ជាទូទៅដីដែលល្អសម្រាប់ដំណាំជាដីដែលមានកម្រិតpHចាប់ពី៥.៥-៧.០ ហើយវាមានតួនាទីក្នុងការជួយរំលាយទៅសារធាតុចិញ្ចឹមនៅក្នុងដីរបស់ដំណាំផងដែរ។ ប៉ុន្តែដំណាំប្រភេទផ្សេងគ្នាវាក៏មានតម្រូវការកម្រិតpHក្នុងដីខុសគ្នាដែរ ព្រោះដំណាំខ្លះត្រូវការអាសុីត និងមួយចំនួនទៀតមិនសូវត្រូវការអាសុីតនោះទេ។ ខាងក្រោមនេះគឺជាកម្រិតនៃpH(អាសុីត)ដែលដំណាំនីមួយៗត្រូវការជាមធ្យម និងការពន្យល់ទាក់ទងនឹងឥទ្ធិពលនៃpHចំពោះដី និងរុក្ខជាតិជាដើម។

ឥទ្ធិពលpHដីចំពោះដំណាំ

• ធ្វើឲ្យដំណាំលូតលាស់លឿន និងទិន្នផលល្អនៅពេលដែលpHដីសមស្របសម្រាប់ដំណាំនីមួយៗ។
• ជួយដល់សកម្មភាពអតិសុខុមប្រាណនៅក្នុងដីដោយសំដៅទៅលើប្រភេទ បាក់តេរីជួសជុលអាសូត និងពពួកផ្សិតmycorrhiza ដែលមានតួនាទីក្នុងការចម្លងសារធាតុចិញ្ចឹមសម្រាប់រុក្ខជាតិ។
• នៅពេលដែលដីមានអាសុីតខ្ពស់វាបានបង្កើននូវពពួកសារធាតុពុលដល់ដំណាំដូចជា អាលុយមីញ៉ូម ម៉ង់កាណេស និងដែក។ ហើយវាបានកាត់បន្ថយនូវ ផូស្វ័រ កាល់ស្យូម និងម៉ាញេស្យូមផងដែរ។

បន្លែស្លឹក

ជាមធ្យមបន្លែស្លឹកមានតម្រូវការpHដីចន្លោះ៦.០-៧.០ ដើម្បីផ្គត់ផ្គង់ការលូតលាស់របស់វា។ ជាឧទាហរណ៍៖

• ស្ពៃក្ដោបមានpH: ៦.០-៧.០
• ស្ពៃតឿ៥.០-៧.០ និងដំណាំដទៃទៀត។

បន្លែយកផ្លែ

បន្លែយកផ្លែ មានតម្រូវការpHដីជាមធ្យមប្រហែល ៥.៥-៧.៥។ ជាក់ស្ដែងបន្លែទាំងនោះរួមមាន៖

• ម្ទេសមានpH ៦.០-៧.០
• ត្រសក់មានpH ៦.០-៦.៥
• ប៉េងប៉ោះមានpH ៦.២-៦.៨ ។ល។

ដំណាំមើម

នៅក្នុងដំណាំមើមវាមានកម្រិតpHដីចន្លោះប្រហែល ៥.០-៦.០ ដែលដំណាំទាំងនោះរួមមាន៖

• ដំឡូងមី
• ការ៉ុត
• ឆៃថាវ
• ដំឡូងបារាំង។ល។

ដំណាំឈើហូបផ្លែ

ជាប្រភេទដំណាំឈើយកផ្លែឬរុក្ខជាតិជាតិឈើដែលមានតម្រូវការចាំបាច់pHដីចន្លោះប្រហែល ៥.០-៧.០ ដែលដំណាំទាំងនោះមានដូចជា៖

• ទុរេនមានpH: ៥.០-៦.៥
• កាហ្វេមានpH: ៥.០-៦.០
• ត្របែកមានpH: ៥.៥-៧.៥
• សាវម៉ាវមានpH: ៥.៥-៦.៥។ល។

សណ្ដែក

ដំណាំប្រភេទនេះមានតម្រូវការpHជាមធ្យមចន្លោះពី ៦.០-៧.០ ហើយដំណាំទាំងនោះរួមមាន៖

• សណ្ដែកដី
• សណ្ដែកបាយ
• សណ្ដែកសៀង។ល។

#ចំណាំ៖ដើម្បីអាចដឹងពីការវាស់pHនៃដីយើងអាចសិក្សាតាមរយៈអត្ថបទមួយនេះបានhttps://kaksekam-time.com

ឯកសារយោង

• https://vinatap.vn
• https://tanixa.com
• https://extension.umn.edu/vegetables/growing-cabbage
• https://www.manitoba.ca/
• https://extension.umn.edu