ខ្ទឹមស្លឹក មិនត្រឹមតែបន្ថែមឱជារស ក្លិន និងបង្កើតសោភ័ណ្ឌភាពអាហារប៉ុណ្ណោះទេ វាថែមទាំងមានគុណប្រយោជន៍ចំពោះសុខភាពថែមទៀតផង មិនត្រឹមតែប៉ុណ្ណោះវាត្រូវបានអ្នកប្រើប្រាស់ ប្រើដើម្បីបន្ថែមក្លិនសម្រាប់បរិភោគជាដើមស្រស់ ជាគ្រឿងទេស ព្រមទាំងច្នៃធ្វើជាឱសថសម្រាប់ព្យាបាលជំងឺ ជួយសម្រួលដល់អាការៈជំងឺមួយចំនួនទៀតផង។
វាមានដើមរលោង ជាស្រទាប់ដែលគេហៅថា ស្រទាប់នៃទងស្លឹក ស្លឹកពណ៌បៃតងចាស់ ហើយសំប៉ែត ពូជខ្លះស្លឹកមូល ខ្លះទៀតស្លឹកសំប៉ែតធំហើយមានប្រវែងវែង។ នៅក្នុងអត្ថបទនេះនឹងរៀបរាប់ពីវិធីដាំដូចជាការរៀបចំដី ការជ្រើសរើសពូជ របៀបដាំ ការថែទាំនិងការប្រមូលផល
ការរៀបចំដី
- ភ្ជួរដីឲ្យម៉ដ្ឋល្អ ២ ទៅ ៣ដង
- ហាលទុករយៈពេលពី ១០ ទៅ ១៥ថ្ងៃ
- បន្ទាប់មកលើកជារង ដែលមានកំពស់ ១តឹក ដើម្បីការពារកុំឲ្យខ្ទឹមជាំទឹក-ក្រោយមកកាប់រណ្តៅជំរៅមួយចប និងទំហំ ១តឹក ៤ជ្រុង
- យកជីកំប៉ុសពុកផុយទៅដាក់ក្នុងរណ្តៅ និងជ្រុំបញ្ចូលជាមួយដីរួចលុបដី ។
ការជ្រើសរើសពូជ
ខ្ទឹមដែលដាំនេះ គឺទុកពូជតៗគ្នាពី ១ឆ្នាំ ទៅ ១ឆ្នាំ មិនឲ្យផុតពូជហើយពូជដែលគេនិយមដាំ គឺខ្ទឹមខ្យល់ព្រោះខ្ទឹមប្រភេទនេះមានទំងន់ធ្ងន់ពុំមានសត្វល្អិតបំផ្លាញ និងមានទីផ្សារច្រើន។ការដាំត្រូវរើសយកតែដើមធំ និងថ្លោសល្អ ដើមឆាប់បែកកូនច្រើន រើសយកដើមចាស់ពេលដាំមិនរលួយ និងឆាប់លូតលាស់ ។
រូបតំណាង
ការដាំ
ក្នុងការដាំត្រូវដកភ្លាមដាំភ្លាម ត្រូវដាំនៅពេលល្ងាចទើបល្អព្រោះវាត្រជាក់ និងអាចត្រូវទឹកសន្សើម ជួយឲ្យវាលូតលាស់បានល្អ ដើម្បីឲ្យខ្ទឹមឆាប់លូតលាស់ហើយបែកគុម្ពបានច្រើន ត្រូវដាំចន្លោះពីគុម្ពមួយទៅគុម្ពមួយប្រវែង ២តឹក ដើម្បីឲ្យពន្លឺថ្ងៃចេញចូលបានគ្រប់គ្រាន់ និងដាំរាក់ៗ។
ការថែទាំ
ក្រោយពីដាំរួចធ្វើការស្រោចទឹកក្នុងមួយថ្ងៃ ២-៣ ដង គឺនៅពេលព្រឹក ថ្ងៃត្រង់ និងពេលល្ងាច-បន្ទាប់ពីដាំបានរយៈពេល ១០ ទៅ ១៥ ថ្ងៃ ធ្វើការបោចស្មៅជ្រុំជើងម្តង និងសកស្លឹកខ្ទឹមដែលចាស់ៗចេញ ។
ចំណាំ៖ គួរកុំស្រោចទឹកពេលថ្ងៃត្រង់ ពីព្រោះជាពេលដែលរុក្ខជាតិត្រូវបញ្ចេញទឹកច្រើនពីស្លឹក។ យកល្អគួរកុំដាំខ្ទឹមខ្យល់នេះលើដី ឬរងដដែលយូរពេក គួរឆ្លាស់ជាមួយដំណាំផ្សេងទៀត ក្នុង១ឆ្នាំ ឲ្យបាន ២ ទៅ ៣ ដង។
ការប្រមូលផល
ជាទូទៅក្រោយពីដាំបានរយៈពេល ១ ខែ គេអាចចាប់ផ្តើមប្រមូលផលខ្ទឹមបានដោយសំគាល់ឃើញស្លឹករបស់វាឡើងម្ស៉ៅ និងកមើមរបស់វាឡើងស្ដួច។ ក្នុង១ឆ្នាំគេអាចប្រមូលផលបាន ៦ ទៅ ៨ ដង ក្នុង ១ គីឡូក្រាម អាចលក់បានតំលៃ ២០០០-៣០០០ រៀល ។ លក្ខណៈពិសេសនៅពេលប្រមូលផលម្តងៗគេតែងតែទុកពូជបន្តរហូតមិនឲ្យផុតពូជឡើយ ។
ឯកសារយោង: ១. ក្រសួងកសិកម្ម រុក្ខាប្រមាញ់ និងនេសាទ, ២០០៥. បច្ចេកទេសដាំដំណាំខ្ទឹមស. នាយកដ្ឋានផ្សព្វផ្សាយនៃក្រសួង កសិកម្ម រុក្ខាប្រមាញ់ និងនេសាទ. ភ្នំពេញ, កម្ពុជា. ទំព័រ ១ – ២.
២. ក្រសួងកសិកម្ម រុក្ខាប្រមាញ់ និងនេសាទ, ២០១៧. វិធីសាស្ត្រគ្រប់គ្រងស្លឹកខ្ទឹម ក្រោយពេលប្រមូលផល. ព័ត៌ មានទេសចរណ៍-ផលិតផលខ្មែរទៅតំបន់អាស៊ាន និងពិភពលោក. ភ្នំពេញ, កម្ពុជា. ទំព័រ ៤ – ៧.
៣. អ៊ាង សុផល្លែត, ២០២០. បច្ចេកទេសដាំខ្ទឹមស្លឹក. ដែនដីនៃការចែករំលែក. ភ្នំពេញ, កម្ពុជា. ទំព័រ ២ – ៣.
៤. អ៊ាង សុផល្លែត, ២០១៨. វិធីងាយៗក្នុងការទុកពូជស្លឹកខ្ទឹម យកទៅដាំបានដោយខ្លួនឯង. ឌិ អាយខនមេឌៀ. ភ្នំពេញ, កម្ពុជា. ទំព័រ ១ – ៦.
