បច្ចេកទេសតត្រួយស្វាយចន្ទី

ការតមែកគឺជាបច្ចេកទេសសាកវប្បកម្មដែលប្រើដើម្បីភ្ជាប់ផ្នែកពីរុក្ខជាតិពីរឬច្រើនដើម្បីអោយវាលូតលាស់ជារុក្ខជាតិតែមួយ។នៅក្នុងការផ្សាំផ្នែកខាងលើ(scion) នៃរុក្ខជាតិមួយដុះនៅលើប្រព័ន្ធឬស(ឬសគុល)នៃរុក្ខជាតិមួយទៀត ។ ដំណាំចន្ទីអាចពង្រីងពូជបានច្រើនរបៀបដូចជា បំបៅមែក(សាកមែក) តមែកលើដើមចាស់ និងការតត្រួយនៅលើកូនដែលយើងបណ្ដុះនៅក្នុងថង់ប្លាស្ទិច(អាយុ៤៥-៦០ថ្ងៃ)។បច្ចេកទេសក្នុងការតត្រួយចន្ទីគឺជាជំនាញដែលសំខាន់និងផ្ដល់ប្រយោជន៍ច្រើន ដូចជា បើយើងចេះបច្ចេកទេសនេះច្បាស់យើងអាចកាត់បន្ថយការចំណាយលើការទិញកូន អាចជ្រើសរើសពូជដែលមានតម្រូវការផ្សារចង់បាន និងអាចយកជំនាញនេះធ្វើជាអាជីវកម្មផងដែរ។

ការបណ្ដុះកូនស្វាយចន្ទី

• គ្រាប់យកមកបណ្ដុះ ត្រូវយកគ្រាប់ដែលប្រមូលផលនៅរដូវថ្មីៗ (ខែកុម្ភៈ-មេសា)
• យកគ្រាប់ត្រាំទឹកត្រជាក់ធម្មតា ២៤-៤៨ ម៉ោង រើសយកតែគ្រាប់ដែលលិចក្នុងទឹកមកបណ្ដុះ
• ស្រង់ផ្អាប់ទុកក្នុងបាវក្រចៅ (ក្រណាត់សើម) ៤៨ម៉ោង ស្រោចទឹករាស់ថ្ងៃរហូតដល់ដុះពន្លក
• លាយល្បាយដីក្នុងអត្រា ១.១.១ នៃដីធម្មតា ផេះអង្កាម ជីកំប៉ុស្ដ និងថ្មកំបោរ៥ក្រាម
• យកថង់ខ្មៅមានទំហំ ១៥x៣០ស.ម ច្រកល្បាយដី
• យកគ្រាប់ដុះពន្លក ទៅកប់ក្នុងដីច្រកថង់រួច ជម្រៅ២.៥ស.ម
• ស្រោចទឹកជាប្រចាំ គ្រាប់ស្វាយចន្ទីនឹងដុះឡើងក្នុង រយៈពេល១៥-២០ថ្ងៃ
• កូនស្វាយចន្ទីយកទៅតត្រួយបាននៅអាយុ៤៥-៦០ថ្ងៃ

ការជ្រើសរើសកូនទម្រសម្រាប់តត្រួយ

• យកដើមដែលធំថ្លោសល្អ មានអាយុពី ៤៥-៦០ថ្ងៃ
• គ្មានការបំផ្លាញពីសត្វល្អិតនិងជម្ងឺ

ការជ្រើសរើសមែកពូជសម្រាប់ត

• ត្រួយមានអាយុយ៉ាងតិច២ខែ
• ជាត្រួយ ក្រពុំគ្មានផ្កា មានពណ៍បៃតងចាស់
• ជាត្រួយគ្មានជម្ងឺ និងសត្វល្អិតបំផ្លាញ
• កាត់ស្លឹកត្រួយនោះចោលអោយអស់រយៈពេល១-២សប្ដាហ៍មុនកាត់យកមក

សម្ភារៈ

• ស្កុតរុំ
• កន្ត្រៃ
• កាំបិតមុត

ការអនុវត្តតត្រួយ

• កាត់ចុងកូនទម្រចោលទុកកម្ពស់ដី ១៥ស.ម ទុកស្លឹកឆ័ត្រខាងក្រោមពីរគូរ
• ពុះគល់ទម្រកណ្ដាលដើមជម្រៅ ៣-៥ស.ម
• យកត្រួយដែលកាត់បានប្រវែង១០ស.ម មកចិតជារាងអក្សរ V ប្រវែង ៣-៥ស.ម
• ត្រួយដែលចិតរួចស៊កបញ្ជូលក្នុងគល់ទម្រដែលពុះរួច
• លៃយ៉ាងណាអោយស្រទាប់រំអិលរវាងគល់ទម្រនិងត្រួយពូជមានភាពស៊ីគ្នា
• យកថង់ប្លាស្ទិច រំចងកន្លែងមុខតអោយតឹង ការពារការជ្រាបទឹកចូល និងរុំដល់ផុតចុងត្រួយការពារការបំភាយទឹក
• កូនដែលតរួចដាក់នៅកន្លែងម្លប់១៥ថ្ងៃ
• ត្រួយដុះទំលុះថង់ចេញ មានពន្លកដុះចេញពីកូនគុលទម្រត្រូវកាត់ចេញ
• ថង់ប្លាស្ទិចដែលរុំ ត្រូវកាត់ចេញពេលតរួច បាន៣-៤ខែ និងយកទៅដាំបាននៅពេលបន្ទាប់។

ឯកសារយោង

• ដកស្រង់ចេញពី ក្រសួងកសិកម្មរុក្ខាប្រមាញ់និងនេសាទ អគ្គនាយកដ្ឋានកសិកម្ម ២០១៨ ចេញពីកូនសៀវភៅស្ដីពី បច្ចេកទេសដាំស្វាយយចន្ទីដែលធន់ទៅនឹងការប្រែប្រួលអាកាសធាតុ ដកស្រង់នៅថ្ងៃទី៨ កញ្ញា ២០២៤