញពីម៉ាសុីនត្រជាក់។ ចេកជាលិកានេះជាកូនពូជដែលពុំមានជំងឺឬការបំផ្លាញពីសត្វល្អិតទេ ហើយវាមានអត្ថប្រយោជន៍ជាច្រើនព្រោះចេកជាលិកាអាចប្រមូលផល និងមានការលូតលាស់ប្រើរយៈពេលស្មើៗគ្នា។
លក្ខខណ្ឌអាកាសធាតុ និងដី
ចេកអំបូងអាចដុះលូតលាស់បានល្អឋិតនៅសីតុណ្ហភាពចន្លោះពី ២៥- ៣៥ អង្សាសេ និងមានកម្រិតទឹកភ្លៀងពី ១២០០- ២០០០ មីលីម៉ែត្រ។ ចំពោះសំណើមខ្យល់គឺ ៥០ -៩០% ហើយរុក្ខជាតិនេះអាចដាំដុះនៅលើដីជាច្រើនប្រភេទ រួមទាំងតំបន់ភ្នំ។ ម្យ៉ាងទៀតដីដែលល្អសម្រាប់ចេកគឺជាដីដែលសំបូរទៅដោយhumus, មានអុកសុីសែនគ្រប់គ្រាន់, បង្ហូរទឹកបានល្អ, មានកម្រិត pH ចន្លោះ ៥-៧ និងកម្ពស់ ៦០០ម. ពីនីវ៉ូទឹកសមុទ្រ។ ម្យ៉ាងទៀតគេអាចដាំដុះវាបានពេញមួយឆ្នាំអាស្រ័យលើប្រព័ន្ធស្រោចស្រប់ ហើយគេក៏អាចដាំបាននៅរដូវវស្សាដែរពីខែ កញ្ញា-ធ្នូ។
បច្ចេកទេសដាំដុះ និងថែទាំ
- ការរៀបចំដី៖ ត្រូវភ្ជួរដីឲ្យស្អាត និងហាលដីចោលចំនួន ៥-៧ ថ្ងៃ។ បន្ទាប់មកត្រូវជីករណ្ដៅទំហំ ៤៥x៤៥x៤៥ស.ម រួចដាក់ជីទ្រាប់បាត ដោយលាយជាមួយដីស្រទាប់លើ, កំបោរ, លាមកសត្វ និង ជីNPK ( ២០-២០-១៥) ទុកចោលនៅក្នុងរណ្ដៅចន្លោះ10-15ថ្ងៃ ទើបអាចដាំបាន។ រីឯចម្ងាយពីដើមមួយទៅដើមមួយគឺចាប់ពី ២x២ម, ២x២.៥ម, ២x៣ម ដែលអាចដាំបានពី ២៥០០ដើម, ២០០០ដើម និង១៧០០ដើមក្នុងមួយហិចតា។
- របៀបដាំ៖ ត្រូវជ្រើសរើសកូនណាដែលមានសុខភាពល្អ ដើមធំ និងត្រង់។ ជំហានដំបូងគេអាចហែក ឬ កាត់ថង់កូនចេកបន្ទាប់មកដាក់កូនឲ្យចំកណ្ដាលរណ្ដៅ ហើយលុបដីឲ្យទាបជាងរណ្ដៅ ៣-៥ ស.ម ប្រសិនបើមានចំបើងស្ងួតអាចដាក់ចំបើងជុំវិញកូនដើម្បីការពារកុំឲ្យឆាប់ដុះស្មៅ។
ការថែទាំ
- ក្រោយពេលដាំរួចត្រូវស្រោចទឹកកូនចេកភ្លាមៗនៅក្នុងករណីដាំនៅរដូវប្រាំង។ គេអាចស្រោចទឹក ៧-១០ថ្ងៃ ដោយចន្លោះ១-២ ថ្ងៃម្ដងទៅតាមប្រភេទដីដែលអាចរក្សាសំណើមបានកម្រិតណា។
- នៅពេលដើមធំត្រូវស្រោចទឹកចន្លោះ ២០-៣០ ថ្ងៃម្ដងអាស្រ័យទៅតាមអាកាសធាតុតំបន់នីមួយៗ។ សម្រាប់តំបន់ទំនាបតម្រូវឲ្យមានការកាយប្រឡាយទឹក ឬ ចង្អូរទឹកជៀសវាងការជាំទឹកនៅរដូវវស្សា។
វិធីសាស្ត្រក្នុងការដាក់ជី
- បន្ទាប់ពីដាំបានរយៈពេល ៧- ១០ ថ្ងៃ ត្រូវប្រើជី អ៊ុយរ៉េ ចំនួន ៣០០-៤០០ក្រាម/ដើម និង ប៉ូតាស្យូម ៤០០-៥០០ក្រាម/ដើម។
- ដាក់ជីលើកទី១៖ ៤៥ថ្ងៃក្រោយដាំ(ដើមកម្ពស់៥០-៧០ ស.ម) ត្រូវដាក់ជីអ៊ុយរ៉េ ៣០% និង ប៉ូតាស្យូម ៣០%។
- លើកទី២៖ នៅអាយុ ១៣៥ថ្ងៃ ត្រូវដាក់ អ៊ុយរ៉េ ៤០% និងប៉ូតាស្យូម ៤០%។
- លើកទី៣៖ ចេកអាយុ ២២៥ថ្ងៃ(មុនផ្លែ) គេអាចប្រើជី NPK(២០-២០-១៥) ឬ NPK(១៦-១៦-៨) ចំនួន ១០០០ក្រាមក្នុងមួយដើម/៣ដង។
ការបំបែកគុម្ព
- នៅពេលចេកអាយុ ១៣៥ថ្ងៃ វាចាប់ផ្ដើមចេញកូន គេត្រូវកាត់កូនចេកចោលដោយទុកតែកូន ១ និងមេ ១ មានចម្ងាយពីដើមមេ ២០ ស.ម ជៀសវាងការប្រកួតប្រជែងសារធាតុចិញ្ចឹម ទឹក និងពន្លឺ។
- ត្រូវកាត់ស្លឹកចេកណាដែលមានពណ៌លឿង និងមានការបំផ្លាញពីសត្វល្អិត។ ម្យ៉ាងទៀតនៅពេលដែលចេកខ្ពស់ត្រូវយកឈើទល់ការពារកុំឲ្យដើមដួលនៅពេលចេញផ្លែ។
របៀបនៃការប្រមូលផល
ចេកចាប់ផ្ដើមចេញផ្កា និងផ្លែនៅអាយុ ១១៥ – ១២០ ថ្ងៃ ហើយនៅពេលវាចាស់អាចកាប់បានមានពណ៌បៃតងចាស់។ គេអាចប្រើ បាវ, ចំបើង, និងស្លឹកចេកសម្រាប់ដាក់ចេកកុំឲ្យវាមានស្នាមជាំជៀសវាងខូចតម្លៃទីផ្សារ។
វិធីសាស្ត្របន្ទំចេក
ជាដំបូងត្រូវយកចេកទៅលាងទឹកចេញកាត់ជាស្និតឬប្រលេះតាមតម្រូវការរបស់យើងរួចទុកឲ្យស្រក់ទឹក បន្ទាប់មកលាយអ័រម៉ូនអេទីឡែនជាមួយនឹងទឹក ដោយទឹក ១L ប្រើអ័រម៉ូន ១០ ml ហើយត្រូវកូរឲ្យសព្វរួចត្រាំចេកទៅក្នុងអ័រម៉ូនចន្លោះពី ៥-១០ នាទី។ ក្រោយត្រាំរួចគេអាចយកចេកនោះទៅដាក់ឲ្យស្រក់ទឹកអស់ហើយរៀបចំដាក់ក្នុងឡាំងឬធុងបិទជិត ហើយ ៣ ថ្ងៃក្រោយមកវាចាប់ផ្ដើមទុំចេញពណ៌លឿង។(អ័រម៉ូនអេទីឡែនគឺជាអ័រម៉ូនម្យ៉ាងដែលប្រើសម្រាប់បន្ទំផ្លែឈើ ហើយកាន់តែពិសេសទៅទៀតនោះវាមិនមានការប៉ះពាល់ដល់សុខភាពឡើយ)។
ឯកសារយោង៖
