អ្វីទៅជាជីស្រស់(Green Manure)?តោះមកស្គាល់ពីអត្ថប្រយោជន៍និងពេលប្រើប្រាស់វាទាំងអស់គ្នា 

អ្វីទៅជាជីស្រស់(Green Manure)?

ជីស្រស់គឺជាប្រភេទដំណាំគម្របដីដូចជា ប្រភេទពពួកសណ្ដែក និងពពួកអម្បូរ Legumes ដែលត្រូវបានដាំដុះ ក្នុងគោលបំណងកប់លប់ដំណាំទាំងស្រស់ចូលទៅក្នុងដីចំការដើម្បីធ្វើជីបំប៉នធម្មជាតិ។

ជីស្រស់សម្បូរទៅដោយអាសូត ដែលល្អសម្រាប់បន្លែ និងដំណាំផ្សេងៗ។ ការប្រើប្រាស់ជីស្រស់ (Green Manure) គឺជាវិធីសាស្រ្ដមួយក្នុងចំណោមវិធីសាស្រ្ដការពារបរិស្ថានជាច្រើនទៀត ដែលជួយឲ្យវិស័យកសិកម្មមាននិរន្ដភាពតាមរយៈការការពារធនធានធម្មជាតិ និងរក្សាតម្រូវការស្បៀងអាហារ។

ពេលណាដែលយើងត្រូវការដាំដុះជីស្រស់ និងប្រើប្រាស់វាឲ្យត្រូវតាមក្បួនខ្នាត?

• ដំណាំជីស្រស់ត្រូវដាំមុនពេលដាំដំណាំគោល ។ ចំណែករយៈពេលដាំដុះអាស្រ័យទៅលើអាយុកាលជីស្រស់នោះ មុននឹងធ្វើការកប់លប់ចូលក្នុងដី។
• ធ្វើការសាបព្រោះជាជួរៗលើដីដែលបម្រុងដាំដំណាំគោល
• នៅពេលដែលយើងត្រូវការដីនោះដើម្បីដាំដំណាំគោល យើងត្រូវកាត់កម្ចេចដំណាំជីស្រស់នោះជាបំណែកតូចៗ រហូតដល់វារលួយតាមសម្រួល
• ធ្វើការកប់លប់ទៅក្នុងដីស្រទាប់ខាងលើប្រហែល២៥សង់ទីម៉ែត្រ
• ត្រូវទុករយៈពេល២សប្ដាហ៍ឡើងទៅ ដើម្បីឲ្យជីស្រស់រលាយក្នុងដីបានសព្វល្មមដីដាំដំណាំថ្មីបាន។

អត្ថប្រយោជន៍ពីការប្រើប្រាស់ដំណាំជីស្រស់ (ដំណាំគម្របដី)

ទាំងនេះជាអត្ថប្រយោជន៍នៃការប្រើប្រាស់ដំណាំជីស្រស់ដែលល្អជាជាងការទុកដីទំនេរចោល

• ជួយការពារដីពីការសឹករិចរិលដោយសារខ្យល់ ភ្លៀង
• បង្កើនសារធាតុអាសូត ផូស្វ័រ ជាតិដែក ប៉ូតាស្យូម និងកាល់ស្យូមទៅក្នុងដី
• ជួយបង្កើនពពួកមីក្រូសារពាង្គកាយ (អតិសុខុមប្រាណ) ដែលមានប្រយោជន៍ក្នុងដី
• ឬសរបស់ដំណាំជីស្រស់ ជួយឲ្យដីមានសភាពធូរ មានខ្យល់ចេញចូលគ្រប់គ្រាន់ និងរក្សាសំណើមដីបានយូរ ដោយកសិករមិនចាំបាច់ធ្វើការភ្ជួររាស់តាមវីធីសាស្រ្ដបុរាណនាំឲ្យខូចទ្រង់ទ្រាយដី
• ការពារពីជម្ងឺរុក្ខជាតិមួយចំនួន និងសត្វល្អិតបំផ្លាញដំណាំ
• ជួយឱ្យដំណាំគោលលូតលាស់ធំធាត់លឿន និងទទួលបានទិន្នផលខ្ពស់។

ឯកសារយោង: eos.con, rhs.org.uk