បច្ចេកទេសដាំដុះចេកណាំវ៉ាឱ្យទទួលបានទិន្នផលខ្ពស់

ចេកជាផ្លែឈើមួយប្រភេទដែលប្រជាជនយើងនិយមបរិភោគ មិនត្រឹមតែប៉ុណ្ណោះចេកក៏អាចយកទៅធ្វើជាបង្អែម ឈឹង និងយកទៅបំពងជាចេកចៀនក៏បាន។ ម្យ៉ាងវិញទៀតប្រជាជនយើងនិយមយកចេកជាគ្រឿងដង្វាយរៀងរាល់ថ្ងៃសីលនិងកម្មវិធីបូជាផ្សេងៗ។ ទាំងអស់គ្នាប្រាកដជាស្គាល់ចេកណាំវ៉ាហើយពីព្រោះចេកប្រភេទនេះមានសម្បូរនៅលើទីផ្សាររបស់យើង។ តោះ មកដឹងពីវិធីដាំចេកណាំវ៉ាឱ្យទទួលបានទិន្នផលខ្ពស់ទាំងអស់គ្នា

ការរៀបចំដី

• ភ្ជួរដីលើកទី១ដើម្បីសំលាប់ស្មៅ ១០ថ្ងៃក្រោយត្រូវភ្ជួរម្តងទៀត។

ការរៀបចំដាំ

• ទុកចន្លោះពីរងនីមួយៗចម្ងាយ ២ម៉ែត្រ
• ជីករណ្តៅទំហំ ៥តឹកx៥តឹកx៣ជម្រៅតឹក
• ដាក់ជីកំប៉ុស្ត៍ និងដីមមោគ ៥គីឡូក្រាមក្នុង១រណ្តៅ
• យកកូនចេកដែលមានកម្ពស់ប្រមាណ៣តឹក ដែលមានដុះស្លឹកប្រមាណ៣ធាងសម្រាប់ការដាំ
• ដាក់ដាំកូនចេកនៅចន្លោះកណ្តាលនៃរណ្តៅរួចលប់ដីបំពេញ ហើយត្រូវដាំកូនចេកទាំងអស់បែរទៅទិសតែមួយ (មើលតាមស្លឹកធាងដំបូង) ដើម្បីងាយស្រួលប្រមូលផល។
• ពេលដាំរួចដាក់ចំបើងគ្របជុំវិញគល់របស់វារួចស្រោចទឹក។

ការថែទាំនិងដាក់ជី

• ត្រូចធ្វើការស្រោចទឹកជាប្រចាំនៅពេលដែលដីនៅជុំវិញគល់របស់វាស្ងួត។
• នៅពេលវាអាយុបាន ១ខែ ដាក់ជី 10-5-15 ឬ 10-0-20 ៨០-១០០ក្រាម ក្នុងមួយដើម។
• នៅពេលវាអាយុបាន ៣ខែ ដាក់ជី 10-5-15 ឬ 10-0-20 ២៥០ក្រាម ក្នុងមួយដើម។
• នៅពេលវាអាយុបាន ៥ខែ ដាក់ជី 5-15-20 ២៥០ក្រាម ក្នុងមួយដើម។
• នៅពេលវាអាយុបាន ៧ខែជាពេលដែលវាចាប់ផ្តើមមានត្រយោង ដាក់ជី 10-0-00 ៥០-១០០ក្រាម ក្នុងមួយដើម។
• ដាក់ជីកំប៉ុស្ត៍រាល់៣ខែម្តង និងត្រូវធ្វើការសម្ងាតស្មៅជាប្រចាំ។
• ត្រូវកាត់ស្លឹកណាដែលរាងទុំលឿងចេញ ដើម្បីឲ្យវាមានសារធាតុគ្រប់គ្រាន់សម្រាប់ចិញ្ចឹមដើម និងផ្លែ។
• រយៈពេល ៥ខែបន្ទាប់ពីការដាំត្រូវចងបង្គោលសម្រាប់ទប់ដើមចេកការពារការបាក់ដើមនៅពេលវាផ្លែ។
• យកថង់ប្លាស្ទិច ឬការុងពណ៌ខៀវចងស្រោបត្រយោងចេក១៥ថ្ងៃ មុននឹងធ្វើការកាត់ប្រមូលផលដើម្បីឲ្យវាមានពណ៌ស្រស់ស្អាត និងការពារពីសត្វផ្សេងៗផងដែរដោយទុកចំហរផ្នែកចុងខាងក្រោមបន្តិច។
• កាត់ចុងត្រយោងចេកចោលនៅពេលដែលវាចេញផ្លែដែលផ្លោសល្អអស់ហើយ។

ការប្រមូលផល

• រយៈពេលប្រមាណ ១០ខែយើងអាចចាប់ផ្តើមប្រមូលផលបាន។
• នៅពេលដែលប្រមូលផលពីដើមចេកណាមួយហើយយើងត្រូវកាត់ដើមនោះចោលដោយទុកកម្ពស់ប្រមាណ ១,៥ម៉ែត្រពីដីដើម្បីកុំឲ្យវាដណ្តើមជីវជាតិពីដើមដ៏ទៃ។
• ការតាត់បែបនេះដើម្បីឲ្យចេកចេញកូនពន្លកថ្មីៗច្រើនបន្ថែមទៀតដែលអាចឲ្យយើងជីកយកកូនរបស់វាដាំបន្តទៀត។
• បន្ទាប់ពីប្រមូលផលអស់ហើយយើងត្រូវដាំចេកដោយជីករណ្តៅថ្មីផ្សេងពីរណ្តៅចាស់ ហើយគល់ចេកនៅរណ្តៅចាស់វារលួយក្លាយជាជីសម្រាប់ចេកថ្មីបានផងដែរ។

ឯកសារយោង

• https://server2.maff.gov.kh/parse/files/myAppId5hD7ypUYw61sTqML/ec35d0db01ba061ff08e9a785ed34777_1503148022.pdf
• https://economy.ams.com.kh/business/news/dwarf-bananas-are-easy-to-grow-provide-many-benefits-both-yield-and-demand/